Read Aimol 2 TIMOTHI 2 Bible Online

2 TIMOTHI 2 - Aimol bible

2 TIMOTHI 2

¹Ka nai nang hi Pathian jet tianga ratro hivahi Khrista le keini kan chuan ani.

²Nang ni mitam madonna ki na ri ngaihi jet taru hale a ri tor ngai ning midang jiang ripe ta rase u.

³Jisu Khrista a ral mi khat anga nang nin pong na rakip ha dui taru.

⁴Ral mi khat ning chuan a tho karra a rengpa lung man khop na a ngaidon, hale ama ning mingai ringkhuo ha man kan nok mak.

⁵Kan daija a kan chel a tanpa ning chuan lam ngaiha a jet mak inko a pong lo man ha mu tor mak.

⁶Lui tho pa ning chuan adik a asin aninko a rapa tak hin a chang a luak rang a suak.

⁷Kein ka na ri ngaihi ngaidon ru, ajarko Puman nang ni ha a renga na manjet nati.

⁸Khrista ning alui thia a thui khir hi ngaidon ru, ama hi David tenna a hong ani, hivahi kei ning kari chong hui hin a om.

⁹Ajarko kein chongsat ha kari, kei hi mi that khat anga an na lui khit, an na lui man pong tak-ha Pathian chong hi ko khit na jot mak.

¹⁰Hiva jarra pong na rakip hi kein ka lui dui Pathian ning ana thang sa mi khat anga, hale Khrista Jisu tenna a hong kum sot ring na ha an mu thei na rang le ama lianpui na ranga ani.

¹¹Kei ning chong thiang ka na ri ani, keini ning ama le kan thisuam inko ama le kan ring suam ret rang ani.

¹²keini ning kan dui a chang inko keini hi ama lianna han kan la lian rang ani, kein in a mahi kan jot mak inko a man nom keini hi na jot noning.

¹³keini ning ama hi kan jui inko, a man nom keini hi na jui nati, ajarko a man ani lui ha tho noning.

¹⁴Nan mingai jiang hiva chong hi man jetru, Pathian jet le kan ruaia chong shakhi hin kan sual maru, hivahin asat na hong choi mak, mang na jak ha ani.

¹⁵Nan thi khan na chuan asat ha thoru, Pathian ning a jet chuan sin pa ning chuan sin a jak lui anga, nang nin nom Pathian chong ri a jak maru.

¹⁶Nang nin a salui, a pangngai ning an ri chong ngaiha Pathian tenna a lak a siakru.

¹⁷Hiva ngaihi mi manmang na chong alui ni Hymenaeus le Philetus anga;

¹⁸anmani ning adik ha an mak a tak a ngai mingai jiang an lui ti, Keini hi thina tenna kan hong thui khir jui.

¹⁹Pathian ning athual in mun ha ko kan nik tor mak, hiva chunga Pathian chong thiang ngaihi alui jiak. Pathian ning a mi ngaiha a jet, tu anga Pathian jiang a om ha mingai ning an siatna ha mak rase u.

²⁰In hui alian khat sunga sana ruphai a man tam kheng le kual jak a om nimak, aviar ko thinga, leipak a ansin ani aviar ko asat na mun na tet rang ani, aviar ko inn sunga nei man ranga ani.

²¹Tu ang khat ning a tak a man kan thiang aninko ama ha asat a nei man a jot ha ani, ajarko ama hi a puma pa ranga a kan pek jui, hale ama hi chuan sat tho ranga a kan ning jui.

²²Rualthar khat changa nan dei ngaiha makru, ajarko chuan sat le takngai le lungsiat le lunghip na neiru, Puma ning a kui alung thiang mingai hale kan ruairu.

²³Nang nin a ranga a kan nok mi pang chuan ha tho lai maru, nang ni ning nan jet anmani ning kan sual na jak an nei.

²⁴Pathian chuan tho ngai ning kan sual jot mak, mirakip le a kan jot a khang thei oja khat ha ni rase.

²⁵Ana en dangai ha duk lut a kan jot pui rang a suak, ajarko Pathian ning ama chunga lung thul thei na ranga in khar a long pe.

²⁶Hale anmani ning jet na an neija siatna chang kol tenna a tan na hale siatna a chul ama ha ko siatna lungdo jak ha a tho ani.