Read Aimol GALATIA 4 Bible Online

GALATIA 4 - Aimol bible

GALATIA 4

¹Atunko kein na ri kati, nai pang achanga aman a om karlim, ama ning irakip aneipu aninom, ama ha suak le la kan khel mak.

²Ajarko ama chunga a en ranga asel ranga mi an om, a pa ning a pek phat ha a tung mak kar je.

³Hingahin keini om Thavang lam ma nai pang kan lui ni lai han ramuol la chena omchan ngai nuk kan lui jui.

⁴Tak-ha a phat asat da ahong tung karra pathian in anai ha alui hong tir numei tenna nai achanga Jiwngai chena dan thuaija alui om.

⁵Hale puma ning chena dan alui jui ngaiha tan ring na ta hale keini hi Pathian naingai na manchang nati.

⁶Hale nang nin a naingai nan ni jarra pathian ning a nai thavang ha kan lung sunga a na thun pe jui hale thavang ham a pa ti a a chap.

⁷Hiva jarra Pathian tenna nang ni ha suak ni lai ma che u hale a naingai nan ni jui. Pathian in a nai jiang a pek ha nang nin mu nanti.

⁸Atuan lai ko nang nin pathian ha lui jet mache u hale kut a sin Pathian suak ha nan lui ni.

⁹Tak-ha atunko nang nin Pathian ha nan jet, animakle pathian in nang ni ha ana jet jui. Ijarra mo nang nin atun tenna asual ana ngai kan put na han nan la che jot? Anmani ngai suak weikhat nan la chang jot ret mo?

¹⁰Nang nin nikhuo le tha, akum le phat, a kum a phat nan ngak.

¹¹Ka ning adonge, nangni jiang ka tho rakip a man bui mo ani ta rang?

¹²U le naingai jiang ka na mathem ani. Kei anga niru, ajarko kei om nang ni ranga ka om, nang nin kei jiang asatlui lui tho ma che u.

¹³Nang nin nan jet, kei ka tak a salui jarra, ka nat jarra a rapatak nangni jiang Pathian chongsat ha ka lui ri ani.

¹⁴Ajarko kein ka nat chunga ka lui om nom nang nin thui salui na tho mache u hale vanram tenna a hong thaneithiang le Jisu Khrista nandon anga kei om nan na lui don.

¹⁵Nan ning atam alui sat; imo asuak jui? kein ka ti tor nan mitngai ham nan kel tor anin ko kei jiang nan na pek tor rang ke.

¹⁶Kein hiva chong dik kari hin nang ni enda mo ki chang jui?

¹⁷Kei ana enda mingai ning nang ni chunga asat a anna lui en tak-ha an lunga an ngaidon ko satmak, keihi nang ni le an na man kan sen jot, nang ni le kanruai ajot mak na ranga an tho ani.

¹⁸A sat na ranga chuan aninko asat, kein nan karra ka om sung rang jak nimak, phat rakip a asat a om rase u.

¹⁹Ka lungsiat ka naingai Khrista omchan ha nan chunga a om mak karlim kei hi nang ni ranga ning dong na ka nei ret jui.

²⁰Kein nan karra atun tak hin ka om jot hi aninko nan lung ha na man thul tor kati, ajarko keihi nang ni ranga ponga ka om.

²¹Kei jiang riru, nang nin chena dan a thuaija nan la om jot mo, hale chena dan a ruia nan la jet lui mo?

²²Ajarko hingahin chong thianga alui kan jiak, Abraham ning Pasalnai anni alui nei, khat lam a numei tenna ani hale khat lam ha a suaknu tenna alui ni.

²³Tak-ha a suaknu tenna ahong ha ko ramuol taksa nuk juia nai alui chang, hale a numei tenna ahong chang nai ha ko Pathian chongsan nuk juia nai alui chang ani.

²⁴Hiva rochi hin kan jet theina anni a om jui. Numei ani ning an kan jot na anni a om, Hagar ning a nei naingai ning Sinai Tangbunga suak an lui chang.

²⁵Atunko Hagar hi Sinai tangbunga Arabia ram hin a om, Jerusalem kol la ani. Hiva ram hin Hagar ning anai ngaile suak alui chang.

²⁶Tak-ha achung tianga a om Jerusalem ha ko ningsat na ranga ani. A maha kan nu ani.

²⁷Hingahin chong thiang in alui ti ani: “Nai choi lui numei nang in ningsat a omro! Nai nei rat nu numei nang in khek nang nai tam nei taro, ajarko a pasal a om lui numeinu anai lam atam det! Nai nei ja a nat hi nangin la jet mache! Numei nai bui nu ning nai atam nei nati a lompa a om nu mei nek a aman a nei rang ke.”

²⁸Atunko u le naingai keini hi Isak anga Pathian chongsan na nai a hong chang ha kan ni.

²⁹Tak-ha hava phat han nom taksa hin nai a hong chang ama ning thavanga a hong nai ama chunga khodengthei na alui pek anga atun hin nom alani.

³⁰Pathian chong thiang in imo a ti? Suak numei le a nai ngaiha ko nod suak taru, ajarko suaknu a pasalnai han rengpa a pasalnai le a kan anga a pa lal thum ha mu noning.

³¹Ajarko hiva jarra le naingai keini ko suaknu a naingai ha ni masing tak-ha rengnu ning a nei Pathian chongsan na nai chang ngaiha kan ni.