Read Aimol ROM 9 Bible Online

ROM 9 - Aimol bible

ROM 9

¹Kei ning Khrista a mi ka ni jarra adik ha kari, leisei ri making, Thavang thiang jarra kei adik dik lui jet na ka lung sunga keini le kan ruaia shakhi ka pek.

²Kei ka lung dong na a tam tak amongtibuia a nat ka nei.

³Ajarko taksa lam tianga ka u ka naingai jarra ka tak tak hi kho khong tung na ranga, Khrista tenna kansen pui na hi ka lui ngaidon tor rang ke ani.

⁴Anmaniko Israelngai anni, nai charapa an chang, lianpui na, chongtan na, dan chong pek le chubeibuk hale chongsan rakip om anta ani.

⁵Pu le pangai ham anmani tenna anni taksa tiangam Khrista ha anmani sung tenna ani, Pathian ko i rakip chunga a om le kan ruaia a tor ti buia manpak rang a suak, Amen.

⁶Aninnom Pathian chong ha nemna bui hong nimak, hale Israel sung tenna an hong lim ha Israel nima u.

⁷Abraham vonchoi tenna anni jarra a naingai ni ver ma u, tak-ha Isak tenna an phut nang na vonchoi rui ha ti nanti u.

⁸Hiva jarra taksa naingai ha Pathian nai chang ma u, tak-ha chongsan nuk juia naingai ha vonchoi rui tianga telna an nei.

⁹Pathian chongtan na ha hingahin ani, a pha a hong tung kar han kei ka hong rang ke hale Sara ning pasalnai an khat nei nati.

¹⁰Hi jak hi ni luia Rebika ning Kan pu thui Isak le nai anni an lui nei.

¹¹Naingai ha nai an hong chang mak ma, hale a satlui an tho mak ma Pathian ning a ngaidon nuk juia a kui suak, ti ko chuan na ni luia athang suak hanna ani.

¹²Rebika jiang a ti, ulian lam ning nai pang jiang aduk lut nati,

¹³Jakob ha kei ning ka lung asiatjui, hale Ishou ha ka matirjui, tia alui jek anga ani alui kan jiak sake.

¹⁴Pathian hi keinin mi chang mi kha a nai kan ti rang mo? Hava ha nima rase.

¹⁵Puma ning Mousi jiang a ti, kei ka lungsiat ha ka lung ki man siat rang ke, hale kei ning ki manrit ha manrit na ki nei rang ke.

¹⁶Hivahi miring lungdo le chuan na nimak, tak-ha Pathian manrit na jarra ani.

¹⁷Chong thiang rabu ning Pharo jiang a ti, kei ning nang jiang ka ranak hi do na ranga hale ramuol pumpuia manthang na ranga, nang ha reng ka na manchang.

¹⁸Hiva jarra Puma ning i ngaidon jiang han lungsiat a mu, hale i ngaidon ama ha a lung a man ngam.

¹⁹Ha aninko nang in kei jiang ni nati rang ke, iruia mo Puma ning a satlui akei sua? Ajarko Puma lungdo ha tu ning mo kan khap tor rang?

²⁰Tak-ha ae miring Pathian jiang na sangkhir nang tu mo na ni: An sin phur ha ning a sin pu jiang han i ruia mo hingahin ni na sin tia ri thei nati mo?

²¹Belsin pa ning Simlei a her ha a mel sat det a sin, a her ha a mel siatdet a sin, simlei ha a lungdo a i sin jot na han a sin mo nimak?

²²Puma ning ama lianpui na ranga man lai alui varsa manrit na bel, tiko, Jiwngai ranga jak ni luia a dangjatngai rang om ama ning alui ngaidonsa ani.

²³A ma lianpui na ha manjetna ranga Pathian ning ama rang na ha lung thak na ha, hale a ranak rat na ha a do jot innom,

²⁴manmang a rahui suak Jiws le jatdangngai rakip ha lungsiat a ina thang suaksa ani jarra, a lung a kan churra a om ani.

²⁵Puma ning Hosia rabu sunga ari ang han, kei ka mi an lui ni lui anmani ha kei ning ka mi ka man chang hale, ka lung alui siat lui numei ha ka lungdinu tia ka kui.

²⁶Hin ang hin ni nati nang ni kei ka mi nima che u tia anmani jiang alui ti na mun han anmani ha a ring Pathian a nai pasalngai tia kui nanti u.

²⁷Isaia ning Israelngai ranga alui ri, Israelngai mi mal hi tuionglian leidi khan anninom; a liamlim ha sanring na mu nanti.

²⁸Puma ning ama a chong ha hiva ramuol tenna manbong kak alui khir nati.

²⁹Isaia ning alui ri anga ani, Puma ralmingain keini jiang nai an na lui mak pe mak inko keini hi Sodom le Gomara anga kan lui ti rang ke.

³⁰Ha aninko keinin imo kan ti rang? A dangjatngai ning dik na ha tok lui a an hong mu, hivahi takngai jarra ani.

³¹Tak-ha dik na hi dan ruia an tok, Israelngai ning dan jui tor ma u.

³²Iruija mo? Ajarko anmanin takngai jarra dik na ha tok ma u, tak-ha chuan na lam an lui tok, anmanin lung chunga kutsuikesui na an nei.

³³Hi ang hin a kan jiak, enru Zion na kutsuikesui na rang le kan lum na ranga lung lianpa kei ning ka tet, hale Puma takngai ama ha jak na man nei noning.