Read Aimol 2 KORINTH 4 Bible Online

2 KORINTH 4 - Aimol bible

2 KORINTH 4

¹Pathian in lungsiat ana mu jarra hiva chuan kan tho hin lung sin na neimarei.

²Keinin jak na a om chuan rakip ha kan mak jui, hale mi huang leiseitho masing Pathian chong ham anluija ri masing. Adik lam jak hin keini Pathian jiang kan om hale keini mirakip jiang asat ha kando jot.

³Ajarko kein ka ri chongsat ha a kan thup a chang nom a manga a om mingai jiang jak kanthup rase.

⁴Hiva mingai ning takngai na luinei ma u, ajarko kut a sin ramuol pathian in an mit a man jingpe. Pathian tenna a hong avar han an mit leiman varmak. Khrista tenna a hong chongsat ha Pathian a tak tak chong ha ani.

⁵Keini ning kan tak rang jak a kan lui ri chang mak, tak-ha Jisu Khrista hi kan puma ani hale keini hi nan suak kan ni Khrista jarra.

⁶Pathian in a ti a jing karra ka man var rang ke! Hiva pathian hi kan lung sunga avar a na pek Pathian ha ani. A ma lurna ha Jisu Khrista maisuo hin a man var.

⁷Kei ning simleipak bel sunga lal kansiak hi Pathian tenna a hong ranak jet na ranga ani, keini ranak a nimak.

⁸Keini chunga khodengthei anitin an na lui pek tak-ha noi masing. An naluipei tak-ha lui thi masing.

⁹Ana enda mitam an lui om, tak-ha keini sap buia lui om masing, hale kan taksa ngai alui pop tak-ha a kui a mang lui om mak.

¹⁰Phat rakip a keinin Khrista aringti manjetna ranga ama athina ruiha keini kan tak chunga kan lui choi.

¹¹Ajarko keinin kan ringlai hin Jisu Khrista jarra thina rang khan na an na lui tho; hi ang hin Jisu Khrista a ringkhuo ham keini chunga asuak anga ani.

¹²Thina ning keini ranga chuan a tho, ringna lam nangni rang chuan a tho jui.

¹³Ajarko keini om hiva chithi alui jiakpale tak kan ngai suam jarra “Kein nom takngai na ka nei, hale ka lui ri” Keinin nom tak kan ngai hale kan lui ri.

¹⁴Keinin kan jet Jisu Khrista a kei thuipa pathian han keini om na kei thui nati Jisu Khrista le kan ruaia, nang ni ama omna han na tuangnati.

¹⁵Hiva rakip hi nang ni jarra ani, Pathian ami lungsiat thei na ha a hong khel anga, mingai ning om puma lurna le manpak na ha a hong khel.

¹⁶Hiva jarra keinin kan lung man sin masing. Kan taksa ning nikhat nikhat a ahong chaar nom, kan sunga a om Thavang ha ko nikhat nikhat a ahong kan son me men.

¹⁷Hale hiva hapkhat a keinin pongna kan nei ning, ri torluirang ningsatna le lurna ha keini jiang a na pek.

¹⁸keinin mit a mu phur ha en masing tak-ha mutor lui phur ha kan en ani. Ajarko kan mutor phur ha ko hapkhat ranga ani tak-ha mutor lui phur ha ko a mong ti om lui ha ani.