Read Aimol ROM 2 Bible Online

ROM 2 - Aimol bible

ROM 2

¹O, chongtan mirakip, hiva jarra nang ha ngaidam om mak; ajarko nang in midangngai ha chongtan na na nei jarra nang om na lal, nang in chong natan ha nang om hava tak-ha na tho.

²Hiva anga chuan tho rakip chunga Pathian chongtan ko adik nuk juia a tho tihi keinin kan jet.

³Hi anga chuan tho nang in chong natan; o, miring nang in Pathian chongtan na han ring kati tia nan ngaidon mo?

⁴Animakle Pathian chuansat han nang ha lungthul na ranga lam a na ruoi ti ha jet luija, ama lung nem tiko; ana ngak thei le a dui thei hava rakip ha nang in ae shel na mo ninei?

⁵Tak-ha na lung angar, le na lung na thul jot jui nuk juia; Pathian rang nale adik chongtan na nikhuo han natak ranga hava rangna ha nabuk jui.

⁶Puma ning mirakip hi an chuan tho nuk juia malepe nati.

⁷A sat chuan tho jarra duirat, lianpui na, chitlejak, le a mangtibui ha an tokngai jiang a tor tibui ringkho ha pek nati.

⁸Atak rang jak ngaidon, adik ha i jot lui tak-ha adiklui lam ajui, ngai jiang pong khodengthei na om nati.

⁹A satlui tho mirakipngai ning takngai rang rahut rangna le khodengthei na om nati, a rapatak Jiws jiang hale Grik jiang om nati.

¹⁰Tak-ha, a phutna han Jiws jiang le Grikngai karra asat chuan tho mirakip jiang lianpui na, chitlejak om tak lunghip na ha om nati.

¹¹Ajarko pathian ning mirakip hi a kan ang rip a chong ajenpe.

¹²Dan, chong pek kan chel luia siatna an tho mirakip dan chong pek ha kan chel luija mang nati, hale dan chong pek a nuk jui ngaiha ning siatna an tho mirakip dan chong pek ha ning chong tan nati.

¹³Ajarko chong pek ha angai mingai ning Pathian madonna adik ha nimak, tak-ha chong pek ha chuan na an tho mingai ning mandik nati.

¹⁴Hiva jarra dan chong pek nei lui jatdang mingai an chuan thoha dan chong pek nuk juia an lui tho aninko, anmani chunga dan chong pek ha a om mak innom; anmani chunga dan chong pek ha a om.

¹⁵Hiva jarra anmani lung sunga a kan jiak sa dan chong pek ha chuan na an tho, hale anmanin adik dikmak jet thei na rang an ngaidon ha ning shakhi a chang; hale anmani ngaidon na khat le khat chong kan kharna an neija anmani jiang dikmakna an man nei animakle ngaidam na om an nei.

¹⁶Chong tanna nikhuo han pathian ning, kei ning ka lui sem chongsat ha a jui Jisu Khrista jarra miringngai lung sunga an thup ha chongtan nati.

¹⁷Nang nin Jiws ming ha na choi inko, dan chong pek ha na bei inko, Pathian jiang na man kan lian inko;

¹⁸A ma lungdo ha na jet inko dan chong pek tenna kan chuna na neija khel la asat chuan ke tia na ngaidon inko;

¹⁹hale jet nale adik ruia dan chong pek sung han nang in na mu a, na tak in mitdelngai lamruoi ajieng mun na a omngai ranga var ha na ni.

²⁰A am ngaiha a manchu hale nai pangngai manchu ham kani tia a om tak-ha a tak ningko dan ha lui jui tor mak.

²¹Aninko mi a dang ha na manchu bak a na tak ko ni man chului? Ruk jot mak nati bak nang ko na ruk mo?

²²Numei om pui salui tho maru, natibak nang ko na tho mo? Kut sin Pathian ha enjotlui nang biakinn sunga naruk mo?

²³Dan chong pek jarra man kan lian na ninei tak-ha nang in dan chong pek ha na makhuija adik lui jarra Pathian ha chitlejak na mo nei mak che mo?

²⁴Ajarko hingahin a kan Jiakjui nang ni ruia a dangjatngai karra Pathian ming ha an nuisojui.

²⁵Nang ni dan chong pek ha a jui mikhat naninko vuntan ha a khel la asat ke ani. Tak-ha nang in dan chong pek ha a jui lui mi khat naninko nang na vuntan ha an tan lui ang ani.

²⁶Hiva jarra vuntan lui mi ning dan chong pek ha a jui aninko ama vuntan lui ha vun tan ke tia lui noni u mo?

²⁷Ha aninko vuntan lui mi ning dan chong pek ha an man tung aninko chongthiang rabu sunga ikan jiaksa dan chong pek le Vuntan nan ni nom dan chong pek a juilui nang ha, a man chongtan na mo nanei noning?

²⁸Ajarko ma palla Jiws achang ha Jiw nimak, hale, taksa va vuntan ha vuntan nimak.

²⁹Tak-ha a lung sunga Jiw ani ha Jiw ani hale i kan jiak ha ni luia thavang a lung sunga vuntan ha Vuntan takbal ani; a maha an manpak ha mingai tenna nimak Pathian tenna ani.