Read Aimol TIRLON 12 Bible Online

TIRLON 12 - Aimol bible

TIRLON 12

¹Hiva phalaihin Herod rengpan biakrup sunga mi aviar ha pong khodengthei a hong pek.

²A man Johon a u Jakob Jems ha chemseia a man that,

³hava itho jarra Jiwngai ha an lung a bejui tihi amu karra, Pitar ham a man a man churjui, hivahi chol kan chel lui ut pha han alui ni.

⁴A man Pitar ha a chur suale ren inna atet a thun na ralmi manli manli ning an ngak rup han ama ha ngak na ranga a pek jui, ajarko, kan na ut suale ama ha mingai madonna keisua rang tia alui ngaidon.

⁵Han Pitar ha ren inna an lui siak tak-ha ama ranga biakrup mingain lung lut tak Pathian jiang an lui lam.

⁶Herod ning Pitar ha mitam madonna akeisua mak ma, nikhuo ma don jan han Pitar ralmi anni kong karra thir rui an nija an khit dea alui jal. Hale ren inn suangkot han ralmingain an lui ngak.

⁷Enru, Puma thaneithiang an khat in a sirra a ngirra an om na mun ha avar jui, han thaneithiang ha ning Pitar adarhan asit a hong kei thuia ati, thui rakro, han Pitar a kut an khit thirruingai ha a kan likverjui,

⁸han thaneithiang in ama jiang a ti, “kan sin in lang na kekok chuongro.” Pitar ning hangan atho a, han thaneithiang in a ti, “Napuon nadiar sin in lang na juiro.”

⁹Han a man a hong suak anuk ajui jui, thaneithiang in itho chuan ha jet luia hivahi mun akhat kimuke tia alui ngaidon.

¹⁰Anmanin arapale anni chang na ralmi ning an ngak kot ha an hong khel la, khopui tung na thirra an sin kot ha an hong tung pha han, anmani ranga ani ninga a kan longjui, lam khat an hong lon na jet lui thailuija thaneithiang in ama ha amak jui.

¹¹Han Pitar ning a hong jet a hong ti, chong tak balla ka jet jui tiko, Puma ning ama thaneithiang ha a hong tirra keihi Herod a kutchung tenna le Jiwngain an ngaidon lungdo tenna a na sanjui.

¹²A man a ngaidon na, Johon a nu Meri, Mark om anti ama inna a hong jui, hava han mitam ning an kan chun na lam na an lui nei,

¹³Pitar ning inn khar ha akilla, han Roda anti suoknu khat in long ranga a hong.

¹⁴A man Pitar rashake tihi a jet karra in ha longluija a ning asat reija, a tan na Pitar ha kotkunga a ngirra a om a hong tipejui.

¹⁵Anmanin ama jiang anti, “Navetjui”, tak-ha a man adik ke alui ti, anmanin anti, “A ma a thavang ani rang ke.”

¹⁶Tak-ha Pitar ning inn khar ha akilla alui om, han anmanin an hong long pha Pitar ha an mu karra an ngak banjui.

¹⁷A man a kut om chianru tia manjetna a neia Puma ning ijamo ama ha ren inn tenna ava keisuak ha a ripejui, hivahi Jems le a takngai ulenaingai jiang riperu a ti, han a man a suak a dang mun khat a che jui.

¹⁸Khuo a hong var pha han Pitar jiang isuak chuan jarra, ral mingai anmasia a tam tak a ngakpa alui suak.

¹⁹Han Herod ning Pitar ha a tok mulaimak, ralmi, hava inn ngak ngaiha chongtan na a nei a anmani ha that ranga chong apejui, hava suale Herod in Judia a mak Sisaria han a pha bongkhat a hong om jui.

²⁰Herod in Tair le Sidon mingai jiang a tam alui rang, han anmanin rup khat jak anluichanga ama ha kan mu ranga an lui hong, tak-ha a rapa reng chang kual ngak a ming Blastas ha man an kan mu puia ama ning om anasanthei tihi an jet, han anmanin reng jiang an honga lunghip na rang an hong ri ajarko anmani ram sunga a om mirakip nek le chak hi rengpan a ram tenna a hong pek ani.

²¹An kan jot na nikhuo khat rengin ama reng puon atianga, reng ong na han a onga, mingai jiang chong alui ri,

²²han mitamngai ning an hong khek, “Pathian rasake, mi rasa nimak.”

²³Han a man Pathian ha chitlejak a nei mak jarra Puma Thavang Thiang ning ama ha avelumma, hava mun han alarung ning an chak a thi jui.

²⁴Tak-ha Pathian chong ha ko khel la an hongria a hong lianme menjui.

²⁵Barnabas le Saul ning an chuan ha an torra Johon nom anti Mark ha an hong kanruaipuia Jerusalem tenna an hong kir jui.