Read Aimol TIRLON 9 Bible Online

TIRLON 9 - Aimol bible

TIRLON 9

¹Puma tirlonngai ha manchitna le that na ranga, a tun nom Saul ning lung thak phuksan a san na thiampulian jiang a che.

²Hiva lam ajui tu angpui pasal animakle numeingai ha ka mu inko, anmani ha ka churra Jerusalem ma kahong tuang na rang Damaskas Sainagok sunga chuan tho ngai jiang pek ranga chongsan che na pero tia ama jiang a lam.

³Atun a man hinga a che lai ha, Damaskas a hong nai pha han jet lui thailuija vanram tenna var ankhat in ama jiang a hong eljui.

⁴Han a man a kan lum ma, “Saul, Saul, nang in keihi iruija mo pong khodengthei ninapek?” Tia ama jiang rasha an khat in iti ha a jet.

⁵Han a man a ti, Puma, nang tumo na ni? Hava han a man a hong sang, “Keiko nang in pong khodengthei naipek Jisu ha kani.

⁶Tak-ha thui in lang khopui shunga lutro, han nangin imo nitho rang ha na ripe nanti.”

⁷A ma le anchesuam akanruoipui pasalngai ha ning, rasha ha ko an jet tak-ha miko khat jak om mumak ua, chong ri luia an ngir chianjui.

⁸Han Saul ning ahong thuia, a mit a hong mengpha ite khat om mulaima, han anmanin a kut a o va Damaskas sunga an lut pui jui.

⁹A man nithum khan na ite khat lui muma, hale chak le nek, tui om lui inmak.

¹⁰Han Damaskas tirlon Anania anti khat alui om, Puman a man kan mu va ama jiang a hong ti; Anania, han ama ning a hong sanga a ti, Puma hin ka om.

¹¹Puman ama jiang a ti, “Thui in lang lamtunphit anti tenna chero, hale Juda a inn sunga lut in lang, Tarsas Saul anti pasal ha hong tokro, ajarko enro; a man lam na a nei.”

¹²Aming Anania anti pasal khat in a hong lut, a man a mu theina ranga achunga a kut a siak han a mu jui.

¹³Tak-ha Anania ning a hong ti, Puma hiva pasal hi ning Jerusalem ma namithiang ngai jiang satmak chuan a tho tihi kein atam tak ama ruia ka jet.

¹⁴Hale hivahin nang na ming a kui mingai ha khit na ranga thiampulian tenna ranak ha a hong nei jui ahong mu jui.

¹⁵Tak-ha Puman ama jiang a hong ti, Chero, ajarko amahi a dangjatngai, rengngai le Israel naingai an madonna kei kaming hi semrang rithang rang amahi kithang suaksa ki nei man rang ha ani.

¹⁶Ajarko, a man kei ka ming jarra i duk khan mo pong khodengtheina inei rang ha, kein ama jiang kimanjet rang ke.

¹⁷Han Anania anin ahongcheja inn sung han a lut jui, hale a kut ha ama chunga atet a ti; Ulenai Saul nang in na mit na mukhir na rang le Thavang Thiang nasip na ranga, nang in na hong lai lamlaia nang jiang ina mankanmu Puma Jisu ning kei hi ina hong tir jui ani.

¹⁸Hava lai tak han ama a mit tenna ngalip anga a lek ahong chulla, han a man veikhat a mukhir jui, han a man a thuija baptais thona anei jui;

¹⁹hale a nek a chak a hong ratjui, han a man Damaskas a om thiamruaingai le nikhuo sot tak alui omchun jui.

²⁰Han a man Sainagok sunga, “Jisu hi Pathian nai ke” tia chong alui ri.

²¹Han na a ngai rakip ning an ngak chian na an hong ti; “Jerusalem ma hiva ming a ringai ha manmang na rang itho miha nimak mo? Hale hivahin nom hi ang mingai ha khit thiampulian mai kunga choi na rang ihongke.”

²²Tak-ha Saul ning Jisu hi Khrista ke tia chonga khi de na tetan na anei akhella ihong ngarha Damaskas a om Jiwngai ning an mu karra an ngak jui.

²³Hiva suale nikhuo ashot jon le, Jiwngain a mahi that na ranga chong an kan shiamjui.

²⁴Tak-ha anmanin an kan shiam ha Saul ning a hong jet jui, han anmanin a maha that na ranga suangkung rakip sun le janna an lui ruong.

²⁵Tak-ha ama a thiamruaingai ning a maha kokbong sunga a thun na jan na palvaral thiang an ma sul jui.

²⁶Han a man Jerusalem ma a hong pha han, thiamruaingai le kan top na ranga atam alui kan huatna, hale a man thiamruai achang jui tihi takngai tor ma u a thiamruaingain an lui kanchingna.

²⁷Tak-ha Barnabas ning amaha tirlonngai jiang ahong tu anga, a man lamlaia Puma ija mo ikan mu hale Puman ija mo ama le ikan biakpui, han Damaskas ranak nei tak chongrina inei ha anmani jiang a thianga a ripejui.

²⁸Hana a man Jerusalem sunga a lon ti tirra anmani le alui kan ruai.

²⁹Hale a man Puma minga thaunasat chong ha alui ri, han Grik chong ri Jiwngai le chong an lui kanjiat an lui kan kher hanna anmanin ama ha that na ranga an lui tho.

³⁰U le naingai ning an jet pha han ama ha Sisaria tiang an chumpuija Tarsas tiang antierjui.

³¹Hava pha han Judia, Galili le Samarija pumpuia, biakinn sin an phut lunghip na an lui mu, hale Puma an chit jarra Thavang Thiang ranak ha an jui jarra a khella miha an hong tam.

³²Atun Pitar ning a hong che pha han Lida hin a om a thiang mingai jiang a hong jui.

³³Hava mun han Ainis anti kumkariat jamun chunga a jal a pang her khat thipa a nat mi ankhat a man a mu jui.

³⁴Han Pitar ning ama jiang a hong ti, Ainis Jisu Khrista ning a na mandamjui, thui in lang na jamun ha sintaro. Hava lai tak han a man a thui jui.

³⁵Han Lida hin a om le, Sharonna om rakip in ama ha an mua anmanin Puma jiang an hong kan heijui.

³⁶Jopa hin a om a ming Tabitha tina ko dorkas, anti numei tirlon khat alui om, hiva numei hi ning ithona rakip misantheina mang alui tho.

³⁷Hiva nikhuo sunga hingahin asuak jui, a man a nat athi jui, hale anmanin ama ha tui an manbialla, chungnungtak ka, khata han an tet jui.

³⁸Han Lida khuo hi Jopale akandep a om jarra thiamruaingain Pitar ha hava han a om ti ha an jet, keini jiang a rak det na hong pero tia pasal anni ha antierjui.

³⁹Han Pitar ning a thuija anmani le a che jui, hale a man hava mun han a tung pha han anmanin chungnungtak ka han an kalpuijui, han alui om meithaingain an chap, Dorkas ning anmani le alui om lai puan le diar iluisuipe ngaiha andova a sirra an lui om.

⁴⁰Tak-ha Pitar ning anmani ha a man suak verra a khup a bilinga lamna a nei jui, hale Pitar in a thisa takruang tiang a hong kanheija a ti, Tabitha thuiro, han a man a mit a hong menga Pitar ha a hong mu pha athuija a ong jui.

⁴¹Han Pitar in ama ha a kut a o va akei thuija hale a thiang mingai le meithai ngai ha akuija ama ha a ring Pumma a pek khir jui.

⁴²Han Jopa hin a om mirakip ning hivahi an hong jet mitam lam ning Puma tak an ngai jui.

⁴³Hale a man Simon anti savun sin khat le kan ruaia Jopa ani khuo sot tak an lui om suam.