Read Aimol 1 KORINTH 2 Bible Online

1 KORINTH 2 - Aimol bible

1 KORINTH 2

¹U le naingai kein nangni jiang Pathian chongruk chong dik ha ka lui ri han chingna le thei na chong a ngarra lui ri making.

²Ajarko kein nan karra a thei lui anga ka lui om ma Jisu Khrista ha thing khros chunga a thina jak ha ka lui ri ani.

³Nan karra ka om lai asin na ka omma chit le kan ruaia ka lui kan nik.

⁴Ka luiri chongngai ha miring theina jetna tianga luini mak, tak-ha Thavang Thiang ranak ha dona ranga aluini.

⁵Nang nin nan takngai na ham miring chingna theina jarra nimak, tak-ha Pathian ranak nan chunga a om ani.

⁶Kein chingna theina ruia Pathian a jet mingai jiang ka lui ri, tak-ha hiva chingna hi ramuol la vaihomngai alian arangngai ranga chingna ha nimak. Ramuol la chingna ngai hako a mang so jui.

⁷Tak-ha ramuol a luisin madona Pathian in keini lurna ranga athup chian na ana lui siak pe Pathian chongruk chingna ha kei ning kari ani.

⁸Hiva chingna hi ramuol la alian arang tute khat ning luijet ma u, ajarko anmanin hiva chingna hi an lui nei aninko puma ha thing khros chunga lui that noni u.

⁹Chongthianga alui kan jiak mit ning om lui mu phat mak, kuar ning om lui jet phak mak, hale miring lung sung om nai lui chang mak, puman a lungsiat miringngai jiang a alui sin rakip ha.

¹⁰Pathian in keini jiang Thavang Thiang tenna ama chong ruk ha ana manjet jui Thavang Thiang in irakip a Pathian lung rilla a om ha a tok.

¹¹Miring sunga a om Thavang han a maha a jet, hingahin Pathian Thavang han Pathian a ruia a jet tor.

¹²Keini ramuol la Thavang ha nei masing, tak-ha Pathian ning a hong tir a thiang Thavangai ha kan sunga a om, ama han i rakip ana manjet.

¹³Hale keinin miringai chingna han mi manchu masing tak-ha Thavang Thiang a nei mingai chunga Thavang ning chong dik ha a ripe.

¹⁴Thavang Thiang anei luia ma han Thavang kutchoi Pathian tenna a hong ha mu tor noning, ajarko ama ranga hava ngaiha a pang chuan ani ama han lui jet tor mak.

¹⁵Thavang Thiang a nei ama han irakip a dan a en tor tu khat ning om ama chunga ko dan en tor ma u.

¹⁶Pathian chong thiang in a ti, tu ning mo Pathian lung ha a jet? Tu ning mo Pathian ha an manchu rang? Tak-ha Jisu Khrista ama lungdo ha keini jiang a om.