Read Aimol 2 THESSALONIKA 2 Bible Online

2 THESSALONIKA 2 - Aimol bible

2 THESSALONIKA 2

¹Atunko kan puma Jisu Khrista a hong phat han ama le kan mu thei na ranga lui kan chunru, tia u le naingai jiang ka na ri ani.

²Kei ning ka hong jiak chithi nuk jui aninom, Pathian chong lui ri ngain an lui ri nuk juia ani nom, puma nikhuo hi a hong jui tia a khel la ningsat ham tho maru, ning dong le tha tak ham nei maru.

³Tu khat ning om hiva ruia man kan huang maru, ajarko kansual kanse a salui chuan rakip ramuol la asuak suale siatna a tho mingai seitan nai ama ha ila kando rang ke.

⁴A ma ning asat chuan tho rakip le chong jui ngaiha a manmang rang ke. A ma ning irakip chunga om na ta kei Pathian ka ni chubei na bukru ati rang ke.

⁵Nang ni nan thei ni jui mo? A renga keinin kan na lui man a jet jui nan karra kan om lai han.

⁶Puma a hong karra nang ni jiang ana khap a salui ama ha a la kando rang ke ti a nang nin nan jet.

⁷Ajarko Pathian chong pek a jui lui jarra ama han a salui chuan a tho hale salui ama ha a che mak karlim puma ning chuan la tho noning.

⁸Hava suale chong jui luia salui ama ha puma bai hu han athat rang ke. Puma ahong ha anmani ranga anem na om noning.

⁹Mi saluingai ning seitan ranak le kan ruaija angakpa doi ai tho nanti.

¹⁰Hale puma a hong phat han Pathian madonna mi salui leisei chuan tho ngaiha thina mu nanti. Pathian tenna kum sot ring na ha mu noni u.

¹¹Anmani ning adik chuan an lui tho lui jarra Pathian ning an chunga leisei a salui ning chuan tho pe rase tia ranak alui pek jui.

¹²Hingahin adik ha takngai lui hale a salui chuan tho a ningsat mingai chunga Pathian ning chong jenna nei nati.

¹³U le naingai phat rakip a keinin nangni ranga puma manpak hi kan chuan ani. Ajarko puma ning a rapa lai tenna nangni hi ana lui thanga athiang thavanga hin a na rasuk a adik ha tho na ranga ana be jui.

¹⁴Hiva jarra puma chongsat tenna nang ni hi ana kui ani, hale nang nin Jisu Khrista a lurna le alian na ha mu nanti.

¹⁵U le naingai nan lung mandetru, hale kan na lui ri chong han aninom, chithi hin aninom, a tuan lai nan lui che na kan chong pek chongsat ha ko mak maru.

¹⁶A tunko puma Jisu Khrista le pa Pathian lungsiat na han amongtibui ningsat nale lungdo tung na han.

¹⁷Lung thok na na pek rase. Phat rakip a chongsat le chuan sat tho ranga ranak na pek rase.