Read Aimol PHILIPI 1 Bible Online

PHILIPI 1 - Aimol bible

PHILIPI 1

¹Jisu Khrista Suak Paul le Timothi Philipi biakrup hin a om lamkei Ulianngai, Jisu Khrista mi thiang rakip jiang,

²Kan pa Pathian le Jisu Khrista manritna le lunghip ha nangni jiang om rase.

³A phut na nikhuo tenna a tun tunga chongsat semruia nangnin ka sap nan chang jarra manpak na ka hongei.

⁴Ningsat le kan ruaia pha rakip a nangni rakip ranga lam na kan nei.

⁵Nang ni ha ka na ngaidon de ka pathian ham ka manpak.

⁶Hivahi kein takngai na ka nei, tiko, nan lung sung asat chuan sin ranga ina hong manjet Pathian ama ning Khrista nikhuo ha a hong tung mak kar je chung suak na nan nei rang ke.

⁷Nangni ko pha rakip a kalung sunga nan om, tihi adik ke; kein ren inn na ka om lai, chongsat ruia nang nin ranak nan na na pek, hiva jarra, nangni rakip hi kei le manrit na kan tum suam rang ani.

⁸Ajarko, kein Khrista lungsiat nale kan ruaia nang ni rakip ha ka na ngai tui tihi Pathian ning shakhi ani.

⁹Hivahi kein lam na ka nei; nang ni ning chingna theina rakip le lungsiat na khel la nan nei rang ke.

¹⁰Hiva jarra nang nin asat ha imo ani tia thang suak na nan nei rang ke, hivahi Pathian lianpui nale manpak na tung khan na.

¹¹Jisu Khrista jarra mi dik chang thei na ara ha asip, Khrista nikhuo han a thianga Pathian lianpui na ha nan mu rang ke.

¹²U le naingai chongsat ruia ka chunga isuak rakip hi, a khel la ranak neina ranga ke tihi kein nangni ha ka na manjet jot.

¹³Kein Khrista jarra ren inn na ka om hi, reng chang kual; a ngak rakip le adang mirakip in an hong risuak jui ani.

¹⁴Hale, kein ren inn na ki om jarra u le nai aviar ning puma an takngai na ha khel la ranak neina rang Pathian chong ha ri ranga an tha ahong nuam jui.

¹⁵Aninnom mi aviar inko kansual kanse jarra, aviar inko an lung angar jarra Khrista chong hi an sem.

¹⁶Hiva rakip hi lungsiat jarra an tho ani ajarko. Chongsat jarra ki kan dui pui na hi Pathian ning kei jiang ana pek tiha anmanin an jet.

¹⁷Mi aviar ningko chongsat ruia kei ning a na kan dui pui pe tihi an jet an lung ana siat.

¹⁸Ningdong om mak! a mun rakip a adik tak a aninom adik animak in nom Khrista Jisu a chongsat ha an sem aninko; kein ka ning asat rang ke.

¹⁹Kein ka jet nang ni lam nale, Khrista Jisu Thavang kan jui ruia kan sanring na ki mu hi a thianga ani.

²⁰Kein jak na nei noning, pha rakip ka tha inuam ang han, a tun nom ka ring ka thi innom ka ringkhuo hin Khrista manpak ha ka ni rang ke.

²¹Kei rang ko Khrista ranga thi lam hi ringnek a asat det.

²²Kein chuan atam tak ka tho tor hiva nek a kein i tak hamo ki tho rang tiha la thang suak tor making.

²³Aninom, kein Khrista le kan ruai ranga ka dei a ka che inko, hiva anni kong karra, kala om ajarko hi lam hi a khel la asat ha ani.

²⁴Tak-ha Tak sa ringkhuo om nang ni ranga ko a khel la a nem na a om.

²⁵Adik tak kangaidon takngai jarra, ka ring rang ke tihi ka jet. Kein nang ni le vei khat kan om suam jarra kei tenna phut nang ni om Khrista ruia man kan lian thei na ani.

²⁶Takngai jarra nangni le kan dui na rakip ningsat suam ma nangni rakip le kan om suam rang ke tihi ka jet.

²⁷Atun nang ni nan ringkhuo pal ha Khrista chongsat jarra asat a palru, kein ka honga nang ni le kan kan mu nom, kan kan mu mak in nom, nang ni lung khat jak nan chang a chongsat chunga takngai nan nei ha kan siam in lang, thavang khat jak nan ngir tihi kein ka jet thei na ranga om ru.

²⁸Ana enda mingai ning nangni ha ite khat na man chit ma rase u, nan chit pe lui hi anmani rang ko nem na bui ke; Tak-ha nang ni ranga ko kan sanring na tetan na ani, hale, tetanna ha Pathian tenna ani.

²⁹Ajarko, Khrista jiang takngai na jak niluia, ama ranga pong khodengthei na ham ani; hivahi puma ranga ko nang ni jiang lungsiat na nei na ani.

³⁰Nang ni ning kei jiang nan lui mu sa an khat om, atunko ral la kan kan sual kei jiang nan na mu anga nang ni jom ral tho ha nan ni jui.