Read Aimol TIRLON 2 Bible Online

TIRLON 2 - Aimol bible

TIRLON 2

¹Pentikos nikhuo a hong tung pha han anmanin mun khat hin an renga an kanchun laitak,

²han jet lui thailuija chungvan tenna han phaivuo ngartak ang han a ranga, an om na inn ha a sip pet jui.

³Hava suale lei anga mei lom ning anmani jianga an thei theia an chunga a om ha an mu jui.

⁴Han Thavang Thiang ning anmani ha a ship, Thavang ning imanrijot nuk juia anmanin chongdang ri an hong phutjui.

⁵Vanram thuaija a om jat rakip karra Pathian oi Jiw pasalngai ha Jerusalem han an lui om.

⁶Mitamngai hava rasa an jet pha an hong kan chunna, an ngak banjui ajarko, an ria anmani anmani chonga an lui jet,

⁷han anmanin an ngak banna an hong ti, mingai hi Galili mi mo nima u?

⁸Kei nin ijarra mo kan chong kanchonga kan jet hi?

⁹Parsia, Media, Elamahit Mesapotamia a om Judia, Kapadosia a om Pontas le Asia,

¹⁰Phrijia, Pamphilija, Ijip, Libia ram sunga a om Sairenia, ram ma a om khuolmingai le Jiw nun chan lui,

¹¹Kreta le Arabia, kein in Pathian chuanlian hi kan chong kanchonga kan jet,

¹²han mirakip ning an lunga donga an ngak banna an hong ti, “Hivahi inun chan mo?”

¹³Tak-ha a dangngai ning nuiso an hongti, “Anmanin juran ha anin phetjui.”

¹⁴Tak-ha Pitar ning somleikhatngai le a ngirra, rasa ring tak anmani jiang a hong ti, “E Jerusalem ma om Jiw mingai, nan kuor do nang hivahi ngai le kan ruaia na jet peru.”

¹⁵Ajarko, nang nin nan ngaidon anga anmani hi ju anrui nima, jingtiang pha dan kua jak alani.

¹⁶Tak-ha hivahi Pathian tashanthei Joel ning aluiti ha ani.

¹⁷Pathian ning a ti, a torna nikhuo han hivahi ni nati, kei ning mirakip chunga ka Thavang ka hong bunthuan rang ke, hale nan pasalnai nai le numeinaingai ning kei ka chong ri nanti u, hale riatharngain anlungmit mu na nei nanti u, atarngain mang phal nanti.

¹⁸Ka suakpa le ka suaknungai chunga hava nikhuo han ka Thavang ka hongbun thuan rang ke, han anmanin ka chong ri nanti u.

¹⁹Han kei ning vanram tianga angakpa chuan ka tho rang ke hale ramuol thuaija jetna, tiko thisen mei hale meikhu a suak ha man mu kati.

²⁰Puma nikhuo lian tak ha a hong mak ma simni jing nati, sortha ning thisen chang nati.

²¹Hava pha han Puma ming a kui mirakipngai ha san ring nati.

²²E, Israel mingai chong hi ngairu, Najaret Jisu ha Pathian ning nang ni karra a ngak pa chuan le jetna a man tho a, han a mahi Pathian ning i jot mi ke tiha nan tak khetin nan jet.

²³Hiva Jisu hi Pathian ning a lungdo nuk juia a man sat sale alui jet sa nuk juia an pek jui, nang nin dan chong jui lui mingai kutchunga nan pek khros chunga an that jui.

²⁴Tak-ha Pathian ning amaha khodengthei athina an phut aman ringkhir jui, ajarko ama ha thina ning tor mak.

²⁵Ajarko ama chung changa Daniel ning hinga a ri, kei ning ka puma pha rakip ka madonna ka luimu chak, ajarko ama ka chang tiang a om hava jarra kei khodengthei na nei noning.

²⁶Hiva jarra kei ka lung atai, hale kei ka lei ningsat na anei, hiva khel la ka taksa hi ngaidon theia om rang kani.

²⁷Ajarko nang nin ka Thavang ha simlei tharsari sunga napai noni che hale nang in a thiang khat ama ha khodengthei a man mu noni che.

²⁸Nang in keihi ring na lam na na manjet jui, na na om puia keihi ningsat na ha na man nei rang nani.

²⁹U le naingai kapu Daniel chung changa a thiang tak kiri rang ke ani, ama athia an lui phumna a than ha ve enni tunga keini jiang ala om ani.

³⁰Hiva jarra a man Pathian tashanthei khat anija, ama vonchoi sung tenna an khat in ama reng ong na chunga ong nati tia Pathian in ama jiang shakhi an khat alui tho pe ha amanajet.

³¹A man hivahi man lai alui mu va Khrista ning a ring khir na ruia alui ri, tiko amaha simlei tharsari sunga peilaima, hale ama taksa ning khodengthei na mulaima.

³²Hiva Jisu hi Pathian ning a man ringkhir jui hiva jarra keini kan renga shakhi ha kan chang.

³³Hiva jarra Pathian kut chang tiang han a dom mansanga hale Thavang thiang ka na pek rang ke tia shakhi alui pek ha a pa tenna a mua, nang nin nan mu le nan jet hi a man i hong bun thuan ke.

³⁴Ajarko David ko vanram ikal nimak; tak-ha amatak in a ri Puman ka Puma jiang a ti, ka chang tiang ongro.

³⁵Kei ning nang a na enda ngai ha na ke sirna thuaija ka siak maje,

³⁶“Hiva jarra nang nin Khros chunga nan that Jisu ha Pathian ning Puma le Khrista a man chang jui tihi Israelngai insung rakip in a thianga jet rase u.”

³⁷Atun anmanin hivahi an jet karra, anmani an lung ha a tok reija, Pitar le thiamnaingai jiang an hong ti, “E, U le naingai, keinin imo kan tho rang?”

³⁸Pitar ning anmani jiang a ti, nan siatna thiang na ranga, nan lim man kan sirru, hale Jisu Khrista minga nang ni rakip ning baptais thoru, han nang nin a thiang Thavang kutchoi nan mu rang ke.

³⁹Hiva jarra nan naingai an khat om keini kan Pathian kan puman a kui rang a lak tak a omngai rang om ani.

⁴⁰Han a man chong tam tak a ria anmani ha amathok shakhi a pek a hong ti; hiva milungsalui miruolngai tenna nan thei, “Nan theia kan san na thoru.”

⁴¹Hiva jarra ama a chong ri alui rakip anmani ha baptais a man nei; hava nikhuo ni han mi lising anthum duk an lui kan chun.

⁴²Han anmanin thiamnaingain an man chu ha an kan chun na, tal chak suamna le lam na pha rakip an lung alui lut.

⁴³Mirakip lung sunga chitna alui suak, hale a ngakpa jetna a tamtak thiamnaingain an lui tho.

⁴⁴Hale a takngai rakip in an kanchun na an phur rakip ha an manchun na mitam ranga an nei man.

⁴⁵Han anmanin an nei an nei ha an juorra, tu ang khat nem na nuk juia an lui sem pe.

⁴⁶Anmanin biakinn na anitin lung khat tak khat an changa an kan chun chak, hale an inn an inn na lungtai hiaija le ningsat a tal an lui chak suom.

⁴⁷Han anmanin Pathian an manpak an lui om, mirakip an lui kan lungsiat, hale sanring na a mungai ha Puman a nitin an karra a man kan chel pede.