Read Aimol 1 TIMOTHI 6 Bible Online

1 TIMOTHI 6 - Aimol bible

1 TIMOTHI 6

¹Suakngai ning om nan puma ngaiha chitlejak ha neiru, hi aninko tu khat ning om kan na man chu rakip hi Pathian minga ani luija ri noni che u.

²Khristian mi jiang om suakngai ning ngom suak tia kan lui maru, ajarko anmani ha nan u nan nai anni, hiva rahut a anmani ning a khel la an suakngai tenna an chuan ngai rakip asat a antho pe, hiva chong hi nangni ning man churru.

³Tu ang khat ning chong lam a dang khat hin mingai ha aripe aninko, hale adik chong ha ti ko, Jisu Khrista le Pathian ngaidon lam ha a jot lui ani.

⁴A maha i om jet lui man kan lian na a om hale chong le chonga mi man kan sual a dei hale mi en lal, mi a man kan nok le a salui jak a ngaidon ha ani.

⁵Hale mingai karra a kan nok theng pet ngai ning anmani lung sunga chuan adik ha nei ma u. Anmani ning an ngaidon dik na hi nei na lam lian khat ani tia an ngaidon.

⁶Tak-ha dik na ning mi hi kan chong manchang mak, ama ning a nei rakip chunga alung a khop mak inko,

⁷ramuol hin imo kan hong choi? Ijom om mak, keini ning imo kan choi tor rang ramuol tenna? Ijom om mak.

⁸Hiva jarra keini ning bu nek rang le puan si diar kei rang kan nei inko a jot jui.

⁹Tu anga kan chong achang jot ama han mathemna chang kot a, hale mipangpa hale a satlui hin an chul, hivahi mingai mang na ham ani.

¹⁰Ajarko ruphai dei ning a salui rakip a achung chuan ha anni, mi aviar ning ruphai atam an dei jarra Pathian takngai na tenna an suak jui hale an lungai ha pong na atam an mu jui.

¹¹Pathian mi nang ning hiva rakip hi makro, hale chuan dik ha thoro, Pathian lungdo tak a ngai, lungsiat le khang thei lam hi jui taro.

¹²Na takngai na ha adik a ngai taro, hale kum sot ring na ranga hiva chuan na tho lai hin Pathian ning a na kui na takngai na ha mirakip ning jet rase u.

¹³Pathian madonna hiva rakip hi tu i pek mo? Hale Jisu Khrista madonna tu ning mo ama chuan hi takngaija pontias Pilat madonna a tho?

¹⁴Jisu Khrista ning a hong rang nikhuo han nang in asat a chong na jui thei na ranga kein nang jiang ka ri ani.

¹⁵Pathian ning a phat a kan chalaitak hin, Jisu hi a hong tir rang ke, a torpa renga reng chung nung, Pathian na Pathian chung nung ha ani.

¹⁶A ma jak hi amongtibui ha ani. A ma ko a var ha ani, tu khat ning om mu tor ma u, ama hi man pakru. Irakip hi ama kut thuaija an om.

¹⁷Kan chong mingai jiang riperu ramuol chunga an nei lal hin man kan lian ma rase u, an phur an pai chunga an lungdo siak ma rase u tak-ha Pathian ko keini hui na ranga i rakip lungdo a lian na ana pek ani.

¹⁸Mingai ha chuan sat man thoru, chuan sat tho tianga a nei ha ni ru, hale an lungdo lian rase u, midangngai san ranga ngaidon rase u.

¹⁹Hingahin an tho aninko anmani ning nuk ranga asat a lal thum an buk hale anmani ning adik ringkhuo ha an mu tor rang ani.

²⁰Timothi nang jiang an na ngam na rakip hi asat juiro, mi aviar ning anmani jet na an hong ri, a pang chong rakip ha lui maro.

²¹Mi aviar ningko anmani ning takngai na lam pui ha an manmang jui, Pathian manrit na ha na chunga om rase.