Read Aimol 2 KORINTH 3 Bible Online

2 KORINTH 3 - Aimol bible

2 KORINTH 3

¹Keini kan theijak a kan man kan lian ret mo a chang? Nang ni jiang animakle nangni tenna na risel jot rang chong ha keini rang alangai ret mo?

²Nangni hi keini chithi kan lung sunga kan sunna a om ha nan ni, mirakip ning jet de rase u.

³A thianga nangni hi Khrista chithi keini jiang a na pek ha nan ni, muk a alui jiak nimak, a ring Pathian Thavanga alui jiak ani, lung chunga a jiak inmak, tak-ha miringngai lung sunga a jiak ani.

⁴Hiva khan na kein in Pathian madonna Khrista jarra lung ngam na kan nei.

⁵Keinin kan theijak a irakip kan torna ranak nei masing tak-ha kan tho torna rakip hi Pathian tenna ani.

⁶A man keini le a tharra kan jot na a neia keini jiang chuan a na man tho ani. Hivahi kut a sun chithi hin nimak, che na dan na akansun om nimak, tak-ha Pathian Thavanga a jiak ani. Ajarko chena dan ko thina ani, Pathian Thavang ning ringna ana pek.

⁷Atunko thina chuan ani tihi an jet chunga Mousi ning lung chunga rabu alui jiak ama lurna han pum el la alui a el jarra Israel naingai ning ama ha lui en tor ma u.

⁸Hi aninko Thavang Thiang lurna, lianna ha ko hava nek a pumvar var noning mo?

⁹Ajarko adik lui chuan tho ning om lurna an nei aninko, kumsot ringna ranga adik chuan tho mingai lurna ha ko a khel la avar rang asuak.

¹⁰A thianga hiva ruia vei khat jak alui hong avartak lurna ha ana lui el bak a atun ko ache jui.

¹¹Ajarko a mang khir ranga lurna lian na ning hapkhat a luivar aninko a var theng rang lurna lianna hako i duk mo a var rang?

¹²Hiva jarra keinin a thianga hava lungdo ha kan nei, ranak neia kan om.

¹³Keini Mousi anga ni masing, avar ning a hong el han amai hi akhumma Israel naingai ning avar ha amang khanna lui en tor ma u.

¹⁴Anlung ngaiha aluingar; anmanin kan jot na rabu lui ha an pa nikhuo han nom maikhu puan ha an lui kan khu, ajarko Khrista jiang a om mi jak ning hava maikhu puan ha mak nanti.

¹⁵Atun tenhin nom Mousi rabu ha an pa karra an lung ngaiha maikhu puan han alakan khupe.

¹⁶Tak-ha Khrista jiang a hong mingai rakip ning hava maikhu ha an mak jui.

¹⁷Pathian ko thavang ha ani, hale Thavanga a om na rakip a Pathian a om. Pathian thavang ning ana masua jui.

¹⁸Keini kan renga maikhu puan tho luia puma lurna han ana man varjui, hale hava lurna ha Pathian a tak tenna a thavanga a hong mankonthul anga keini om ama mel anga ana man kan thul jui.