Read Aimol TIRLON 13 Bible Online

TIRLON 13 - Aimol bible

TIRLON 13

¹Antiok biakrup sunga Pathian tashanthei le Oja lui chang Barnabas. Simion Niger om anti lusia Sairania a hong, Manian, Herod rengpa vaihomlian sunga han Saul an lui om.

²Anmanin Pathian chuan an tho va bu han ngeipha Thavang Thiang in anmani jiang a ti, “Barnabas le Saul hi chuan tho ranga kein ka kui jui hiva jarra anmani hi kei ranga na khuisen peru.”

³Hava pha han anmanin bungeija lam na an neija, anmani chunga an kut an tet pe va an tir jui.

⁴Hinga hin Thavang Thiang in Barnabas le Saul ha a hong tir ani jarra Silusia tiang an hong chumjui. Hava tenna veikhat Saipras tuichung tiang rokuang an chuanga an hong jui.

⁵Anmanin Salamis an hong tung pha han Jiwngai biakrup om na om na a Pathian chong an lui ri, han ansap chang pui ranga Johon om alui kan chel.

⁶Anmanin tuidung rakip an hong kan na, Paphos an hong tung, han anmanin mit peal doi kandai Barjisu Jiw nai Pathian tashanthei om kani ikanti ha an lui kan mu.

⁷A ma ko tuidung vai hom lianpa Sergius Paulus miching mithei sap khat alui ni, han, tuidung vaihom lianpan Barnabas le Saul ha akuia Pathian chong ha alui ngai jot.

⁸Tak-ha anmani ha mit rang theipa Elyma Grik chonga hivahi a ming hi ning tuidung vaihom lianpa takngai na ha aletiang lam man ngai na ranga alui tho.

⁹Han Saul om anti Paul ha Thavang Thiang in a sip mit rang theipa jiang a hong en chiak;

¹⁰a hong ti, “Nang, Seitannai nang ko adik rakip le a kan enda nani, hale a satlui chuan jak kandai om na ni, han Puma adik lam ha ale lam tiang kairuai hi nibang lui rang mo?”

¹¹Enro; a tun Puma kut in na chunga om na mit jingnata a pha bongkhat hi avar mu noniche, hava lai tak han a mit ha a hong jinga ama ha keiruoi ranga mi an hongtok.

¹²Hava han ama imanchu oja ha ning i suak chuan ha a mu karra Puma ning imanchu na ha alui ngak banna takngai na a nei jui.

¹³Atun Paul le i kan ruaipui mingai ha ning rokuang an chuanga Papho tenna Pamphilija Parga tiang an hong jui. Tak-ha Johon ningko anmani ha a mak Jerusalem tiang ahongkierjui.

¹⁴Anmanin Parga an hong kan na Pisidija Antiok han an hong tunga anmanin sernikhuo nihan Sainagok an lut an om jui.

¹⁵Hale dan chong le Pathian tashantheingai rabu ha apasuava Sainagok Ojangain an hong tirra an hong ti, “Ulenaingai mitam ranga ma thok na chong na nei inko na riperu.”

¹⁶Han Paul in a ngirra a kut adomma a hong ti, “Israel mingai le Pathian chitngai, na ngai peru;

¹⁷Israelngai Pathian ha ning kan pa kan pungai ha athang suak hale Ijip ramma khual mi anga an om lai anmani ha lian na seina amanneia, a man anmani ha ranak neia a hong kei suak.

¹⁸Han anmani ha ramtong lianna kum sommanli alui om pui,

¹⁹Hale a man kanan ram sunga a om jat sari ha a manmang verra an ram ha anmani ram ranga kum reamanlile somranga khan na alui pek.

²⁰Hava suale chongtanngai ha Pathian tashanthei Samuel pha han alui pek.

²¹Han anmanin reng khat hi an lam ma, Pathian ning Benjamin phung sunga mi, Kish a nai Saul hi anmani jiang kum sommanli ranga a pek jui,

²²Pathian ning a maha veikhat athon khirra, anmani reng ranga David ha a hong man suak jui, han a man ama ruia chong shakhi pek na a neia a ti, “Jesse a nai David, kein ka mu jui, a man ka lungdo rakip tho nati.

²³Hiva mi vonchoi sunga Pathian ning Israelngai san ringpa Jisu ha a chong shan nuk jui a a hong man suak.

²⁴A man a hong makma, Johon ning Israel mirakip jiang lungthulla tuija baptais tho ruia alui manchu.

²⁵Johon ning a chuan ha a tor tiang a hong ti, nang nin keihi tumo tia nan na ngaidon? Kei ko ama ha ni making, hale kanuk ihong rang ama kekok not rang om ka rahui chang mak.

²⁶“U le naingai Abraham vonchoi sunga Pathian chitlejak nei mingai tanringna chong ha keini jiang a hong tir jui.

²⁷Ajarko, Jerusalem sunga a om vaihom mingai ning ama ha san ringpa ke tihi jet ma u, hale sernikhuo hin ani tin tashanthei rabu an pa ham bhap tamau, hiva jarra ama ha siatna anmanneia tashanthei chong ha an mantungjui.

²⁸Anmanin amaha that na rang khan na a siatna an mu mak innom, Pilat jiang that na ranga an lamjui.

²⁹Han ama ruia an lui jiak rakip ha anmanin an man tung suale Khros chung tenna an masuma thanna an phumjui.

³⁰Tak-ha Pathian ning ama ha athingai tenna aman ringkhir jui.

³¹Hale a male a hong kanruaisom Galili tenna Jerusalem tiang ahongngai jiang nikhuo tam tak a man kan mu, anmaningai ha ning a tun nom mingai jiang shakhi anlachang.

³²Kan pa kan pungai jiang chongtan na lui nei chongsat chong lui ha kein in nang ni jiang kan hong choi.

³³Tiko, Pathian ning Jisu ha a man ring khirra, keini kan naingai jiang a man tung jui, hi ang hin anni chang na. La rabu han hinga hin a kan jiak, “Nang ko ka pasalnai nani, ve enni ka na nei jui.”

³⁴A man ama ha athi ngai tenna a man ringkhir jui, veikhat ama hi than sunga om lai noning, a man hingahin a ti, “Kei ning nang nijiang David a thiang na hale takngai rang suak ha ka na pek rang ke.”

³⁵Hiva jarra a man a dang La rabu han nom a ri, nang in, nang a thiang na suak ha than sunga man omno niche,

³⁶Ajarko David ning a om lai han Pathian lungdo chuan ha a sin na, hale a thi jui, han a pa apungai kolla an phumjui, than sunga a om thengjui.

³⁷Tak-ha Pathian ning iman ringkhir ama ha ko than sunga om thengmak.

³⁸Hiva jarra ulenaingai, nang nin na jet peru, hiva mijarra siatna ngaidam na nang ni jiang a om.

³⁹Hiva jarra Mousi chongdan han nang ni ha na masua tor mak tak-ha hivami jarra nang ni ha irakip tenna masua na a om.

⁴⁰Hiva jarra kan ning theiru, Pathian tashanthei rabu iriha nan chunga chul mak na rang,

⁴¹Enru; nang ni taktelluingai, ngak om ngakru, thi om thiru, ajarko, kein nang ni jiang ve enni chuan khat ka tho, hivahi tu ang khat in nang ni jiang an naripe innom takngai noni che u.

⁴²Han anmanin an hong suak phan, mitamngai ha ning anmani jiang chongngai hi a hong rang sernikhuo ni han na riperu tia an lui ri.

⁴³Sainagok sunga an kan chun ha an tor le Jiw a tam lam le anmanin an jui Pathian ngaidon ratngai ha ning Paul le Barnabas nuk an jui jui.

⁴⁴A hong rang sernikhuo ha a hongni pha han, hava khopui sunga om mitam lammin Pathian chong ha ngai na ranga an hong kan chun jui.

⁴⁵Tak-ha Jiwngain mitamngai ha an mu karra an enlalla, Paul ning iri chong ha an shanga an lui ran.

⁴⁶Han Paul le Barnabas ning thauna sat an ria an hong ti, nang ni jiang ke man Pathian chong hi ri rang a suak, tak-ha nang nin nan kan jet amongtibui ring na tum ranga suak mak tihi hiva jarra enru keini ko a dangjat mi jiang kan che jui.

⁴⁷Ajarko Puma ning keini jiang a ti, kei ning nang ha a dangjatngai ranga var chang ranga le ramuol a torna khan na tanringna mu na ranga ka na siakjui ke.

⁴⁸Jatdangngain hiva chong an jet pha han Pathian an manpak an ning a satjui. Han amongtibuija ring na ranga mirakip in tak an ngai jui.

⁴⁹Pathian chong ha hava ram sunga a om rakip jiang an semjui.

⁵⁰Tak-ha chitlejak an nei numeingai le khopui sunga om pasalngain Paul le Barnabas ha Jiwngain hava mun tenna, an not chaijui.

⁵¹Han anmanin an kedir ha ankhong thak a anmanin Konija tiang an che jui.

⁵²Thiamruoingai ningsat nale Thavang Thiang in aluisip.