Read Aimol 2 KORINTH 11 Bible Online

2 KORINTH 11 - Aimol bible

2 KORINTH 11

¹Kei ka pang na aviar a om hi na jet peru, lungsiat tak a!

²Kei ning nan chunga a thianga Pathian mit en na en lal na ka na nei, ajarko nangni hi numei thiang khat anga kei le chong kan torna nan neia Khrista le lu huang rang ha nanni jui.

³Tak-ha kein ka chit rul ning Eve jiang alui huang anga, nang nin Khrista jiang lung lut a nan om ha asalui ning na manmang ma rase.

⁴Ajarko keinin Jisu Khrista chongsat kan lui ri ha niluia Khrista a dang khat ruia midang khat ning an ri nom, animakle Thavang Thiang a dang khat ha nan lui jui achang nom, animakle Pathian chong dang khat an lui ri aninko nang nin ningsat tak a lui jot peru.

⁵Kein ka ngaidon, tirlon a lian tak kani a kanti ngai nek a keihi Shindet making.

⁶Chong ri a animakle chingna theina ka lui nei mak nom, nangni jiang phat rakip le chuan rakip a athianga ka na lui manjet jui.

⁷A man buia kein nang ni jiang Pathian chong ka lui ri, nangni hi aman nei mi kana man chang jot jarra keihi kalui man kansin. Hivahi siatna ka tho mo ani?

⁸Kein biakrupngai jiang loman pong man ka lui bak a nangni ka na san na ani.

⁹Nan karra ka lui om lai kein nangni jiang ite khat na lui lam making, kei jiang a lut rakip ha Makidonia tenna a hong ule naingai ning an na pek ani.

¹⁰Khrista jiang adik ha ka sunga a om jarra kein chong lian ka ri hi Akaia ram sunga bang noning.

¹¹Hivahi ka na lungsiat luia mo ani? Pathian in a jet, kein ka na lungsiat ha.

¹²Kein ka tho chuan ha ka tho theng rang ke, tirlon a thiang ngai ning chong lian an ri mak na rang le, tirlon chuan tho kan ni an ti mak na ranga ani.

¹³Ajarko hava mingai ha a thianga tirlon nima u. Leisei chuantho an thei jak a Khrista chuan tho kanni tia a om mingai ha anni.

¹⁴Ngak maru! Seitan a tak tak ning om Thavang avar anga avar tor!

¹⁵Pathian suak khat ning, Pathian jiang a thianga a om pa ama nun chan tho ha ite khat tat mak. A torna nikhuo han an tho nuk juia an mu rang ke.

¹⁶Kein ri ret kati, tu khat ning om kei hi mi pang nati maru; tak-ha nan nati achang nom kei hi mi pang tia na luiru. Hi aninko chong lian aviar ri tor kati.

¹⁷Kein chong lian ka ri ha pathian in a jot a ka ri chang mak tak-ha mi pang anga ka ri ani.

¹⁸Mi atam lam ning taksa lam hin ma kan lian na an nei kei om ka ni.

¹⁹Ajarko nang nin aching nan changa a pangngai ha jet pe ma che u.

²⁰Nangni hi tu khat ning suak an na manchang karra an na ve nom, nan mai an ben nom, an na a e sel karra nan jet pe.

²¹Hiva ngaiha kei rang ko a shindet! ri ranga jak na a om. Tak-ha tu khat ning ite khat a aman kan lian aninko kei om apang anga chong lian ka ri thei.

²²Anmani ha Hebru mo anni? kei om ka ni anmani ha Israel mo anni? kei om ka ni. Anmani ha Abraham tenna a hong mo anni? kei om ka ni.

²³Anmani ha Khrista asuak mo anni? kei lam asat suak ha ka ni. Chuan tho hin kein ka khel ren inna a om kein ka khel, tel tor luia mol ka tong hale ka lui thi de deng.

²⁴Vei ranga tak Jiwngai molla vei somthum le kua an na lui ve.

²⁵Veithum tak thirmolla an na lui ve veikhat lam lunga anna lui deng. Veithum tak rokuang a kan let kanang Sun khat le jan khat tuija an na lui ting.

²⁶Ram chei ka che racham pong na ka lui nang. Tui kuanga mi rukngai kut chunga kan ram sunga Jiws Kut chunga, Jatdangngai kut chunga, khopuilian na hijat a tuionglian hin nom, anilui chuan tho ulenaingai jiang om khodengthei na an na lui pek.

²⁷Thavang ponga chuan ka lui tho, jan na jal luija, voncham tui ral la, bunek luia, puan si buia, a dai karra ka lui om.

²⁸Hiva ma pal la chuan ngai jak niluia ani tin hin biakrupngai ka ngaidon na ka thavang ponga ka om.

²⁹Mi khat ning an sual karra kei om ka sual mo nimak? Tu ning mo siatna amanchul kei ning jet luia.

³⁰Kein chong lian ka ri rang aninko kei ka sual na rakip jarra chong lian ka ri rang asuak.

³¹Kan puma Jisu Khrista a pa pathian in phat rakip a phual a na pek leisei ni making tihi ama han a na jet.

³²Damaskas ram ma rengpa Aretas nuaia a om Governor ning Damaskas lutna kot rakip a kei na chur ranga mi alui siak.

³³Tak-ha kei kokbong sunga an na thun na kot varal han an na lui masulla ama kut tenna ka hong tan ani.