Read Aimol ROM 12 Bible Online

ROM 12 - Aimol bible

ROM 12

¹Hiva jarra ulenaingai, nangni taksa ha ringpum ma, Pathian lungdo tung na rang an khat phur anga nina rang kei ning Pathian manrit na khan na nang ni ha ka na ri, hivahi nang ni thavang chuan ke.

²Hale hiva ramuol lungdo nun chan ha chan maru, tak-ha Pathian lungdo, asat a jot lungdo tung ha, nang nin nan jet na rang nan lung ha man thar innang thul khirru.

³Nang ni nan renga nan tak in, kei ko ka jet ka thei tia na tak in i kan jet nek khel la ngaidon mak na rang; tak-ha mirakip jiang Pathian ning ina pek takngai dan han an lung an kan churra om na rang, kei jiang ina pek manrit na jarra ka na ri ani.

⁴Ajarko keini kan taksa hi an chuan mun an torna a thei theia a om ang hin,

⁵Keini Khrista jiang taksa khat jak kan ni, hale keini kan renga khat le khat kan san tor kan ni.

⁶Hale keini jiang ina pek manrit na han kutchoi dadang ka nei manrang, Pathian chong ri kan ni anin nom, kan takngai na dan nuk juia rirei.

⁷Sepa tho kannin nom, chuan nuk juia sepa tho rei, a manchu kannin nom man chu rei.

⁸Mi masiat thei kan ni le asat chuan na masiat rei, kutchoi pek thei kannin nom narluia pek rei, lam kaipu ha ning om lung lut a ruai rase, mi lungsiat thei ha ning om ningsat tak tho rase,

⁹A sat kan rol ha kan chel lui a lungsiat ni rase, a satlui ha matirru, asat ha kua titru,

¹⁰Inn sung mi nikan lungsiat ang han, khat le khat kan lungsiatru; ankhat in an khat ha man kan ritru.

¹¹Tha siat luia chuan sin ha ratru, Puma ha nan ngaidon le kan ruaia ningsat lunglut a chuan sinru.

¹²Nan ngaidon lungdo ha jet chiak ningsat na neiru, pong na pha han a dui ratru, hale a pha rakip lam na neiru.

¹³Nang ni le Pathian oisuamngai nem na rang ha kan pekru, khual mingai ha a huia donru.

¹⁴Nang ni ana en dangai ha phual pekru, khokhongluia phual peru.

¹⁵A ning satngai le ningsat suamru, a chapngai le om chappui suamru,

¹⁶khat le khat kan rualru, chung chuan tianga ngaidon luia, a seen tianga ngaidon ru; na tak in kei tak ka ching ka thei jui tia ngaidon maru.

¹⁷Nang jiang a satlui an tho jarra, a satlui tianga ma le maro; mirakip mit en na asat ha tho torna ngaidonro.

¹⁸Hivahi a jot thei aninko, nang nin nan tor khan na mirakip le lunghip lungdai ha om ru.

¹⁹Ka manritngai, nang ni masia phu kan lui maru, tak-ha Pathian lung thak na ha peru; ajarko hingahin a kan jiak jui, phu lui rakip kei ta ke; a hun khan na phu ki lui rang ke, Puma ning a ti.

²⁰Aninnom nang ana enda miha ning a von a cham inko mannekro, a tui a ral le man inro; ajarko hianga ni tho jarra ama luchunga mei ang ni buk de ke.

²¹A satlui ha man kan tor maru, tak-ha asat in a satlui ha man torru.