Read Aimol 1 KORINTH 14 Bible Online

1 KORINTH 14 - Aimol bible

1 KORINTH 14

¹Lungsiat ha nodru, hale nan lung sunga Thavang Thiang kutchoingai mu na ranga deiru, a chung chuan na Pathian kutchoi chongsat ha rina thoru.

²Ajarko mi ning jet lui chong ari ama ha mi jiang ari nimak tak-ha Pathian jiang ari ani, ajarko tu khat ning om ari chong ha jet ma u. A man ari Pathian chong ha Thavang Thiang ranak a ani.

³Jet thei na khat a mi khat ning mirakip jiang Pathian chong ari, Aluisan, thanuam na, lung ngam na alui pek.

⁴Mi ning jet lui chong ari ama ha ko a tak rang jak a kansan ani. Hale mi jiang Pathian chongsat ari ama ha ko ramuol la biakrup rakip asan ani.

⁵Mi ning jet lui chong ha ka na man ri jot tak-ha Pathian chongsat nan ri lam asat det ajarko, mi jet lui chong ha a malerang mi an om mak inko biakrup ranga a nem na om mak. Hiva jarra Pathian chong ri lam han asat det.

⁶Ulenaingai kein ka hong nga nan jet lui chong ka ri aninko ijamo nang nin kei jiang nan nem na nan mu rang, pathian in ana man mu, chingna theina, chongsat ngaiha ija mo nan jet rang?

⁷Thavang abui Khuang dar rasangai ham ho mo theili hale homo sa nan ta tihi a kan khel na rasa a om mak inko ijamo mi ning an jetthei rang?

⁸Ajarko ral che na pengkul han a thianga a rasa asuak mak inko tu ning mo ral ranga an kan ning rang?

⁹Hiva anga nang nin jet torlui chong nan ri aninko, imo na ri tiha ijamo an jet rang? Ajarko nang nin nan ri ha phaivou jiang ani.

¹⁰Ramuol chunga chong atam a om nom an kan jet torlui chong ite khat om mak.

¹¹Tak-ha kein nan ri chong ha ka jet mak aninko, ama ha kei ranga ram dang khat a ahong miha ani, hale kei om ama ranga ram dang khat a ahong miha ka ni jui.

¹²Hingahin nang nin Thavang kutchoi nan dei jarra biakrup a lian thei na ranga nang nin a khel la thoru.

¹³Hiva jarra mi jet lui chong ari ama han chong ma le na ranga lam na nei rase.

¹⁴Ajarko kein mi jetlui chonga lam na ka nei karra, ka thavang ningko a lam tak-ha ka lung ning lui jet tor mak.

¹⁵Hi aninko kei imo ka tho ani? Ka thavang ning a lam karra ka lung in nom lam na a nei, ka thavang ning la atho karra, ka lung in nom la a tho rang ka suak ani.

¹⁶Hingahin animak inko, na thavang ning lam na a nei karra ija mo tual la a om khat ning, Amen itirang, nang in na lam ha ama han a jet mo?

¹⁷Ajarko nang in lung lut a lam na na nei nom, midang khat jiang ko a nem na lui om mak.

¹⁸Kein mi jet lui chong nang ni nek a ka ri tor jarra, Pathian ka manpak.

¹⁹Tak-ha biakrup mingai jiang le midangngai manchu na ranga ko, jet lui chong mal lising khat ri nek a chong mal ranga jak ka ri rang ke.

²⁰Ulenaingai nan lung sung nai pang anga om maru; a salui chuan na nai pang ni ru tak-ha na lunga ulian ni ru.

²¹Che na dan na alui kan jiak mi ning jet torlui chonga hale mi ning an jet torlui mingai murchunga kein ka man ri rang ke, tak-ha anmanin kei ka chong ha jet noni u pathian in alui ti.

²²Mi ning an jet torlui chong ha ko takngai lui mingai jet thei na ranga ani takngai mi ranga luini mak tak-ha Pathian chong ri ha ko takngai le takngai lui ranga ani.

²³Hiva jarra biakrup rakip ning nan kan chun na, nan renga nan jet lui rang chonga nan ri inko takngai lui mi, ram dang khat a ahong mi ning an na nu inko nan vet jui anti lui rang mo?

²⁴Tak-ha mirakip ning Pathian chong an ri aninko, takngai lui mi ning a jet karra ama han a siatna tenna lung thulna nei nati.

²⁵A lung ril la a om a salui ngaiha a hong kando rang ke hale a lu kun na ta ama han Pathian chubei a buk rang ke hale pathian hi nan karra a om tia a man ati rang ke.

²⁶Hiva suale imo a om? Ulenaingai nang nin Pathian lam na nan nei racham mi khat ning la mi khat ning Pathian chong ri, mi khat ning mi jet lui chong a ri, mi khat ning chong maleranga khat le khat nan om pet. Hiva rakip hi biakinn lian thei na ani tia luiru.

²⁷Mi jet tor rang chong a ri jotngai ning chong mal anni, an thum jak ri rase hale a chong ri ha ma le rase.

²⁸Tak-ha a chong maleranga tu khat an om mak inko anmani ha biakrup sunga om chian rase u, hale an thei rang jak Pathian jiang kan lam rase.

²⁹Hale Pathian chong lui ri mi anni an thum ning ri rase u, hale a dangngai ning adik dikmak tiha ngaidon nanti.

³⁰Biakinn sunga a ong mi khat ning Pathian chong a man ri a chang inko, a rapa chong lui ri ama om chian rase.

³¹Ajarko nang ni nan renga a don na Pathian chong ri ha a jot, hingahin khat le khat ning jet thei nale thanuam na nei nanti.

³²Pathian kutchoi chongsat a ri jotngai ham. Pathian chongripa ama kut a om nanti.

³³Ajarko puma ning a khek ngaiha dei mak, tak-ha ahip adai ha a dei. A thiang biakrup rakip ning hingahin nan che rang ani.

³⁴Numeingai ning biakrup sunga omchian rase u. Anmanin chong ri jot mak, a sin na om rase u, ajarko che na dan hin alui om.

³⁵Hale anmani ning an jet jot a om inko an pasalngai jiang inna dingkel rase u, ajarko numei ning biakrup in thianga chong ri hi jak rang a om.

³⁶I mo? Nangni tenna Pathian chong ha a hong suak mo? Animakle nang ni jiang Pathian chong a hong lut mo?

³⁷Tu ang khat ning Pathian chong ri ka ni akanti aninko animakle thavang kutchoi ka nei ati aninko, kein nang ni jiang ka hong jiak chithi hi Pathian chong pek ani tia ngaidon rase.

³⁸Hale ama han hiva hi a jet mak aninko, nang nin nom ama ha jet maru.

³⁹Hiva jarra ulenaingai nang nin lung lut a Pathian chong riru hale mijet thei lui chong ri ngai ham khap maru.

⁴⁰Tak-ha chuan rakip hi asat a a don don na thoru.