Read Aimol TIRLON 27 Bible Online

TIRLON 27 - Aimol bible

TIRLON 27

¹Keinin Itali tung na ranga rokuang chuang na ranga kan om pha han, anmanin Paul le a dang ren inna om mingai ha ralmi reakhat neipu Julia anti ama jiang an pek lut jui.

²Hale Asia ram varalla a om a mun a mun na che ranga Andamait anti rokuang ankhat kan chuanga kan che jui, han Thessalonika, Mekidonia, mi Aristarkhas ha keini le kan lui kan ruai.

³Jing anga nikhuo han keinin Sidon mun han kan hong tunga Julia ning Paul ha manrit lungsiat a mua, ama asapngai jiang a chea an lung man hui pe na rang ama ha a masua jui.

⁴Hava mun tenna kein in rokuanga kan hong che pha phaivuo ning keini ha a na semreia kein in Saipras tuidung reitang tiang kan hong jui.

⁵keinin Silisia le Phamphalia madonna a om tuiongliang ha kankanna Laisia sunga om Mara han kan tung jui.

⁶Hava mun han ralmi reakhat neipu ralmi ulian ha ning Itali tung ranga Aleksandria rokuang khat a mua keini ha ana man chuangjui.

⁷Keinin nikhuo sot tak rokuang ha ajamma kan hong, pongtak Kinida han kan va tung, ajarko phaivuo ning keini ha madon tiang anasemma Samoning madonna Kret tuireitang tiang kan hong jui.

⁸Hale kein in pongtak tui kan nok reitangtiang kan honga, Lasija khopui sirra a om rokuang khapna mun hui anti han kan va tung jui.

⁹Hava mun han keinin a phat sot tak kan lui lut, hale bungei nikhua ham ithengjui jarra, kan rokuang khuollon ham itatjui jarra, Paul ning anmani jiang chongsat pek na a neia.

¹⁰Ahongti, “Ulenaingai, rokuanga kan khuolche kan choi phur le pai le rokuang jak hi imangrang ni luia, keini kan ringkhuo tenna mang a jot tia kein ka mu.”

¹¹Tak-ha ralmi reakhat neipu ha ning Paul in iri nek rokuang thaupule rokuang a neipu chong lam ha alui ngaidet.

¹²Hava rokuang khapna ha phabi thava om na huiluimun ani jarra, akanchana khat phoinik mun han kan tunga hava mun han phabi tha kan man theng aninko, tia mitamlam ning hava mun tenna che rang hi andeija chong kan shiamna an lui nei, Phoinik anti mun ha ko sakle mar an khat om thangle mar a kan en na aom kret rokuang khapna khat ani.

¹³Thangtianga phaivuo han ajamma a hong ranga anmani an lungdo ha a tung jui tia an lui ngaidon na, hale rokuang ha ansut ajamma Kret rokuang khapna tiang han ahongdepjui.

¹⁴Tak-ha a pha bongkhat suale simle Marra phaivuo puinu ha ning a hong ranga, keini tiang han an hong semjui.

¹⁵Rokuang ha phaivuo karra chur tor masinga kan masua va keini ha anamakjui.

¹⁶Han Kouda anti tui karra ram ase entet khat han kan va tanna keini pong khodengthei tak a rokuang ha kan va chur.

¹⁷Hava rokuang ha an domma anmanin asat an sinhei khirra, hale anmani ha Libia tiang phaivuo ning na namde nati tia an chit puon duang ha an ma summa hangan an man che jui.

¹⁸An khat om phaivuo ning keini ha a tam tak a na lui man pong jarra, hava nikhuo suale han keini rokuang sunga a om phurngai ha kan lui pei.

¹⁹Hale nithum chang na han anmani ning om an kut tak rokuanga phurngai ha anluipai.

²⁰Nikhuo sot tak keini chunga simnile sortham suak lai mak an khat om ruale phaivuo ning kan chunga a na khudea, a tun keini kan renga ringkanti tihi ngaidon lai masing.

²¹Hale kan bungei nam ahongsotjui, hava pha han Paul ning anmani anlaia a ngirra a hong ti; “O, miringngai, nang nin kei ka chong ha nan luingai aninko, Kret tenna kan lui hong chuangmak inko, pong khodengthei hi lui tong nonising.

²²Atunko keijin nang ni nanlung ha apongmak na ranga ka na ri, ajarko rokuang hi ni luia nang ni karra tu khat ringkhuo om mang noning.

²³Ajarko keihi Puma a mi kanni jarra hale ama chubeibuk khat om ka ni jarra Pathian thaneithiang khat in jan na ka madonna angira a ti;

²⁴Paul chit maro, ajarko Kaisar a madonna ningir rang a nijui, hale enro, nang le na kan ruaia rokuang a chuang mirakip ha Pathian nin nang jiang a na pek jui.”

²⁵Hiva jarra ulenaingai nan ning man dong maru, ajarko, kei jiang inaripe tak hi asuak rang ke tia kein Pathian jiang takngai na ka nei.

²⁶Tak-ha keini hi tui karra ram sintet Island khat tung rang kan ni.

²⁷Jan somlei manli a hongni han keini ha Andria tuionglian chunga Phaivuon anachoi titir pha han, janchim lai tak han rokuang ajap mingai ha ning keini ha tangtiang kan hong depjui tia an lui ngaidon.

²⁸Hava han anmanin tui ha athup mo an u olla, han lamsomni thuk ha anmanin an mu jui, hale aviarte an chetot ret le veikhat an uol ret han lam somlei ranga thuk ha an lui mu.

²⁹Keini kan rokuang ha lung lianpa an khat kansuk a jot tia anmanin an chit rokuang puan duang ha ansut kho var na ranga lam na an lui nei.

³⁰Rokuang japngai han an tui japna mol ha an deng jaunna rokuang tenna kan chomma tan rang anti lai tak han,

³¹Paul ning ralmi reakhat neipu le ral mingai jiang avati, anmanin rokuang sunga an om mak inko nang ni ha ringna om noning.

³²Hava pha han ralmingain rokuang sinte rui ha antuk tanna an masua jui.

³³Khuo a hong var tiang han Paul ning anmani ha aviar chak na ranga alui ri, a man a ti, ve enni ni somlei manli tung khan na nang nin nan ngak i om chakluia nan hong om jui.

³⁴Hiva jarra chak le nek hi alek ko charu tia ki na ri ke, hivahi nang ni thimak na ranga ani ajarko, nang ni nan karra tu khat om nan sam mal khat mang noning.

³⁵A man hivahi ari a tal alui a anmani madonna Pathian amanpak, hale a ek khamma a chak anphutjui.

³⁶Hava han anmanin an ning asat anmani an renga an chak ver jui.

³⁷keini rokuang sunga a om mi ha kan renga miria ni le somsari leikaruk kan lui ni.

³⁸Anmani chak le nek ankhop phet, gehu ha tuionglian na an masulla rokuang ha a hong jang det jui.

³⁹Khua a hong var pha han anmanin hava ram ha jet lai ma u, tak-ha leidi om na mun, tui ning imak khat ha anmani ning an lui mu, hava mun tiang han rokuang kan san tor rang mo tia chong kan shiamna an lui nei.

⁴⁰Han anmanin rokuang puan duong ha tuionglian na anpaijui, hale rokuang japna an khitde ham anset, rokuang madon tianga puan duong ha an domma leidi om na mun tiang man che na ranga an lui kanshiam.

⁴¹Tak-ha tuionglian anni kan tong na mun han kan tunga rokuang lam ha leidi om na han a na nonga rokuang japna mol ha lam a kan phum tit, kan nik tor lai mak; tak-ha rokuang ha ko tui kannok in a hong ve khui jui.

⁴²Anchur mingai ha tuililaija tan a jot anta ral mingai ha ning thatrei tia chong an kan siamjui.

⁴³Ral mi reakhat neipu ha ning isanjot jarra anmani chong kan shiam ha akhapjui, hale tuiliatheingain kan chom senlang tangtiang lui tung rase u.

⁴⁴Hale a om mingain an theina va thingpek a mo, rokuanga om phur le pai hin na kan rase u tia cham a pek jui; han an renga tanga an tung ver jui.