Read Aimol TITAS 2 Bible Online

TITAS 2 - Aimol bible

TITAS 2

¹Nangnin adik manchu nuk juia ni manchu rang ani jui.

²Ulianngai ha Ju in lui, lung kan chur tor, mi vaihom thei le takngai jot mi lungsiat thei a adik anni rang ani jui.

³Hingahin numei tar ngain nom an nun chan na Pathian chit le kan ruaija, siatna bule ju suak chang lui, asat tianga manchu thei an chang rang asuak.

⁴Nupuingai innom Pathian ha esella ri lui, an lompa ngaile an naingai lungsiat thei,

⁵lung kan chur theinu a thiang, in pal thei, asat an pasal, an pasal thuaija om torna rang anmani ha man churo.

⁶Ha ang han, lompangai om, an lung an kan chur torna ranga ripero,

⁷Chuan rakip na tak khet in asat chuan tianga mu thei na ha doro.

⁸Mirup tiang achang ama ha ning keini ruia asalui chong ite khat ari theimak na rang nang in ni man chuha adik asat a man chu nang ama lam ajak na rang adik chong ha riro.

⁹Suakngai ha ning pha rakip, keini san ringpu Pathian, chong ha man dik thei na ranga anmani an neipu miringngai thuaija om rase u, pha rakip anmani lungdo tung na ranga chong jui lui ha chang ma rase u.

¹⁰Ruk chian na phur an choi mak na rang an neipungai lungdo nuk juia an om thei na rang man churo.

¹¹Ajarko Pathian manrit na, mirakip sanring na rang a hong choi mi ha man muro.

¹²keinin Pathian jet lui le ramuol lungdo ha jot mak singa, kan lung kan kan churra adik hale, Pathian lungdo ha atun tho thei na ranga hiva ramuol chunghin kan ring lai manrit na ha ning a na man chu jui.

¹³Hiva jarra Pathian ni khopui keini na san ringpa puma Jisu Khrista lianpui na a thianga ana man mu rang ha ravansat ha kein in kan mu jui.

¹⁴Keini siatna rakip na man thiang na ta, asat chuan tianga lung lut a tho thei na rang puman a mi ngaiha ma thiang na ranga puma keini jarra a kan pek jui.

¹⁵Hiva chongngai hi na ri pero, hale ranak nei tak a man chule kan ruoija ma siatro, tu khat in nom na chunga esella chong ri a nei ma rase u.