Read Aimol TIRLON 25 Bible Online

TIRLON 25 - Aimol bible

TIRLON 25

¹Festa ning a om na rang ram sung han a hong tung le nithum suale Sisaria tenna Jerusalem ma a hong jui.

²Han thiampulianngai le Jiwngai lamkei ulianngain Paul a chunga chong rina an nei ha ama jiang anrijui.

³Hale Paul ha Jerusalem ma tuangbak lampuia that na ranga Festa jiang anmani ning lungsiat a na mu na rang tia chong lam na an lui nei.

⁴Tak-ha Festa ning a hong sang Paul ko Sisaria hin ren inn sunga an ngak an la om, hale kei jom aphabong khat suale hava han ki che rang ke.

⁵Hiva jarra nang ni karra lam kai pu alekin kei le kan ruaia Sisaria va che rei hava pasal ha ama sialna alui om inko anmanin hava mun han ama sial na ha ri rase u.

⁶Festa ning anmani le hava mun han nikariat animakle nisom khel la an om chun na hava suale, Sisaria hin an hong jui, han jing ang han a man chongtan na ong mun han a onga Paul ha hong tuang na ranga cham a pek jui.

⁷Paul ning a hong tung pha han Jerusalem tenna an hong Jiwngain a maha ankuoi tongjiak an ngirra ama chunga lung tok rang om tak praman ko pek tor luija chong tam tak an lui ri.

⁸Paul ning a tak kan san ring na chong a hong ri a a ti; Jiwngai dan chong pek ruia anin nom; biakrup chung changa anin nom hale Rom ram vaihom ulian ruia anin nom kei ning siatna ite tho making.

⁹Tak-ha Festa ning Jiwngain an na lungsiat na rang tia Paul jiang a hong ti, “Nang in Jerusalem ma na chea hiva hesuak ruia sovason kei kamai kunga chongtan na nei rang hi na dei mo?”

¹⁰Han Paul in a hong ti, “Kei chong annatan na rang a mun vaihomlian ning chong a tan na rang ong munlian han a onga ama mai kunga kei kangir, Jiwngai jiang kein a sa mak ki tho i te khat om mak hava ha nang in nom asat nianga ni jetjui ke.”

¹¹Aninnom kei ning a samak tho mi ha kaninko, hale thina rang khan na kasiat na ha alui om aninko kei thi ranga a jot lui ni making, tak-ha mingai ning ka chunga an ri chong rakip hi adik khat jak om a om mak inko tu khat jak innom kei hi anmani jiang na pek tor noni u; kei ning vaihomlian nang jiang chongtan na hin ka na ri.

¹²Hava han Festa ning a chuan putpuingai le chong an kansiama a hong ti, “Nang nin vaihomlian jiang chongtan na ha nilamjui kenna vaihom Ulian jiang ni che rang asauak.”

¹³Nikhuo aviar a theng suale reng a ming Agrippa le Bernik ning Sisaria hin an honga Festa ha manpak an hong pek.

¹⁴Anmanin hava mun han nikhuo sot tak an lui om sunga Festa ning Rengpa madonna Paul heruia a manjet a ti; “Felik ning a churra ren inn sunga alui tet pasal an khat a om.

¹⁵Kei ning Jerusalem ma ka om laihan hiva pasal hesuak ruia thiampulianngai le Jiw ulianrupngain ama chunga chongtan nana man om pero tia kei jiang anmani ning chong an na lui kat.

¹⁶Kein anmani jiang ka sanga kati, a siatna an man om miha ning amaral an pek mingai hale mai kan mua an kan biak ama chunga chong an ri, hale a man veikhat a tak kan san ring chong a ri na rang a pha pekluija hava miha amaral pek pungai jiang pek len hi Romngai nun chan nimak.

¹⁷Hiva jarra anmanin hiva mun na an renga an hong pha han kein a pha manmang luia nikhat suale chong jenna ongmun han ka onga hava pasal ha hong tuang na ranga kein chong ka lui pek.

¹⁸A maral an pek mingai ha ning an hong ngirra ama ruia kein ka lui ngaidon anga ama chunga chong satlui ite lui kei sua ma u.

¹⁹Tak-ha anmani nun chan ruia, tiko Jisu anti ha athisua, hale alaring tijarra Paul in angirtit a om, hiva ruia anmanin ama chunga hesuak chong an manchang.

²⁰Han hiva hesuak ruia ijamo kein chong hi ki jet rang tijarra ama ha Jerusalem ma a chea hiva heruia hava mun han chongtan nai na deimo tia ka lui dingkel.

²¹Tak-ha Paul ning rengpan chong itan ha a tor maje a maha asat narung unlang natetru atia kei ning a mahi Keisar jiang ka tir maje asat rung unlang tetru tia chong ka pek jui.”

²²Han Agrippa ning Festa jiang a ti, “Kei ning om hiva mi a chong ha ka ngai jot”, a man a hong ti, “Jinga nang in ama a chong ha ningai rang ke.”

²³Jing anga nikhuo han Agrippa le Bernik ning lulian banlianna an honga, ralmi ulianngai le khuo sunga a chong che mingai le an hong kan ruaia chongngai na rang mun han an hong lut, Festa ning chong ipek nuk juia Paul ha an hong tuang jui.

²⁴Han Festa ning a ti, “Reng Agrippa le Bernik hiva mun na kan om suam pasal rakip nang ni ning hiva pasal hi nan mu, hiva mihi a ring rang hi a rahui suak mak tia Jerusalem ma le hiva mun na a om Jiwngain an khek kei jiang chong an na pek.”

²⁵Tak-ha hiva mi hi ning thina rang khan na amaral om mak tihi kei ning ka mu jui, hale ama a tak innom Reng Keisar jiang chongtan na ranga inalam jarra kein a mahi tir na ranga ka lunga ka ngirjui.

²⁶Tak-ha ama ruia kei ning ka rengpa jiang jot lui rang chong i om om mak, hava jarra chong dingkel na ranga kei ning ka jet na ranga nang ni madonna le a lut det Reng Agrippa madonna a mahi kava tuang jui.

²⁷Ajarko ren inn sunga an tet mi khat ha chongtan na ranga an tir pha han, ama chunga amaral i om do lui hi arui a jar builam ni nati tia ka ngaidon.