Read Aimol TIRLON 15 Bible Online

TIRLON 15 - Aimol bible

TIRLON 15

¹Tak-ha Judiahin mi alek an honga, Mousi dan nukjuia vuntan nan tho mak inko ringnahi muno ni che u tia ulenaingai jiang anmanin an lui manchu.

²Han Paul le Barnabas ning anmani le chong kan kherna atam tak uneia hiva chong kan kher jarra Paul, Barnabas le anmani karra mi aviar le Jerusalem ma a om thiamruaingai le Ulianngai jiang va kan biakna ranga an thangjui.

³Anmani ha biakrupngai ning antira hangan an hong lonna Phonisija le Samarija an hong kan na an lon chunga a dangjat mingain an lung an thul naha chongthai an jek ulenaingai jiang ningsat na tam tak an lui man nei.

⁴Anmanin Jerusalem ma an hong tung han, biakrup mingai tirlonngai le ulianrupngain an lui don, hale anmanin Pathian ning a kan ruaipuija chuan i tho pe na rakip ha an ripejui.

⁵Tak-ha Pharisingai takngai karra rup a lek ning an thuia an hong ti; “Anmani ha vun antan rang hale Mousi dan chong ha anjuirang a suak tia chong pekru.”

⁶Tirlonngai le ulianrupngai ha hiva chong kan biak ranga an kan chun jui.

⁷Aphat sot tak an kan biak han, Pitar ning a ngirra anmani jiang a hong ti; ‘ulenaingai, a dangjat mingain ka bai suatenna an phut asat chong hi an jet le takngai na an nei na rang, man lai han Pathian ning nang ni kar tenna an phut keihi ana thang suak tihi nan jet.’

⁸Mi lungdo a jetor Pathian ning keini jiang i lui tho ang han, anmani jiang om Thavang Thiang ha a pek shakhi a chang jui.

⁹Takngai na an nei jarra ansiatna ha ngaidam na a nei, a man keini le anmani ha i om na man kan khel mak.

¹⁰Hiva jarra a tun hin kan pa kan pungai le keini ning om kan choi torlui phur ha thiamruaingai ringa man pelrang nanti, iruija mo Pathian ha nan la en sin?

¹¹Tak-ha Puma Jisu manrit na han keini le anmani le na san ring nati tihi takngai na kan nei.

¹²Han a kanchun mitamngai ha an omchianna, Barnabas le Paul jiang Pathian ning a dangjat mingai jiang tetana le angakpa chuan ithope na han anmanin anmani jiang an ripe ha an luingai.

¹³Anmani chong ha an ri suale, Jems ning a hong shanga a ti, “U le naingai ka chong hi na ngaidiru.”

¹⁴Simon ning arijui, hako, Pathian ning ama a ming ha a dangjat mingai jiang choi rang miha a masat anmani kar tenna a kui suokjui.

¹⁵Hava ha ko tashantheingai chong le a kan ang, hingahin a kan jiak;

¹⁶Hiva suole kein ki hong kir rang hale David om na a kiak jui ha kein vei khat ki sin khir rang ke, hanna alui mang rakip ha kein sinkhir kata ki mandet rang ke.

¹⁷Han ala om miringngain Puma ha natok na rang, hale kei ning ka kui jatdang mingai ham.

¹⁸A tuan lai tenna hiva rakip alui jet Puman a ri;

¹⁹Hiva jarra kei ka lungdo ko hike ani, jatdang mingain Pathian jiang an hong kan hei kein in anmani ha man pong ma rei.

²⁰Tak-ha, anmani jiang hinga hin tinnang chongsan che thuonrei, nang nin kut an sin Pathian jiang an khat rakip le tak kan chur torlui, hale kan khit that shale thi sen rakip havangai tenna a lak a omru.

²¹Ajarko Mousi dan chong ha khuo rakip Sainagok om na mun han sernikhuo han aluipa, hale ama chong pek ha khopui rakip an luisem.

²²Han tirlonngai le ulianngai hale biakrupngai ning an kanchun na, anmani karra pasal anni thang suak in lang, Antiok, Paul le Barnabas kan ruaia tirrei an luiti; han anmanin takngai mi anni Juda om anti, Barsabas le Sailas hi an thang suak jui.

²³Han athuaia chong ramalngai hi le anmani ha antierjui, ulenaingai keini tirlonngai le ulianrupngai ning; Antiok om, Sairia le Silisia a om jatdang mingai chubei kannabuk.

²⁴Ajarko, kein in kan man chu a kan hong tir ni lui, keini kar tenna mi a lek in nang ni jiang an honga, chong jat jat an ri han nang ni nan lung an man kan thul jeljui ti a chong kan jet.

²⁵Hiva jarra kein in kan kanchun na kan kan jot na nuk juia an thang suak mingai hile kan lungsiat Barnabas le Paul kan ruaia nang ni jiang hong tir rang hi sat nati tia kan ngaidon.

²⁶Anmani ha kan Puma Jisu Khrista ranga an ringkhuo kan pek mi anni.

²⁷Hiva jarra Juda le Sailas hi kein in nang ni jiang kan vatir, hale anmanin nang ni jiang om chonga na ripe de nanti u, hiva kan na vathuan chongsan che hin.

²⁸Ajarko, hiva kan kan jot na chongngai hi niluia a dangngai ha nang ni jiang phurrikna anga pek lai ma rei tia kan kan jot jui.

²⁹Hava jarra, kut a sin Pathian jiang an khat rakip, le thisen hale ani ninga kan khit that sha, chak maru; hale lung kan chur torlui rakip tenna a lak omru, hiva rakip hi nang nin asat nan tho aninko nang in iranga asat ha ninati, “Nang ni jiang a hui ha ni rase.”

³⁰Hiva suale anmani ha an tir jui, han anmanin Antiok an hong tunga, hale mitam ha an kui khomma chongsan che ha an pe jui.

³¹Han anmanin hava chong ha an pa karra mitam ha ning ningsat na an lui nei, ajarko, hava chong ha lung mathokna alui ni.

³²Hale an tak in tashanthei om anni Juda le Sailas ning ulenaingai jiang chong tam tak an ria anmani ha an mathok an lung an lui manrat.

³³Hava mun han anmanin pha bongkhat an om suale hanna a om ulenaingai tenna anmani ha an va tir pungai jiang ahuia an mankirjui.

³⁴An ninnom, Sailas ningko han om tot rang hi a ngaidon.

³⁵Tak-ha Paul le Barnabas ning hava mun han an om ma, a dangngai le an kanruaia Puma chong ha an lui ripe.

³⁶A pha bongkhat a theng suale Paul ning Barnabas jiang a ti, “kein in Puma chong kan lui rina khopui rakip han che in lang ulenaingai ha ijamo an om ha veikhat va en retrei”.

³⁷Han Barnabas ning Johon Mark anti ha alui tuong de jot,

³⁸Tak-ha anmani le kan ruaia chuan rakip tho jot lui thasiat Pamphilija tenna alui vakir ama ha Paul ningko lui tuong jot mak.

³⁹Hinga hin anmani karra kan jot luina a om ma khat le khat an kan senjui, han Barnabas ning Mark ha a tuanga Saipras tiang ro kuang a chuanga a che jui.

⁴⁰Tak-ha Paul ning Sailas ha athang suak ulenaingai ning anmani ha Puma manrit na han chong bena an neija, han anmanin an che jui.

⁴¹Han a man Sairia le Silisia a om biakrupngai tiang ahonga asat a mandetjui.