Read Aimol 2 KORINTH 13 Bible Online

2 KORINTH 13 - Aimol bible

2 KORINTH 13

¹Hivahi veithum changna kein nangni jiang ka hong rang ani. A salui atho mi chunga mi anni animakle anthum ning adik shakhi ha om rase.

²Atuanlai siatna alui tho mingai le a dang mingai jiang ka na manjet ani, katak ka om mak nom atun hin nom ka na manjet ani, ajarko veini changna ka lui hong han nom ka na lui manjet, atun veikhat ka hong inko anmani ha hoi noning.

³Khrista ning kei jiang chong a ri tihi nan jet jui. Puma ko nangni jiang sual mak, tak-ha nangni jiang ranak a rat a a om.

⁴Khrista ha a sual jarra khros chunga an lui that tak-ha Pathian ranak han a ringkhir. Keini om ama jiang kan sual achang nom nangni le chuan kan tho chun jarra Pathian ranak han ama le kan om rang ani.

⁵Nantak nantak ning kan ngaidon ru Pathian jiang takngai jamo nan ring? Nangni ning Pathian ha pummak nan mak mak inko Khrista ha suai luija nangni jiang a om tihi nan jet mo nimak.

⁶Kein nan chunga takngai na ka nei, nangni hi takngai lui mi ha nima che u.

⁷Pathian jiang lamna kan na neipe nang nin siatna nan tho mak na ranga. Keinin lulian na kan nei jui ti ni luia, nangni adik ha thoru, keinin kan suai na a om nom.

⁸Ajarko keini om adik ning a jot lui chuan ha tho tor masing, tak-ha adik jak ha kan tho ani.

⁹Keinin kan sual karra ningsat na kan nei tak-ha nang niko nan rat. Keini ning Pathian jiang kan lam hi nang ni nan kan son na ranga ani.

¹⁰Hiva jarra kei nan karra ka om mak nom chithi ka hong jiak ani. Hingahin kei ka hong karra chong a ngarra ri noning, Pathian ning ranak a na pek hi nang ni na san na ranga ani. Nang ni na set ranga nimak.

¹¹Atunko ka u ka naingai ravansat hong changru; ka na mathem ngaihi jotru; khat le khat kan jotru; a hip a daija omru. Hale lungsiat le lunghip pathian ning na om pui rase.

¹²Ulenaingai lungsiat biang kan tumru.

¹³A thiang mirakip ning nang ni jiang ningsat chong an na hong thuan.

¹⁴Jisu Khrista a mi lungsiat thei nale Pathian lungsiat le thavang thiang kan chun na ha nan chunga om rase.