Read Aimol TIRLON 21 Bible Online

TIRLON 21 - Aimol bible

TIRLON 21

¹Keinin anmani ha kan mak rokuang kan chuanga Kos tung na ranga lamtunphit kan honga hava nikhat suale Roda kan tunga hava suale veikhat Patara kan tung jui.

²Hava han Phonesia tung rang rokuang kan mu keinin hava kan chuanga kan che jui.

³Hang an keinin kan hong pha Saipras ha kan mu keinin veitiang kan mak han rokuang dang khat kan chunga Sairia tiang lam kan honga Tair khova kan va tung jui.

⁴Hava han thiamruaingai ha kan kan mu nikhuo sari khan kan om jui, anmanin Thavang Thiang ranak Paul ha Jerusalem ma chemak na rang an hong ri.

⁵Han kan nikhuo ha a hong kip han ko kan che jui kein in kan va suak kan khual lon ha kan phut pha han; anmani an renga an lomnu le an naingai ha an honga keini ha khuo sung varal tenna an na lui hong thak, hale tuikuong sirra kan khup kan bilinga lam na kan lui nei; keini khat le khat kan mathanna chong ha kan lui ri.

⁶Han kein in rokuang ha kan hong chuangjui hale, anmani ko an inn lam ma an kanlejui.

⁷Keinin tuionglian chunga kan che ha kan torra Tair ram ma om Tolemaja khua kan hong tung jui; han kan u kan naingai ha chubei kanbuk anmani le nikhat kan lui om.

⁸Khua a var le keinin kan suak Kaisaria hin kan hong jui; hale miring sari sunga ankhat ha chongsat ripu Philip inn na an lut ama le an om jui.

⁹Hiva pasal hi ning anai dongma manli a nei, anmani ha Pathian chong lui ri an luini.

¹⁰keinin hava mun han nikhuo aviar kan om lai; Judia tenna Pathian chong ri Agaba, anti khat ha alui hong chum.

¹¹Han a man keini kol la a honga Paul akongkhit ha aluia ama ake akut a khit a hong ti; Thavang thiang in hingahin a ti; “Hiva kongkhit neipu pasal ha Jiwngain Jerusalem ma hi ang hin khitnanta a dangjat mingai kut chunga a mahi an pek rang ke.”

¹²Han kein in hava chong ngaiha kan jet karra, keini le hava mun na om mingain a maha Jerusalem ma chemak na ranga kan lui ri.

¹³Hava pha han Paul in ana hong sang, nang nin nan chap ankhat om kei ka lung nanmansin hi iruija mo? Ajarko Puma Jisu ming jarra Jerusalem ma an na khit jak ni lui a thina rang khan nom kei ka kan ning jui.

¹⁴Kan mathem ha a man jot lai mak, kein in kan banga kan ti; “Puma ama lungdo ha nita rase.”

¹⁵Hiva nikhua suale kein in kan phur kan thok Jerusalem ma kan che jui,

¹⁶Han keini le kan che som Kaisaria tenna thiamruai aviarr om an kan chel, anmanin keini tung na ranga man lai thiamruai kan lui chang suam Manason anti Saipras tenna ama inna an na tuang jui.

¹⁷An khat om keini Jerusalem ma kan hong tung han ulenaingain keini ha ningsat an na luidon.

¹⁸Khuo a hong var le Paul ning keini le kan ruaia Jems jiang a na chepui, hava han a tar a turngai om an lui kan chel.

¹⁹Hava han a man anmani ha chubei a buk, a dangjatngai jiang a man Pathian chuan a sin lai han Pathian tho torna iman nei rakip ha adodonna alui ripe, hava chong ha an jet karra Pathian ha an lui manpak.

²⁰Han anmanin ama jiang an hong ti; “kan u kan nai nang nin nan mu; Jiwngai karra takngai mi lising lising an la om, anmani rakip in dan chong pek hava jarra an lung alalut.

²¹Anmanin nang naruia an ri, tiko a dangjat karra an om Jiw rakip jiang nan naingai ha vuntan man tho maru, kan che na balam han man tho maru; hale Mousi chong pek ham jui maru tia na manchu anti.

²²Hiva jarra imo kan tho rang ajarko nang na hong jui tihi jet rang anni.

²³Hiva jarra kein in nang jiang kan na ri imo khat na thopero, an tak in chong sam na an nei keini karra pasal manli an om.

²⁴Hiva pasalngai hi tuong in lang nang le anmani le nan tak hongman thiangru. Anmanin an lu ha an mankok na rang i lut rang rakip ha nang in kei suaro; nang naruia anmanin an lui ri adik lui ke tina rang ankhat om na tak in dan chong pek ha asat na jui tiha anmani rakip in an jet na rang ani.

²⁵Aninnom jatdangngai karra takngai mingai ranga, an chena rang omchan kein in kan tir jui tiko; kut sin Pathian jiang an kat phur, thisen chak, a kan khit that a thisa a salui lungdo nei hiva rakipngai hi tho maru tia kein in kan tipe jui.”

²⁶Khuo a hong var le Paul in pasalngai ha a tuanga anmani le kan ruai a an tak an hong manthianga, anmani rakip ranga kat rang phur ilut rang rakipngai ha nikhuo ijata mo an tor rang ti ham jet thei na ranga Pathian biakrup sunga a man a lut.

²⁷Nisari chang na a tor tiang han Asia tenna Jiwngain ama ha Pathian biakrup sunga an mu, hale mitamngai ha anmasiat an hong khek.

²⁸“O, Israel pasalngai” na sanru, ajarko a mun rakip keini mingai ha dan chong pek le hiva a mun hi a eshella mirakip ha imanchu miha hiva mi hi ani; hijak ni luia Grik mingai ham hiva a thiang mun hin a va tuanga imanchok.

²⁹Man lai han anmanin Ephesia mi Trophima le a kan ruaia khopui sunga an lui mu, hava jarra Paul in a maha biakrup sunga a hong tuang tia an lui ngaidon.

³⁰Khosunga a om mirakip ha an kannok jui mitamngai ha an hong tanna Paul ha an hong churra Pathian biakrup sung tenna phut a maha an kei suak jui, hale suang rakip ha an kharjui.

³¹Anmanin ama ha that na rang an tok lai han, Jerusalem pumpuia an kannok jui, tihi ralmi rup karra ulianpa jiang chong ha a hong tung jui.

³²A man a rak tak ralmi reakhat neipu ral mingai le hava mun tunga an hong tan jui, hava pha han anmanin ralmi ulian ral mingai ha an mu na khan ko Paul an ve ha an bang jui.

³³Han ralmi ulian ha ning a hong lut a maha thir ruija khit na ranga chong a pek jui. Hava suale a maha tumo ini hale imo a tho jui tia alui dingkel.

³⁴Hava han mitamngai karra mi aviar in chong dang khat an ri, alekin a dang khat an ri, an rasalim a man a ngai a holam mo ini tiha jet tor lai mak a; ama ha chongtan na mun han kailutru tia chong alui pek.

³⁵Hale a man chung tiang ahong kal pha han mitamngain an hong kan nengjel jarra ama ha ralmingain an domma an lui tuong.

³⁶Ajarko mitam ha ning a maha kei suak taru tia, a nuk tiang an honga an hong khek.

³⁷Han Paul ha chongtan na mun han an va kailut tiang han, a man ralmi ulianpa jiang a hong ti; “Nang jiang kein chong khat jak rijot nati mo? Han a man a hong sang, nang Grik chong mo na jet?”

³⁸Ha aninko hiva ni khuongai madonna mi lising manli ramtong lian na a tuanga mi that pasal ijip tenna a hong miha nimak che mo?

³⁹Tak-ha Paul ning a ti, “Kei ko Tarsas khopuia Jiw ke kani; Silisia ram ma hava khopuilian na miha ka ni, hiva jarra mitamngai jiang hin chong ka ri thei na rang nang in na jotpero tia lam na ka na nei.”

⁴⁰Han a man a maha a jot pe jui, Paul ning Sirchum chunga a ngirra mitamngai ha an om chian na rang a kut jet na khat a hong man nei, a man Hebru chonga a ria anmani jiang a hong ti.