Read Aimol EPHESIA 2 Bible Online

EPHESIA 2 - Aimol bible

EPHESIA 2

¹A chesa phat han nangni nan siat nale chong nan jui lui jarra Thavanga thina nan lui mu.

²Hava phat han nang nin ramuol la asatlui lam ma nan lui che hale ramuol Thavanga ranak ning chung marak a ana lui choi, tak-ha atun ko Thavang Thiang in Pathian chong jui lui ngaiha a chur jui.

³A thianga keini om hava mingai angnga ramuol la lungdo nuk juia taksa lungdo rakip ha kan lui tho, taksa lingdo ngaiha ko keini khodengthei nale puma lung thok na alui chang.

⁴Tak-ha Pathian ning kan chunga ina lungsiat na hi a mongti om mak.

⁵Keini ning Thavanga kan lui thia a chong kan lui jui mak pha han a man Jisu Khrista tenna ring na a na lui pek. Hivahi Pathian lungsiat jarra nang nin ring na nan mu ani.

⁶Khrista ama le kan ruaia thina tenna ama le kan hong ring jui hale vanram ramuol la ama le reng chang rang kan ni.

⁷Pathian ning ahong rang phat miruol rakip ning an jet thei na ranga ina man mu ani. A man ina lungsiat nale alian na ranak ha Jisu Khrista jiang ana man mu jui.

⁸Ajarko puma lungsiat na hin nang ni ana san ring jui, nan takngai na jarra ani, nan chuan tho jarra chang mak, hivahi Pathian kutchoi ani.

⁹Nan chuan tho jarra nimak, tu khat ning om man kan lian na nei maru.

¹⁰Keini hi puman a na lui sin Jisu Khrista le kan ruaia ama achuan sat tho ranga, a rapa sot a keini ranga alui ngaidon sa ani.

¹¹Nang ni jatdang naingai ning jetru, Jiwngai ning vuntan taksa hin miring kut a an sin ha nang niko lui tho ma che u.

¹²Hava phat han nang ni Jisu Khrista le nan lui kan lak, hale Israelngai ning an kan chunna athiang mun han na lui man lut ma u, han nang ni ring na ranga lungdo om lui a Pathian buia ramuol hin nan lui om.

¹³Tak-ha phat khat a Jisu le nan lui kan lak in nom atunko Khrista ama thisen jarra ana man kan nai jui.

¹⁴Ajarko Jisu Khrista ama ko lunghip lungdai ha ani, ama a taksa a kan pek a Jiw le jatdangai ngaiha khat jak an chang jui, an lui kan enda le an lui kan sitlui ngaiha a manmang pe jui.

¹⁵Jisun Jiwngai chena dan rakip le an kan put na chong lam ngai a man mak a jatdangai le Jiwngai hi ama le om suam thei na ranga jat athar khat aman changa lung kan siatna alui pek.

¹⁶A man thing khros chunga athi han alui kan enda a om mirakip ha a manmang, khros ranak han jatdangai le Jiwngai hi jat khat aman changa Pathian jiang alui tuang khir ret jui.

¹⁷Hiva jarra Jisun alui honga nang ni jatdangai ha Pathian jet lui ngaile Jiw Pathian kol la alui om mingai jiang puma chong thiang le lunghip na chong ha alui ri.

¹⁸Jisu Khrista jarra kan renga Jiw le jatdangai le puma madonna khat jak a kan om tor jui.

¹⁹Jatdang naingai nangni Pathian varal la a om mi ha nilai ma che u, tak-ha atunko Pathian inn sunga a om Pathian nai nan ni jui.

²⁰Tirlon paul le Pathian chong lui ri ngain, in mun an lui sin chunga Jisu Khrista ning luai chang kacho achanga alui sin in ha nang ni nan ni jui.

²¹Jisun biakrup ha a sin suale, a man thianga pa Pathian jiang a pek lut.

²²Nangni chunga puman biakrup asin ha puma Thavang Thiang om na mun ranga ani.