Read Aimol ROM 6 Bible Online

ROM 6 - Aimol bible

ROM 6

¹Keinin imo kan ti rang? Akhella manrit na kan mu na rang siatna karra kan om chak rang mo?

²Hava ha nima rase! Siatna tianga kan thi jui keinin hava mun han i duk a sot mo kan la om rang?

³Animakle Khrista Jisu jiang tuija baptais tho na kan nei jui keini rakip in ama i thiang han ama le baptais tho na kan nei jui tiha nang nin jet ma che u mo?

⁴Hiva jarra a pa lianpui na jarra Khrista ha a thi ngai kar tenna a ringkhir ang han, keini om a tharra ringkhir omchan ha tum na ranga athiang han baptais tho na kan nei han ama le an na phum suam jui ani.

⁵Ajarko, keinin ama le kan thisuam ang han kan jot aninko a man a ringkhir na han keini om kan kan chel rang ke.

⁶Siatna tak sa hi lamang nata kein in siatna suak ha kan chang mak na rang keini a luisa miha a male kan ruoija Khros chunga kan thi suam jui tiha kein in kan jet.

⁷Ajarko a thisa a maha siatna tenna a man dikjui.

⁸Tak-ha kein in Khrista le kan thisuam aninko, ama le kan ruaia keinin kan ring suam rang ke tihi tak kan ngai.

⁹Ajarko athi ngai kar tenna a ringkhir jui Khrista ha thi lai noning, ama ha athi ranak in veikhat tor lai noning tiha kein in kan jet.

¹⁰A man athi ha siatna tianga vei khat athi jui ke tak-ha ringkhirna a nei ham Pathian tianga aringke ani.

¹¹Nang ni om ha ang han na taksa ha siatna tianga nan thi jui ke, tak-ha Pathian tianga Khrista Jisu jiang kan ringkhir tihi ngaidon ru.

¹²Hiva jarra nang nin siatna lungdo ha juimak na rang a thi ranga a om nang ni taksa ha siatna ning reng anga vaihom ma rase.

¹³Hale nang ni na taksa pumpui ha dikmakna rang tianga pho ang han siatna jiang a pek ha bangru, tak-ha, nang ni nan tak khet in athi ngai kar tenna a ringkhir mingai ang han, nang ni taksa pumpui ha Pathian tiang dik na ranga pho ang han pekru.

¹⁴Ajarko siatna ning nang ni ha vainahom lai noning hale nang niko dan chong pek thuaija nan om nimak, tak-ha manrit na thuaija nan om ani.

¹⁵Aninko, keini hi dan chong pek thuaija kan om lui jarra manrit na thuai lam ma kan om jarra kein in siatna kan tho rang mo? Hava ha nima rase.

¹⁶Thina i man suak siatna ning ani nom, chong jui jarra dik na i man suak aninom, nang nin chong jui ha nan chang na rang suak ang han nan kan pek lut; nang nin a chong nan jui amasuak kan ni tihi jet ma che u mo?

¹⁷Tak-ha nang nin siatna suak nan lui chang ani nom, nang ni ha an na man chu a an na pek jui jarra nang nin nan lui chong ha nan jui.

¹⁸Hale, siatna suak nan lui chang tenna an na hong ma sua, nang ni ha dik na suak lam an na man chang jui.

¹⁹Miring tak sa nan ni jarra kein in miring omchan anga ka ri ke, ajarko tho salui ha tho na ranga a thiang lui le tho salui tianga suak chang na rang nan taksa pumpui nan pek ang han; atunko a thiang chang na rang le adik suak ha chang na rang nang ni nan tak sa pumpui ha pek lutaru.

²⁰Ajarko nang nin siatna suak nan chang lai han, dik na tiang han ko an ma sua ha nanluini.

²¹Ha aninko hava lai pha han nang nin imo nan lui tum? Hava chuan ngai jarra atunko nang nin jak na ha nan mu jui, hava chuan rakip amongna ha ko thina ke ani.

²²Tak-ha a tunko siatna tenna a na hong ma sua jui jarra Pathian suak ha an na man chang jarra thiang na ha tum na rang an khat om a mong na ha ko ator ti buija ring na ha tum rang nan ni.

²³Ajarko, siatna lo man ko thina ke, tak-ha Pathian jiang a man buia kutchoi ha ko keini puma Jisu Khrista jiang a tor ti bui ring na ha ani.