Read Aimol TIRLON 3 Bible Online

TIRLON 3 - Aimol bible

TIRLON 3

¹Pitar le Johon ning lam na ranga nitak pha dan thum han biakinn na an lui che.

²Han a nu vonsung tenna ke kiak pasal ankhat an hong choia, biakrup lut ranga a hong mingai jiang kutjado a lam ranga biakrup sat tak kotkolla anitin an lui tet.

³A man Pitar le Johon ha biakrup sunga an lut tiang amua a kut adoa a hong lam.

⁴Han Pitar le Johon le kan ruaia ama ha an en chiak anti, keini jiang na enro.

⁵Hale anmani tenna imo khat mu rang kani tia a ngaidon na a man anmani jiang lung lut a en,

⁶Tak-ha Pitar ning a ti, kei ruphai le sana nei making, aninnum kein ka nei ha nang jiang ka na pek; Nazaret Jisu Khrista minga lonro.

⁷Han Pitar ning a chang tiang a kut a o va akei thui jui, hava lai tak han ama akele aketharui a ngar jui.

⁸Hava han a man a kan chomma a chaijel jui Pathian amanpak anmani le kan ruaia biakinn sunga a lut jui.

⁹A man a lon ti tirra Pathian amanpak ha mitammin an mu.

¹⁰Biakinn sat tak kot a om kutjadopa ani tihi anmanin an hong jet ama jiang isuak chuan ha an ngak ban,

¹¹A man Pitar le Johon ha a o va a om lai han, mitammin an ngak Solomon atual anti han anmanin an hong tan jui.

¹²Hale Pitar ning a mu pha, mingai jiang a hong ti, “E, Israel mingai hiva mipa chunga itamo hi ang khan nan ngak? A ma kein in kan man lon titir hi keini ranak anin nom, Pathian takngai jarra anin nom, nan lui tho tia mo nan na en chiak?”

¹³Abraham, Isak, Jakop Pathian kan pa kan pungai Pathian ha ning, asuak Jisu ha mahok na lian tak a pek jui, nang nin ama ha a chong che ngai kut chunga nan pek Pilat ning masua rang ati ha nang nin jot mak che u.

¹⁴Tak-ha nang nin a thiang, mi dik lam ha nan enda va, asat mak tho mikhatpa lam ha masua ranga Pilat jiang nan lam ma nan om.

¹⁵Hale nang nin ringna neipu lam nan that jui ama ha Pathian ning a thi ngai kar tenna a man ringkhir jui, hiva arui ajarra keini shakhi kan om.

¹⁶Han ama minga takngai aneijarra nang nin nan mu an khat om nan jet pasal ha ama a ming jarra i man ratke, ama jak ha takngai na a nei jarra nang ni rakip madonna a man a tak adamver ani.

¹⁷“Atun e, U le naingai, nang ni nan neipungai ning an thi ang han nang ni ning om jet luia hava nanthoke tihi kein ka jet.

¹⁸Tak-ha Pathian ning ama Khrista a pong khodengthei a dui na ha tashantheingai baisua a rapa ilui manjet ha a man a man tung jui.

¹⁹Hiva jarra nang nin nan siatna ngaiha abuiphir na rang kansir unnang Puma jiang hong kan heiru.

²⁰Ha aninko nang ni ranga athang suaksa Khrista tiko Jisu ha a man hong tir nati.

²¹Irakip veikhat ansinkhir maje, ama ha vanram ma man om nati, hiva jarra Pathian ning a tuan lai tenna ama tashanthei athiangngai baisua amanrijui.

²²Mousi ning a ti, “Puma Pathian ning nang ni ulenaingai karra nang ni ranga kei, ang chat ama tashantheingaihi khat hongman suak nati, a man nang ni jiang a ri rakip chong ha ngairu.’

²³Hi ang hin ninati, Pathian tashanthei chong ha a ngai lui mirakip ha manmang nati.

²⁴Samuel tenna a don don na an hong suak Pathian tashanthei rakip in an lui ri rakip ha anmanin hiva pha ranga an lui ri jui.

²⁵Nang niko Pathian tashantheingai le Pathian ning nan pa napungai le chongtan na iluinei pasalnaingai nan ni, Pathian ning Abraham jiang an chong tanna han a ti, nang na vonchoi sunga ramuolla a om inn sung rakip jiang phual mu nanti u.

²⁶Pathian ning a rapa tak nang ni jiang ama asuak ha a hong man suak jui, nang ni nan ma sialna nan siatna jarra mirakipngai ha an lung an hongthul rang han nang ni ravansat na ranga ama ha a hong tir jui.”