Read Aimol TIRLON 22 Bible Online

TIRLON 22 - Aimol bible

TIRLON 22

¹E, ule naingai an khat om ka pa ka pungai kei ning ka tak kansan na rang nang ni jiang ka ri chong hi na ngai peru.

²Hava han a man Hebru chonga a riha an jet karra a khel la an om chianjui, han a man a hong ti;

³“Kei ko Jiw pasal ke, Selisia ram ma Tarsas khopuia nai chang kani; anin nom hiva khopuija Gamaliel nuoija kan chuna rakip ka neia ka honglian ani, kan pa kan pungai dan chong pek ha asat kajuia ka hong kan chu ke; han nang ni rakip ning nan tho ang han kei ning om Pathian ranga ka lung ka man lut.”

⁴Hiva lam ruia kein pasalngai le numeingai ha ka khit renin na tet na rang ka pek, hale thitung khanna pong khodengtheina ka lui pek.

⁵Hiva jarra thiampulian le ulianrupngain ka shakhi nan ni, anmani tenna kei ning chong pek rabu, ulenaingai jiang pek rang ka mu va, Damaskas ram sunga a om anmani ha khodengthei pek rang le khit Jerusalem ma va tuang na rang kein sovason ka luiche.

⁶Kein ka hong che pha Damaskas ka tung tiang han, sunchim lai han jet lui thai luia vanram tenna var an khat in ana lui el,

⁷han kei ning ka kan lumma, hale rasa an khat in kei jiang, “Saul, Saul, nang in keihi ijarra mo pong khodengthei ninapek,” a ti ha ka lui jet.

⁸Kein ka lui sanga kati, “Tumo nani Puma?” Han a man kei jiang a ti, “kei ko nang in pong khodengthei na pek Nazaret a Jisu kani.”

⁹Kei le ki kan ruaipuingai ha ning var ha an mua an lui chit anin nom a ri rasha an khat ha ko anmanin lui jet ma u.

¹⁰Han kein kati, “Kein imo ki tho rang Puman? Han Puma kei jiang a ti,” thui in lang Damaskas khuo sunga lutro, hava mun han nang in na tho rang rakip ha a rapa an varsha chuan rakip ha nang jiang na ripe nanti u.

¹¹Avar ning a el jarra kei ka mit alui jinge, hiva jarra kei le ka kan ruaingai ha ning an na kairuoija, Damaskas khuo sunga an na lut pui jui.

¹²Hava mun na a om Jiwngai ning misatke tia an ri, dan chong pek ha asat ijui Pathian oi Anania anti pasal an khat alui om.

¹³Kei jiang a honga ka sirra a ngirra a hong ti, “Ulenai Saul na mit var ta rase” hava chong a hongti le kein muna ka neia a maha ka luimu.

¹⁴A man kei jiang a ti kan pa kan pungai Pathian ha ning nang in ama lungdo jet na rang, mi dik an khat ha mu na rang, hale ama herasa abaisua tenna jet na ranga a na thang suak jui.

¹⁵Ajarko nang in mirakip madonna na mu le nai jet ha ama ranga shakhi na chang rang ani jui.

¹⁶Atun nangin imo nilakansai? Thui in lang tuilutna neiro, ama a ming ha tel in lang na siatna ngaiha rasukro.

¹⁷Kei ning Jerusalem ma ka kirra biakrup sunga lam na ka nei lai han muna an khat ka lui nei,

¹⁸Jerusalem tenna a rak suak taro, ajarko nang in kei ka ruia shakhi na pek rang ha anmanin na lui peno ni u, tia Puma ning kei jiang a ti ha ka mu jui.

¹⁹Han kein Puma jiang kati, an tak in an kan jet, kei ning Sainagok rakip nang tak an na ngai mingai ha ka hong churra, ren inna ka lui tet.

²⁰Hale nang na shakhi chang Stephan a thisen an man suak lai han nom kei om a sirra ka ngirra ka lui kan chel, hale ama a thatngai an puon an diar om ka lui ngak pe ani.

²¹Han a man kei jiang a ti, “Che taro ajarko kei ning nang ha hiva mun tenna a lak a om a dangjat mingai jiang ki na tir rang ke.”

²²Mingai ning ama chong ri ha hiva tung khan na an luingai, han anmanin adik khan an hong khek anti, “Hi ang mihi, hiva simlei ramuol tennan phut suak pui taru, ajarko ringranga a rahui suak mak.”

²³Han anmanin an khek an puonsi an paisa, hale chung tiang vaivut an lui chai.

²⁴Rom sepai ulian ha ning ama ha chur unlang paliko sunga kailutru, hale ve unlang chong dingkelru tia cham alui pek.

²⁵Han anmanin a maha an khit pha ha, Paul in asirra a ngir ralmi reakhat neipu jiang a hong ti, “Rom jatmi an khat hi chongtan naite khat neiluia nan ve hi nan chongtan mo ani?”

²⁶Ral mi reakhat neipu ha ning hiva chong hi a jet pha, a man ralmi ulian jiang achea a hong ri, nang in ijamo na tho rang? Ajarko mihi om Rom mi ani,

²⁷Hava han ralmi ulian ning ahonga ama jiang a hong ti, “Na ri pero, nang Rom jatmi mo na ni?” a man a hong sang, ka ni.

²⁸Han Ral ulian ning a hong ti, “Kei ko peisa atam tak ka pek Rom jatmi ki va chang ke.” Tak-ha Paul in a hong sang, “Kei ko ka nai chang lai tenna ke.”

²⁹Hiva jarra ama jiang chong dingkel nei rang an ti ngaiha ama jiang tenna an kan thul jui, hale ralmi ulian han nom ama ha Rom jatmi ke tihi a hong jet iluikhit jarra a chitjui.

³⁰Khuo a hong var le ralmi ulian ning Paul achunga Jiwngain ijarra mo an rang ha an jet jot jarra, Paul an khit ha asut a hale thiampulian le ulianrupngai ha kanchunru ati pea, hale Paul ha a hong tu anga an mai kunga aman ngirjui.