Read Aimol 1 KORINTH 3 Bible Online

1 KORINTH 3 - Aimol bible

1 KORINTH 3

¹A thianga ulenaingai kein nang ni jiang Thavang Thiang anei mi anga na ri making, tak-ha ramuol la a om mi Khrista jiang takngai na alasin nai pang anga ka na ri ani.

²Kein salkhom a ri ka na pek ani, a tak ko na la pek making, ajarko nangni ning la jet tor ma che u, a tun tunga la kan ning ma che u.

³Nangni hi ramuol la taksa nai anga nan la om, ajarko nang nin kan sual kan se hale en lal, kan ri siatngai ning nang ni ha ramuol la taksa nanni tia kan dang mak mo?

⁴Tu khat ning kei Paul jiang ka om, an khat ning Apollos jiang ka om anti aninko a thianga taksa lungdo nimak mo?

⁵Apollos ha i rang mo ani? Paul ha tu rang mo ani? Pathian in a na man tho nuk jui a ama chuan ha kan tho hale nang nin takngai na nan nei.

⁶Kein thing kung ka ling, Apollos ning tui a chai, tak-ha Pathian ning a man kan son ani.

⁷Thingkung a ling ham, tui a chaiham i om nimak tak-ha thing kung a man lian pa Pathian ha a lut tak ani.

⁸Tui pek pu le thing kung alingpa an kan ang rip an tho nuk juia an pong lo mu nanti.

⁹Ajarko keini ning Pathian chuan sin kan ni, nang ni lam alui puk ha nan ni. A man a sin in ha nan ni.

¹⁰Pathian a mi lungsiat thei na ha kei jiang a na pek nuk juia, a chingpa insin khat anga kein in mun ka lui thual, hale a dang mi khat ning hava chunga in asin mirakip ning in ha ija mo an sin rang tia lung lut a en rase u.

¹¹Tu khat ning om jisu Khrista ning alui thual in mun ha ni luia in mun thual tor ma u.

¹²Atunko mi aviar ning sana ruphaija an sin, mi aviar ning chaponna, aviar ning thinga an lui sin.

¹³Hale an sin in ngaiha iduk mo angar tiha nikhat ko a la kando rang ke. Mi ning dan an la en rang ke, asat satmak an chuan sin ha la kan dang nati.

¹⁴Mei ning akang torlui in sinpa ama hako a ponglo mu nati.

¹⁵Tak-ha tu khat ning a sin in ha mei ning akang inko ama ha khodengthei na mu nati ama han ringko ring nati tak-ha mei ning a kang jui.

¹⁶Nang nin nan jet jui, nang ni hi puma in thiang ha nan ni, hale Pathian Thavang Thiang ha nan sunga a om.

¹⁷Hiva jarra tu khat ning Pathian inn thiang ha a manmang aninko, puma ning ama ha a manmang rang ke ajarko Pathian inn thiang ha a thiang ani, hale nangnilam ama inn thiang ha nan ni.

¹⁸Nang ni tu khat ning om kan huang maru. Nan karra ka ching tia a kan ngaidon ama ha a pang tak kani ti rase han a maha ching nati.

¹⁹Ajarko hiva ramuol la ching na ngai hi puma jiang ko a nem na bui ani. Hingahin chong thianga alui kan jiak aching atheingai lungdongai rakip puman a churpet.

²⁰Hale puman a jet, aching atheingai lungdo ha ko a nemluirong ani.

²¹Hiva jarra tu khat ning om kein i rakip ka nei, ka tho tor tia man kan lian na nei ma rase.

²²Paul mo Apollos mo, hale Kephas mo, ramuolla a om ringkho hi thi nale ring na a tun tak animakle nuk a aninom a renga nang ni ta ani.

²³Hale nang ni hi Khrista jiang om ru, Khrista om Pathian jiang a om.