Read Aimol ROM 7 Bible Online

ROM 7 - Aimol bible

ROM 7

¹U le naingai miring ning a ring kar je dan chong pek thuaija i om ke tihi nan jet lui mo? Hivahi dan chong pek a jet mingai ranga ka ri ani.

²Ajarko inn ineisa numei khat in a lompa dan chong nuk juia a khit a om, tak-ha a lompa ha athi suale ko a lompa dan chong ha ning khit lai mak.

³Tak-ha a lompa a ring kar je a man a dang pasal khat le inn aneiret aninko ama ha, chong jui lui numei tinanti. Aninnom a lompa athi suale ko ama ha hava dan chong pek ha ning khit lai ma; hiva jarra ama ning a dang pasal khat le inn a nei anin nom ama ha chong jui lui ni lai ma.

⁴E, ulenaingai ha ang han nang ni a dang khat, tiko, athi ngai tenna i ringkhir jui amata chang ranga nang ni om Khrista tak sa jarra dan chong pek tianga nan thi jui ke; hivahi kein in Pathian tianga khel la nem na ranga ani.

⁵Ajarko kein in taksa tianga kan om lai han dan chong pek nuk jui a siatna lungdo han thina ranga keini ning kan taksa jiang chuan alui tho.

⁶Tak-ha, a tun ko keini ana lui khit ha athi jui dan chong pek tenna a na ma suajui, hiva jarra dan chong pek rabu lui ha niluia thavang tianga a thar ham kan ngaidon.

⁷Aninko kein in ije kan ti rang dan chong pek ha siatna mo ani? Hava ha nima rase, tak-ha dan chong pek jarra niluia kei ning siatna ha lui jet noni king; ajarko na pham rai man siat maro ti a dan chong pek han aluitimak aninko kei ning pham rai siat hi lui jet noning.

⁸Aninnom siat nan matacha rakip a mua keihi a na man tho jot, ajarko chong pek ha dan kan chel luija siatna ko athi sa ke.

⁹Kei ning a phat khat han chong pek kan chel lui a ka lui ring, tak-ha chong pek ha a hong na khan ko siatna ha a ring khirra kei lam ka thi jui.

¹⁰Hale ring na ranga a na pek chong pek tak hi kei ranga ko thina rang a suak jui.

¹¹Ajarko siat nan matacha a mua chong pek jarra kei ha leisei ana man tho jarra kei ha a na that jui.

¹²Hiva jarra dan chong ha a thiang hale chong pek ha om a thiang, adik an khat om asat ke.

¹³Ha aninko asat ha ning kei ranga thina rang mo ini? Ha nima rase, tak-ha, siatna ha ko, siatna ke tia dona ranga asat jarra siat nan kei jiang a var chuan rakip ha kei jiang thina rang lam a nei jui, hivahi chong pek jarra siatna ha khel la siat nei chang na ranga ani.

¹⁴Ajarko dan ha ko thavang ta ha ani tia keinin kan jet, tak-ha, kei ko taksa mi ka ni jarra siatna kut chunga an na juorjui.

¹⁵Ajarko, ki tho chuan ha kei ning jet making, hale kei ning ki tho jot ha kein ki tho nimak, tak-ha, kein ki matir tak-ha ka tho.

¹⁶Tak-ha, ki tho jot chuan ha kein ka tho aninko; dan ha asat ani, hale kei ka kan jot.

¹⁷Hiva jarra hava i tho hi kei ning veikhat ki tho nima tak-ha, ka sunga i om siatna han ning ke.

¹⁸Ajarko kei ka sunga asat ha om mak, tihi kei ning ka kanjet, ha jar han lungdo ha ko kei jiang a om, an in nom asat ha tho na rang om mak.

¹⁹Kei ning asat ki tho jot ha tho making tak-ha kein ki tho jot lui a satlui lam ha ke ka tho.

²⁰Tak-ha kein ki tho jot lui ha ka tho aninko hava ha kei ning ki tho nimak, ka sunga om siatna ha ning atho ani.

²¹Kei ning dan ka mu tiko, kein asat ka tho jot kar ha a satlui ning a na ruai chak.

²²Ajarko, ka sunga i om mi hava nuk juia Pathian ning chong atan rang jarra ka ning asat.

²³Tak-ha ka lung in i jot dan chong pek ha a enda va an kan sual, ka tak sa sunga a om siatna chong pek nuk jui a ren inn sunga kei ha an na hong tuang ha ka sunga ka mu.

²⁴Kei hi iduk ravan bui mo ka ni, a la thi rang taksa kei hi tu ning mo an na san rang.

²⁵Keini kan puma Jisu Khrista jarra ani tia Pathian ha ka manpak, ka tak khet in ka lung sunga Pathian dan ha ka ngaidon; tak-ha taksa lam ning siatna chong pek ha a ngaidon.