Read Aimol HEBRU 1 Bible Online

HEBRU 1 - Aimol bible

HEBRU 1

¹Pathian in man lai Kan pu Kan pa ngaiha pha atam tak le, a lam a tam tak Pathian chong lui ri ngai jiang an phut alui kan biakpui.

²Tak-ha atun hin ko a nai ning keini le ana kan biakpui jui, Pathian in a naija an phut ramuol hi a sin, hale aman i rakip a neipu a man chang jui.

³A ma ning Pathian lurna varna rakip le Pathian mi tak ha ama jiang a om hale Khrista ning ramuol a pumpui hi ama chong thouija a man om. A ma ning miringai siatna rakip ha a ngaidam suale vanram ma puma Pathian a kut chang tiang han ranak nei tak a a ong jui.

⁴Pathian nai ha thaneithiangngai nek alian, hale Pathian in thaneithiangngai a ming nek a lian det a a pek jui.

⁵Ajarko Pathian in thaneithiangngai an khat jiang om hingahin, ka nai na ni; Ve enni kei na pa ka chang jui ke, “timak ani animakle Pathian in thaneithiang an khat jiang, kei a pa chang rang ka ni, Hale ama ka nai chang rang ani,” timak.

⁶Pathian in a nai a masat tak-ha ramuol la ahong tir rang pha, a man hingahin a ri, Pathian thaneithiang rakip in ama ha chubei an buk rang ke a ti.

⁷Pathian in thaneithiang chung changa hiangahin a ri. “Pathian in thaneithiangngai ha phaivuo aman chang cha chak hale suakngai, mei chuan aman chang chachak” a ti.

⁸Tak a chang innom Pathian in a nai chung changa hingahin a ri. “E Pathian, na lian ongna ha kum sot a om rase, nang in na rengram chunga adik a lam na kei ani.

⁹Nang in adik na dei hale adik lui na ma tir, hiva jarra e Pathian, na pathian in a na thang jui na sap ngai nek a khel det a chong nei na an khat ningsat na ha nang a na pek jui; a ti.

¹⁰A man hingahin nom a ri ret; puma nang in a phut na tak ramuol ha na sin hale na kut a chung van ngaiha na sin ani.

¹¹Anmanin an renga kan mu lai noni u, mangrang anni, Tak-ha nang ko om chak rang na ni; anmani an renga puan alui sa an la ti rang anni a ti.

¹²Nang in hava kuntai an khat thep anga thep rang na ni, Hale hava ngaiha puan anga thul rang na ni, tak-ha, nang ko a thiti om noning.

¹³Pathian in thaneithiangngai khat te jiang hingahin lui ri mak; ti ko kein nang a na en dangai ha, na ke thoija ka na man sir mak kar je ka chang tiang hin ongro.”

¹⁴Hale thaneithiangngai ha tumo? Amani an renga Pathian sepa a tho thavangngai ha anni, hale kan san ring na a mu rang rakip san ranga a hong tir anni.