Read Aimol TIRLON 17 Bible Online

TIRLON 17 - Aimol bible

TIRLON 17

¹Anmanin veikhat Amphipolis le Apolonija an rothenga, Jiwngai kan chun na inn khat om na Thesalonika hin an hong jui.

²Paul ning ama balam anga anmani jiang achea hapta thum khan na rabu sunga i om nuk juia chong kan kherna alui nei.

³Hava rabu sunga i om chong ha ama lepe va Khrista ning pong khodengthei a duija, hale thina an phut ringkhir nati, han kein nang ni jiang ka ri hi Jisu ha Khrista ke ani tia a thianga alui ripe.

⁴Hava mun na a om anmani karra Pathian oi Grikngai karra a tam lam hale numeirup karra han nom atamlamin Paul le Sailas chong ri tak anngaija an maninuk an jui jui.

⁵Tak-ha Jiwngain an enlalla, mitamngai karra sin rangbui misatmak ngaiha an kuija, an kan chun puia, khopui ha an man kannok jui. Anmanin Jason a inn sunga an hong lut Paul le Sailas ha mitam madonna keisua rang ha an lui tok.

⁶Anmanin Paul le Sailas ha mu mau han Jason le u le naingai ha khuo sunga achong che vaihomngai mai kunga an kuija, an hong khek, “Hiva mingai hi ning ramuol hi an mankanlet tun kan khuo hin nom an hong.”

⁷Anmani hi Jason ning an inna a siak hale Jisu anti reng dang khat a om antia anmanin Kaisar rengpa chong pek hajui ma u.

⁸Han na a om mitamngai hale khuo sunga vaihomngai ha ning chong ha an jet karra an lung a thakjui.

⁹Han Jason le ulenaingai ha khuo sunga a chong chengai ning jaminna an ma sua jui.

¹⁰Hale ule naingain Paul le Sailas ha jan na Berija hina an man che jui. Anmanin hava mun ha an tung pha han Jiwngai kan chun na inna an lut jui.

¹¹Hiva mingai hiko Thesalonikangai nek aviar an sat, ajarko anmanin man kan ching tak chong ha an ngaija hivahi chong tak balmo ani tia rabu ha an lui tok.

¹²Hiva jarra anmani karra Grik numeingai le pasalngai a tam lammin takngai na an nei.

¹³Tak-ha Thesalonika hina a om Jiwngain Paul ning Berija va Pathian chong arijui tihi an jet karra anmanin an honga mitamngai ha an sathuija helebai an man suak jui.

¹⁴Hava phalai tak han ulenai aviarin Paul ha tuidung suak na rang lam han an machejui. Tak-ha Sailas le Timothi ko Berija hin an om jui.

¹⁵Aninnom ama hong thak mingai han Athen tung khan na an hong tuang jui. Hale Sailas le Timothi ning ama jiang a rak an hong na rang chong abea an kir jui.

¹⁶Paul in anmani ha Athenna a ngak lai han, a man kholai dunga a chai pha han kut sin Pathian ning a sip ha a mu karra a lung hui lai mak.

¹⁷Hiva jarra a man Sainagok sunga Jiwngai le, Pathian oi mingai le an khat om kaithialla ikanmupui mingai le a nitin chong kan kherna alui nei pui.

¹⁸Hijak niluia Epikura le Stojingai ching na thei na mingai le chong kan kherna aluinei. Mi alekning an hong ti; “Amur imanchokjel ha ning imo irijot?” Adangngai ning an hong ti, mi ramma Pathian ruia chongringai om a pua, ajarko a man Jisu an khat om ringkhir ruia a ri.

¹⁹Han anmanin a maha arijopa khopui vaihom kan chunna han an hong tuanga anti, “Nang in a thar khat nimanchu hi keinin jet mo jot nati?”

²⁰Ajarko nangin keini kuarra ijang mokhat na namanjet, hava jarra chong hi itinamo kan jet jot.

²¹Han Athen na om mingai le ram danga khuol mingain chongthar an ri animakle an ngai hivajak hi an chuan an man changa, a dang ite khat sinluija om hi an dei.

²²Hava pha han Paul ning arijopa a lai tak han a ngirra a hong ti, “O Athen na om mingai, nang nin irakip Pathian don nan rat tihi kein ka jet.”

²³Ajarko kei ning hinga ka honga, nang ni chubeibuk na mun ka en na, nan chubeibuk kan bolna achung han “Jet lui Pathian jiang” tia ani ha ka mu, hava nan jet mak nan chubeibuk tak-ha kei ning nang ni jiang kari ani.

²⁴Ramuol an khat om a sunga i om rakip a sin Pathian ha ning vanram le ramuol Puma ini jarra, kut an sin biakinna om mak.

²⁵Hale ama a nei mak khat a om jui tia miring kut ning asepa an tho om mak, ajarko a man irakip ring na rang thavang, phuksan na rang phaivou hale phur rakip ana pek.

²⁶A man miring khat tenna miring jat rakip ning simlei chunghin om na rang a na sinpejui, hale a man miringngai ringkhuosei a pha, an khat om an om na mun a na sinpejui.

²⁷Hiva jarra anmanin Pathian ha ija mo khat anga an tok kan mu rang ke tia an ngaidon, anin nom ama ko keini tenna a lak om mak.

²⁸Amajianga keinin kan ringa, sing kan sat kan om, ani, nang ni nan karra chongsat keisuathei tu ang khat in hingahin ati, ajarko keini ama a naingai kan ni.

²⁹Ajarko keini Pathian nai ha kan ninko Pathian chang ama ha ko keini miringngai chingna theina va kan lungdo a kan sin sana, ruphai, lung an in nom ha vangai ang han a pua tia kein in don nonising.

³⁰Hiva jarra kan lui jet maklai pha han Pathian ning nalui mumak, tak-ha, a tunko mun rakip a mirakip lung thul na rang man chong pek na ana nei.

³¹A man ithang suaksa pasal an khat in ramuol hi adik chongtan na rang nikhuo an khat akhiakjui, a maha athi ngai kar tenna a man ring khirra mirakip in ama ha takngai na ranga ana pek jui.

³²Hava han athinga hin an ringkhir tia chong ha an jet karra, hanna a om alekin an hongnuiso tak-ha a lek inko anti, “Hiva ruia veikhat keinin kan la ngai ret rang ke.”

³³Hinga hin Paul ning anmaningai kar tenna a suak jui.

³⁴Aninnom mi alekinko ama le an kan top tak an ngai jui, takngai neingai karra Arejopa tenna ahong Deonisia Damari anti numei an khat hale a dangngai om an lui kan chel.