Read Aimol TIRLON 26 Bible Online

TIRLON 26 - Aimol bible

TIRLON 26

¹Agrippa ning Paul jiang a ti, “Nang na tak chung changa chong ri na rang kan jot jui,” hava pha han Paul in a kut a dom ma a tak kansan thei na chong ri ha a hong phutjui.

²“O, reng Agrippa, kei ka chunga Jiwngai ning ka siatna an man om na rakip ruia ve ennihin nang mai kunga ka tak kan san thei na chong ka ri rang hi kei ranga ravansat ani tia ka ngaidon.

³Jiwngai karra hesuak herui le anbalam nunchan rakip nang in khel la asat na jet, hiva jarra ka chong ri hi asat nina ngai pe rang hi kadeia nang jiang chong lamna ka na nei.”

⁴“Naipang ka chang lai tenna ka hong om ka ramma an khat om Jerusalem ma a om Jiw rakip in an na jet, ka nun chan ha.

⁵Anmanin chong shakhi le an na pek jot aninko, kei jiang Pharisingai karra ka hong tihi anmanin an na jet.

⁶Atunko kein kan pa kan pungai jiang ki na pek rang tia chong ngir na i lui riha ngak lal tak ki om jarra kei ha chongtan na ranga ka lung angirphit ka om.

⁷Hava ha muna ranga keini phung somleini ning sun le jan na Pathian ha chubei kanbuk kan om ani, hiva jarra o, rengpa, keihi Jiwngain ka siatna an man om ani.

⁸Pathian in a thi ngai ha a man ringkhir aninko, hava takngai torlui hiva mun hin iruija mo nan la om?”

⁹Ka tak innom Nazaret Jisu le kan jot lui chuan hi tho rang tia ka lui ngaidon.

¹⁰Kei ning thiampulianngai tenna cham ha ki mu jarra Jerusalem han nom a thiang mingai ha ren inna ka lui tet, hale a that pha han nom kei ning ka jot jui tihi ka lui ri.

¹¹Aphat rakip kei ning Sainagok sunga khodengthei ka lui pek, an takngai na ha an jot mak na rang ka lui tho, hale anmani karra kei ha avet an khat anga khoral khoralla ka chea ka lui not.

¹²Hingahin a luini kein thiampulianngai tenna cham an na pek le kan ruia Damaskas han ka lui che.

¹³Sunchim lai tak han ninek ivar an khat in vantenna a var ha ning kei le kan kan ruaisuamngai jiang kan lon na lam han ina elha ka lui mu.

¹⁴Han keini kan renga kan kan lumma, “Saul, Saul, nang in iruija mo kei hi pong khodengthei ninapek? Linga na ke niper ha nang jiang natnake,” tia Hebru chonga kei jiang rasha ankhat in iti ha ka lui jet.

¹⁵Hava han kei ning ka lui ti, “Nang tumo na ni Puma?” Han Puma ning a na lui hong sanga, kei ko nang in pong khodengthei na pek Jisu ha ka ni.

¹⁶Tak-ha thui in lang na ke han ngirro; ajarko hiva ranga kein nang jiang ki na man kan muke, tiko ve enni nang in kei ha ninamule kan ruaia nuk a om ka na man mu rang hava chuan ha nang in na sin na shakhi pek ha nichang rang ani.

¹⁷Nang in najat mingai le a dangjat mingai jiang nache karra kein ki na sanrangke.

¹⁸Anmanin a jing kar tenna a var han, seitan ranak tenna phut Pathian jiang, an hong kanheija, an siatna rakip ngaidam na, hale kei tak an na ngai jarra thang suaksangai karra mun an mu na rang, kein nang hi anmani mit ha longpe na ranga anmani jiang ki na tir ani.

¹⁹Hiva jarra o, reng Agrippa, vanram tenna phut mu na ankhat ki nei ha a jui lui keini making.

²⁰A phut na tak-ha Damaskas mingai jiang, hale Jerusalemngai jiang le Jiw ram rakip, an khat om a dangjat mingai jiang, anmanin an lung anthulla Pathian tiang an hong kan hei rang hale an siatna tenna lung thulna an nei jarra chuan sat ha an tho rang tiruija kein ka lui ri.

²¹Hiva jarra Jiwngain biakrup sunga an nachurra nathat rang an lui tho.

²²Ve enni ten nom kei ning a sin a lian madonna ka ngirra shakhi pektorna ki nei hi Pathian ning inasan jarra ani, kein ka ringai hi tashantheingai le Mousi ning an lui ri asuak rang ke anti ha an kan ang rip.

²³Khrista ning pong khodengthei na munata, hale athi ngai karra a phutna tak ringkhir ha ama inirangke, han sanring na var ha Jiwngai le jatdang mingai jiang ri manthang nanti.

²⁴Hinga hin Paul ning a tak kan san thei na chong ha a ri a, Festa ning ama jiang a khek a hong ti; “Paul nang na vetjui, kan chuna a tam tak na nei ha ning a na man vetjui.”

²⁵Paul ning a hong sanga; “Kei vet making, chitlejak om o, Festa; kei ning adik hale ching na theina neia ka ri ke.

²⁶O, Reng Agrippa nang in hiva chong jarra najetver, kein nom nang mai kunga ka lungdo tunga ka ri ke, ajarko nang jiang hiva chongruija ite khat thup making tihi ka tak innom ka kanjet, hale hiva chuan suak hi akil khat asuak om nimak.

²⁷Reng Agrippa nang in Pathian tasatheingai ha tak mo na ngai? Tak na ngai tihi kein nom ka jet.”

²⁸Han Agrippan Paul jiang a hong ti, “Nang in keiha hiva a pha bongkhat sung hin Khristian na manchang na rang mo ni tho?”

²⁹Paul ning a hong sanga a ti, “A pha bongkhat jak anin nom hale a pha sot tak anin nom nangjak ni luia ve enni nikhuo hin kei ka chong angai rakip kein kani ang hin nina ranga kein Pathian jiang lam hi ka dei; han an na khit na rui hi ko kan chel luia!”

³⁰Hava han rengpa le ramvaihomlian an khat om Bernik anmani le an ongsuam mingai lim anthui jui.

³¹Anmanin an suak khat le khat an hong kan biak anti, “Hiva mihi ning ren inn na tet na rang le thina rang khan ko siatna tho mak.”

³²Han Agrippa ning Festa jiang a ti, “Hiva mihi ning Kaisar jiang chongtan na ranga alui rimak inko masuo alui jot rang ani.”