Read Aimol GALATIA 2 Bible Online

GALATIA 2 - Aimol bible

GALATIA 2

¹Kum som le kum manli suale kein Barnabas le Jerusalem ma veikhat kan che ret han Taitas kan karra alui kan chel.

²Pathian in ana manjet nuk juia kei ruk a ka luichea lamkai ngai le Kan lui kan mu han Jatdangai jiang Pathian chongsat ha ka lui ri. Kein a tuan lai ka chuan tho le atunna ka tho chuan hi a man buija manmang jot making.

³Kei le akan ruai Taitas Grik nai ama ten nom vuntan ruia lui ri ma u.

⁴Ajarko ulenai asalui aviar ning chong choi anga an hong lut a, keini hi Jisu Khrisra jiang lungdo tunga kan om jarra, anmanin keini hi an thuaija an na siak jot ani.

⁵Tak-ha Pathian chong dik ha nang ni ranga siak torna rang anmani jiang phat dar khat om luipek masing.

⁶Hale lamkai ka ni tia a omngai le keihi kan kan khel na om mak. Pathian jiang mi chang mi kha om mak. Lamkai ka ni a tingai ning kei jiang ite khat na ripe tor ma u.

⁷Hi ni luia anmanin an jet, kei ning jatdangai jiang Pathian chongsat ka ri hale Pitar lam Jiwngai jiang a man ri.

⁸Pitar ning Jiwngai jiang Pathian chongsat a man ri tor anga, Pathian ranak jarra kei om Jatdangngai jiang Pathian chongsat ha ana man ri tor ani.

⁹Pathian ning kei hi hiva chuan tho ranga ana pek jui, tihi pitar, Jems hale Johon ning om an jet. Hava jarra kei le Barnabas keini le kut kan tokna kan nei. Barnabas le kei ning Jatdangai ngai jang hale anmani ning Jiwngai jiang che rang hi kan lui kan jot.

¹⁰Anmanin ariang aroi ngaiha sanru ana ti, hivahi kei ka dei tak alui ni.

¹¹Pitar ning Antiok a alui hong lai han kein ka lui khap mitam madonna, ajarko ama hi athinga alui lal.

¹²Jems ning a hong tir mingai, an hong tung madonna, pitar ning Jatdangai vuntan lui mingai le bu alui nek, tak-ha mingai an hong tung karra akan kei khir, ajarko a man vuntun adei mingai ha alui chit.

¹³Jiw pasal khat om achit chu chunga bu nek alui kan chel hale Barnabas ten nom achit chu chunga anmani karra alui man nek.

¹⁴Anmani ning Pathian chong ha adik a an jui lui ha ka mu karra kein Pitar jiang ka lui ri an madonna. “Nang ni Jiw athiang takning jatdangai anga nan om, ija mo jatdangai ha Jiw anga nan man om tor rang?”

¹⁵Keini ko Jiw kan ni nai kan hong changa phut, hale siatnei Jatdangai ha ni masing.

¹⁶Jetru chuan sat chena dan ajui mihan Pathian jiang adik tak a om tor ma u, tak-ha Khrista jiang takngai na anei mi han ani, kein nom takngai na ka nei, Khrista jiang takngai ama han Pathian jiang a thianga a om tor. Chena dan ajui han nimak, ajarko chena dan ning kan taksa ten nom man thiang tor mak.

¹⁷Keinin Khrista jarra man kan thiang na kan tok karra, kan ni ninga kan siatna kan kan mu aninko, Khrista ning siatna rang mo chuan a tho jui? Hiko ninoning.

¹⁸Ajarko kei ning ki manmang sa phur ha kein veikhat ka sin ret aninko adik lui tho ka ni ati na ani.

¹⁹Chena dan nuk juia ko, keihi chena dan ning ana that jui, tak-ha kei Pathian jiang ring rang ka ni jui.

²⁰Keihi Khrista le khros chunga ka luithi jui, hale keihi a ringa a om ni lai making, tak-ha Khrista ning ka sunga a ring jui, hale a tunna ka ring taksa ringkho hi Khrista jiang takngai ja a om ringkho ha ani, aman lungsiat tak a aringkhuo hi kei ranga ana pek jui.

²¹Puman ana lungsiat theina hi kein do tor making. Tak-ha chena dan a jui mi han Pathian jiang a man kan thiang tor aninko, Jisu Khrista ning a lui thi hi aman bui ani jui.