Read Aimol 2 KORINTH 7 Bible Online

2 KORINTH 7 - Aimol bible

2 KORINTH 7

¹Pathian ning keini jiang chongsan na alui nei ha kan mu jui, ka lungsiat ngai keini kan tak le kan thavang a man chok rang rakip ha man thiang tor hale Thavang a Pathian ha chit da om ru.

²Nang nin nan lung kot ngaiha longtaru, keinin tu khat jiang a salui nei masing, mi khat jiang om kan nemna ha tok masing.

³Kein nang ni ha ka na matek nimak, a rapa han nom ka lui ri jui, thisuam ranga aninom, ring suam ranga ani nom nang nihi kan lung sunga nan om jui.

⁴Nang ni chunga kein lung ngam na ka nei, kein nang ni jarra man kan lian na ka nei, khodengthei ka luiduina rakip chunga lung khop na ka nei ka ning atam asat.

⁵Kein Makidonia han ka lui hong tung phat han nom pong kan sakna lui om mak. Amun rakip a kan sual kan se khodengthei na ka lung sunga chit chunga ka lui om.

⁶Pathian ka chit rakip ha lung ngam na ana lui pek, hale Taitas ning alui hong han a khel la lungam na kannei jui.

⁷A ma alui honga ningsat jak niluia, nang nin ama jiang lungam na nan lui pek, hale nang nin keihi nan ning ana bui tia ama han ana ri i duk mo kei chunga nan na san jot a nan om hiva ngai ning keihi a khel la atun ka ning a satjui.

⁸Hiva ka chithi ning nang ni jiang ning dong na a chang nom, kein kan sir making ajarko hiva chithi ning nang ni jiang phat bongkhat jak ning dong na ani rang ke.

⁹Kein ningsat na ka nei hi nang nin ning dong na nan nei jarra nimak tak-ha nan ning dong na ha lung thulna ranga ani. Hava ning dong na ha pathian ning ana nei man ani. Keinin nang ni mang na ko tho masing.

¹⁰Ajarko pathian in ana man pong ha ko lung thulna le kum sot ringna ranga ani, tak-a ramuol la pongna ha ko thina ani.

¹¹Enru Pathian jiang ning dongna nan mu han athiang mi a rak a ama ami lam ha ana man chang na jui Lungthak han kan khang thei na, chuan salui atho ngai chunga man chuna, asat chuan tho jot na lungdo, irakip nangni ning asuai na om luia nan ring jui.

¹²Kein hingahin chithi ka hong jiak hi a salui a tho ama jiang nimak, hale misalui pa ning aman pong ama jiang om nimak, tak-ha keini rang nang nin lunglut tak a nan tho ha Pathian jiang man mu na ranga chithi ka hong jiak ani.

¹³Ajarko keini lung ngam na kan nei jak niluia Taitas jiang ngom a khel la kan ning asat, ajarko a ning dong na rakip ha nang nin nan satna jui.

¹⁴Hiva jarra kei ning nangni ruia man kan lian chong ha ka lui ri. Kei jak na ko lui tho ma che u, hale keinin nang ni jiang kan ril adik chong, hale Taitas jiang nan ruia chong lian kan ri ha adik ani.

¹⁵Hale Taitas a lung pumpuia nang ni jiang a om jui; a chong ri rakip ha nan lui hale chitlejak a nan lui don rakip ha ama han a ngaidon chak.

¹⁶Kei ka ning asat ajarko nangni chunga lung ngam na ka nei jui.