Read Aimol 2 KORINTH 8 Bible Online

2 KORINTH 8 - Aimol bible

2 KORINTH 8

¹U le naingai, Pathian Makidonia biakrup jiang ami lungsiat theina a pek ha kan na manjet jot ani.

²Anmanin khodengthei na rakip ha an luidui tak-ha ningsat tak a an lui om hale a tam an lui riang nom pek na tiang ko lungdo lian na an lui pek.

³Kein ka ti tor, anmanin an nei nek a atam an lui pek tor.

⁴Anmanin keini jiang judia ram ma om mi thiang ngaiha na sanpuiru tia an na lui ri.

⁵Hava keinin kan lui ngaidon anga luini mak ajarko Pathian lungdo nuk juia a rapatak anmanin Pathian jiang an lui kan pek hale keini jiang om an na lui pek.

⁶Taitas ning a rapa han nom hiva chuan hi alui tho jarra, ama jiang kan lui ri ama han ator khan na hiva chuan hi na sinpui nati.

⁷Nang nin irakip a nan vat na om mak, takngaina, chongria hale chingna thei na hin nom, mi sanjot lungdo hin nom, hale keinin nangni ha lungdo lian na lungsiat chuan ha kan na man tho jot.

⁸Kein nangni jiang chong pek ka na nei nimak, tak-ha midangngai ha lung lut a nan sanjot na rang le adik a nan lungsiat ha jetna ranga ka ri ani.

⁹Ajarko nang nin nan jet, kan puma Jisu Khrista ha alui nei achang nom, nang ni jarra ariang achang jui, a man ariang jarra nang nin a nei miha nan ni jui.

¹⁰Kei ngaidon ko hi ani, ni kumma nan phut chuan ha atun ko tortaru, nang nin athojak ni luia chuan tho jot ha niru.

¹¹Hi aninko nan tho jot chuan ha tho torna ranga, nan lui kan ning nan nei rakip pek nang chuan ha torru.

¹²Nang nin a pek jot lungdo nan nei inko pathian in nan kutchoi ha lui nati, nan nei ha adei ani, nan nei luiha pekru timak.

¹³Kein nang ni ha na man ponga a dangngai lam man hui rase u kati chang mak.

¹⁴Tak-ha a kan ang rip a om ru tia ka ri ani. Nang nin atun tak ko nan nei jarra anmani ha sanru, hale anmani an nei karra nangni ha na sanret nanti hi aninko a kan ang rip a nan om tor rang ke.

¹⁵Hingahin Pathian chong thianga alui kan jiak lal thum a buk a siakpa ham a khel la lui nei mak, hale aviarte alui siak ama ham a vat om mak.

¹⁶Pathian ha kan manpak, keinin kan na san jot anga Taitas ningngom nangni ha ana san jot.

¹⁷Keinin kan ri jak niluia ama han nom nang ni ha ana san jot da a om.

¹⁸Taitas le kan ruaia keinin Pathian chong ri thei aming omngai ha biakrup ning kan hong tir jui.

¹⁹Taitas hi biakrup ning an thang suak a keini le kan ruaia Pathian lurna chuan kan tho chun, ajarko nangni ha ana san jot tia na manjetna ranga ani.

²⁰Pathian jiang kutchoi lungdo lian na nan pek kan sual kanse a om mak na ranga keinin kan tho.

²¹Pathian madonna le miring madonna adik tak a nei man rang hi keini lungdo ani.

²²Hiva jarra Taitas hi kan nai pangngai le kan hong tir ani. A mahi adik chuan tho ani tihi keinin kan jet, a rapa lai nek a atun lam ana san jot det jui. Nangni jiang takngai na atam a na nei.

²³A mahi kei le kan ruaia nan chuan tho ha ani, hale kan nai pangngai ham Jisu Khrista lurna manpak na ha biakrup rakip rahut a achoi mi anni.

²⁴Nan lungsiat ha anmani jiang man jetru, nang ni ruia man kan lian na kan ri na ha biakrup rakip ning om adik tihi jet rase u.