Read Aimol ROM 5 Bible Online

ROM 5 - Aimol bible

ROM 5

¹Ajarko takngai han ana mandik jarra keinin kan puma Jisu Khrista jarra Pathian le lunghip lung daia kan om.

²Kan puma jarra keinin kan ngir na manrit na han kan takngai na lutna ranga kan mu jui, hale kein in Pathian lianpui na han tum suam ranga kan mu rang ke tia kan ning asat.

³Hijak ni luia keini pong khodengthei pha han om ningsat na kan nei pong le khodengthei ham a huia kan don.

⁴Kan dui rat han torna kan nei, hale, kan dui rat na han a thianga kan ngaidon ha kein in kan jet.

⁵A thianga kan ngaidon jarra keini ha na man jakma, ajarko keini jiang i na pek thavang thiang tenna keini lung sunga Pathian lungsiat na ha a na bunthuan.

⁶Keinin siatna kan nei lai pha tak han, Khrista ning Pathian jet luingai ranga a thi jui.

⁷Ajarko mi dik khat ranga tu ang khat in a na thi pe hi atang, aninom asat mi khat rang athi pe hi om a jot.

⁸Tak-ha, keinin siatnei mi kan ni lai tak han Khrista ning keini ranga ina thi pe hanna Pathian ning keini tiang lungsiat ana mu jui.

⁹Hiva jarra kan puman hiva khel la thisen ning a tun ana mandik jarra ama tenna keini ha Pathian lung hui mak na tenna na sanring nati.

¹⁰Ajarko kein in ama le kan enda na kan nei lai han ama a pasalnai ha ana thi pe jarra keini ha Pathian le veikhat a na man kan jot jui; ana man kan jot jarra keini ha veikhat ama ringna mun han na san ring nati.

¹¹Hijak ni luia, keini kan puma Jisu Khrista jarra keini Pathian jiang ningsat a kan om, ajarko kan puma ama jarra keinin a tun kan jot na ha kan mu jui.

¹²Hiva jarra mi khat ruia siatna le siatna jarra thina hi a hong jui, hi ang hin mirakip chunga thina hi a suak jui; ajarko mirakip in siatna an tho jui tina anga ani.

¹³Ajarko dan chong pek ha an pek mak ma lai han ramuol la siatna hi alui om, tak-ha dan chong pek i om mak jarra siatna tho ngai rabu hin lui om na mak.

¹⁴Adam tenna thina ha ani Mousi tenna vai a luihom, Adam ning chong pek ha a jui mak ang han an thei jak siatna tho anga ke ani. Adam hiko a hong rang puma ama anga a luini.

¹⁵Tak-ha, ma sial nale siatna ngaidam na anga nimak, ajarko mi khat jak siatna jarra mitam thina an nei hake, Pathian manrit nale miring khat tiko Jisu Khrista manrit na ana pek kutchoi mitam ranga a khel la asat ha ani.

¹⁶Hale miring khat ning siatna a tho jarra kutchoi ha neimak, ajarko, siatna jarra chongtan nimak, tak-ha siatna rakip jarra ngaidam na kutchoi mi dik ha ni na ranga ani.

¹⁷Ajarko miring khat siatna jarra thina ha reng anga a hong chang inko, manrit nale dikna jarra kutchoi han khel la Khrista Jisu jarra ring na ranga Veikhat reng anga kan om rang ke.

¹⁸Aninko miring khat siatna jarra mirakip siatna iman nei ang han, miring khat dik na chuan jarra mirakip om ringna ranga imandik ha lam a kei ruoijui.

¹⁹Ajarko mi khat in chong ijuilui jarra mirakip ha siatna amanchul ang han an khat in chong a jui jarra mirakip ha mi dik man chang nati.

²⁰Hiva jarra siatna man tam ranga dan chong pek ham a hong jui.

²¹Tak-ha thina ha ning siatna reng anga a ong om ma manrit na ning keini kan puma Jisu Khrista jarra a tor ti buia ring na ranga dik na jar han reng anga om na ranga siatna bil han manrit na ning a khel la a hong tamjui.