Read Aimol GALATIA 5 Bible Online

GALATIA 5 - Aimol bible

GALATIA 5

¹Ajarko Khrista ning ana masua ha ana masua jui. Hiva jarra ngirtit taru hale nan tak ning suak chang ret ranga jot lai maru.

²Paul kein ka na manjet ani, nang nin vuntan ha nan la dei aninko Khrista hi nang ni jiang a nem na ite la om mak.

³Veikhat na manjet ret kati tu khat ning vuntan ranga ajot aninko chena dan rakip ha jui ranga a om ani.

⁴Chena dan rakip a juia Pathian jiang man kan thiang kati tia a omngai ha Khrista le nan kan sen ani. Nangni hi Pathian a mi lungsiat thei na va ralla nan om ani.

⁵Ajarko Thavang Thiang tenna takngai na kan nei jarra kan ringkhuo hi man kan thiang thei na ranga kan ngai tui ani jui.

⁶Ajarko keinin Jisu Khrista le kan om suam karra vuntan mo vun tan lui mo a kan khel na om mak. A liantak ko takngaija chuan tho lungsiat ha ani.

⁷Nang nin asat a nan lui om tu ning mo an na khap chuan sat le adik an jui ha?

⁸Hiva ngaihi nangni ana kui ama ning atho nimak.

⁹A sin tet a salui phur han a renga amanmang tor ani.

¹⁰Kein nang ni jiang lung ngam na ka nei ajarko midang ning an ri chong ha jui maru. Nan chunga ana nok mingai chunga pathian ning chong jenna na pek nati tu tu achang nom.

¹¹Tak-ha u le naingai, kein vuntan ruia kala ri achang inko, ijarra mo keihi atun ten nom khodengthei na an na pek hi? Hi aninko khros ruia chongsat ri a jot lui ha om lai noning.

¹²Nang ni chunga khodengthei ana pek anmaningai ha an tak an kan at tan aninko lung khop om a ti.

¹³Ajarko nangni hi na masua ranga ana kui ani, u le naingai nang ni jiang a na masua ha tak sa lung khop na ranga nei man maru tak-ha lungsiat a khat le khat chunga kan sanru.

¹⁴Ajarko chena dan rakip hi chong khat jak a man chang jui. Na in kolla miha na tak nakan lungsiat anga lungsiatro.

¹⁵Nangni khat le khat nan kan sual a chang nom, khat le khat mang mak na ranga kan ning theiru.

¹⁶Kein ka na ri ani, Thavang Thiang han nan chunga lam man kan keiru, hi aninko taksa ning a dei rakip ha tho torno ni che u.

¹⁷Ajarko thavang ning adei rakip ha taksa ning dei mak, hale taksa ning adei rakip ham Thavang ning dei mak. Anmani khat le khat kan jot ma u. Hiva jarra nang nin nan dei rakip ha tho jot mak.

¹⁸Tak-ha Thavang Thiang ning nangni ha lam ana ruai inko nangni hi chena dan a thuaija om mache u.

¹⁹Enru taksa a dei ngaiha ko athianga akan dang, omchan salui, minu en lal a thiang lui omchan ngai;

²⁰Kut a sin Pathian chubeibuk doi ai mi en lal, kan sual, kan se, a torna tunga lung thak, ka ram, mi khuisen;

²¹mi en lal juruija mi le kan sual hiva ngai jiang ka na manjet ani, a rapa lai om ka na lui manjet jui, hiva mingai ning Pathian rengram ha mu noni u.

²²Tak-ha Thavang Thiang ning a hong manra ha ko hi ani. Lungsiat, ningsat lungnem, khang thei, mi lungsiat, chuntho asat le takngai ha ani.

²³Lung nem ma a om, a tak a kan khit tor, hiva ngai jiang chena dan ning a jot lui ite khat om mak.

²⁴Atunko Khrista jiang a om ama ha taksa ning a dei ngai rakip ha khros chunga a that pet jui.

²⁵keinin Thavang Thiang jarra kan ring aninko Thavang chena hin che tarei.

²⁶Khat le khat chunga kan en lal, lung thak na man kan lian na om lai ma rei.