Read Aimol ROM 8 Bible Online

ROM 8 - Aimol bible

ROM 8

¹Jisu Khrista jiang a om rakip ha a satlui na rang om mak.

²Ajarko Jisu Khrista jiang a om thavang jiang dan ha ning kei ha siatna le thina chong pek tenna ana masua jui.

³Ajarko taksa le dan ani tir lui ha Pathian ning a pasalnai khat jak ha siat nei taksa ang hin siatna ranga a hong tir jui, taksa jiang siatna ha a man nei jui.

⁴Tak sa lungdo nuk juia che ha ni lui a thavang lungdo nuk juia kan che keini jiang dan chong ri a man tung na ranga ani.

⁵Ajarko taksa lungdo ajuingai ha ning taksa ranga an ngaidon, tak-ha thavang lungdo a jui mingai ha ning thavang ranga an ngaidon.

⁶Ajarko, taksa lungdo ko thina ani, tak-ha, thavang lungdo ko ringna lunghip na ani.

⁷Hale taksa lungdo ha ning Pathian chunga enda na a nei, ajarko Pathian chong pek na dan jui jot ma, hale jui om jui tor ma.

⁸Tak sa lungdoa omngai ha ning, Pathian lungdo man tung tor ma u.

⁹Tak-ha Pathian thavang ning nang ni jiang a om inko nang nin taksa lungdo a nan om ke; hale tu ang khat lung sunga Khrista thavang ha a om mak inko ama ha Khrista mi ha nimak.

¹⁰Tak-ha Khrista ning nang ni jiang a om inko, taksa ko siatna jarra a thi jui ke, anin nom thavang ko dik na jarra ring nati.

¹¹Ha an in nom Jisu ha a thi ngai kar tenna i man ringkhir ama thavang ha ning nang ni jiang a om aninko, Khrista Jisu ha a thi ngai kar tenna a ringkhir ama ning nang ni jiang a om ama thavang jarra a thi rang suak kan taksa ha na manring pe nati.

¹²Ha aninko, ulenaingai keinin taksa lungdo jui na ranga taksa lamal kan tual nimak.

¹³Ajarko nang nin taksa lungdo nuk juia nan ring aninko nan thi rang ke, tak-ha thavang jarra nang ni taksa chuan ha nan man thi aninko ring na nan mu rang ke.

¹⁴Pathian thavang ning a na ruai kar je ko Pathian naingai ha kan ni.

¹⁵Ajarko nang nin veikhat chitret na ranga suak chang ranga thavang ha nan tum nima, tak-ha Pathian naingai chang na ranga thavang ha nan mu ke; hiva jarra kein in a pa tia kan kui.

¹⁶Keinin Pathian naingai kan ni tihi thavang thiang in keini thavang le a kan ruaia shakhi a pek.

¹⁷Hale a naingai kan ninko nai charapa kan ni, ama le kan ruaia kein in lianpui na musuam ranga hale ama pong khodengthei ha kan duisuam aninko Pathian le Khrista nai ha kan ni jui.

¹⁸Ajarko, a tun pha hin kan pong khodeng kan thei hi keini jiang an na pek rang lianpui na hale khide rang phur hi om ma tihi kei ning ka ngaidon.

¹⁹Pathian naingai ha do na ranga a ring rakip in ngak lal tak a an om.

²⁰Ajarko a ring ngai ning nem na rang bui mun han om hi an dei nuk juia nimak, tak-ha; jet chiak an ngaidon na Pathian lungdo man tung na rang ke.

²¹Ajarko, jibaning ngal lom man ranga suak an lui chang ha Pathian naingai lianpui na jarra ma sua nanti u.

²²Atunnom a ring rakipngain antai rasa numei kan jir rang tianga antai anga ani.

²³Hale havajak ni luia a rapa thavang phual mu keini om a naingai kan ni tiko kan taksa sanring ranga kan ngak kan taksa sunga a om ma a nai ana man changa ana ma suajui.

²⁴Ajarko keinin kan jet chiak kan ngaidon jarra a na san ring jui, tak-ha mubak ngaidon ha jet chiak ngaidon ha nima; ajarko ama ning a mu jarra jet chiak ngaidon na nei nati mo?

²⁵Tak-ha keinin kan mu torlui ha jet chiak kan ngaidon inko keinin hava ranga asatianga kan ngai.

²⁶Ha ang han thavang ning om keinin kan tor mak na pha han a na san, ajarko keinin ija mo, i ha mo lam na kan nei rang ha jetmasing; tak-ha Thavang Thiang ataktak in ri na buia a tai le kan ruaia keini ranga a na varpui.

²⁷Hale kan lung itok Pathian ama ning thavang lungdo ham a jot, ajarko thavang ning Pathian lungdo nuk juia a thiang mingai ranga, a varpui.

²⁸Pathian a lungsiat mingai ha ama lungdo nuk juia akei suakngai jiang sat na ranga chuan rakip a tho pui suam tihi kein in kan jet.

²⁹Ajarko Pathian ama ning athang suak anmani ha a nai le a man kan anga, a pasalnai ha a u anai rakip karra ulian tak a man chang.

³⁰Pathian ning a rapa alui varsa anmani ha a kui jui, a kuisa anmani ha a man dikjui, hava suale anmani ha lianpui na a pek.

³¹Hiva rakip jarra keinin imo kan ti rang? Pathian ning keini ranga ani jui kenna, keini ana enda rang an la om mo?

³²Pathian ning a pasalnai ha sanring luia, keini rakip ranga ana pek ama ning a pasalnai hale kan ruaia phur rakip om keini jiang ariam ma ina pek lui rang mo?

³³Pathian ning athang suaksangai chunga tu ning mo chong an la ri rang? Amandik ha ko Pathian ani.

³⁴Anmani ha tu ning mo man lal na an nei rang? A lui thi ha Khrista Jisu ani, hiva khella a thi ngai kar tenna a ring khirra Pathian chang tiang han a onga keini ranga a na var pe.

³⁵Khrista lungsiat na ten han keini ha tu ning mo ina man kansen rang? Lung kannok in mo; pong khodengthei in mo, von cham tuiral jara mo; puan le diar om lui han na mo, kutsuikesui han na mo, animakle chemsei han na mo?

³⁶An lui jiak sa ang hin; Puma nang rang jarra keini hi a pha rakip an na that, that ranga belram ang hin keini ha an na ngaidon.

³⁷Ha an in nom hiva rakip jarra keini ha a na lungsiat Puma jarra keinin khel la torna ka nei.

³⁸Ajarko kei ning takngai na kanei, tiko thina ning anin nom, ring na ning anin nom, thanei thiangai anninom, a tor pungai, a tun pha hin an in nom, a hong rang pha han an in nom, ranakneingain anninom.

³⁹Chung chuan na ning an in nom, a thuk thuainung tak in an in nom, tu ang khat a ring an in nom, keini kan puma Jisu Khrista jiang i om Pathian lungsiat na han keini hi na man kan sen tor lai noni u.