Read Aimol HEBRU 11 Bible Online

HEBRU 11 - Aimol bible

HEBRU 11

¹Takngai hi lungam puina phur le paingai khat ranga jet chiak a mit mu lui phurlepai ngai khat ha a om khet tina ani.

²Man lai a mingai han an takngai na han Pathian dik na a thiang an lui neitor ani.

³Mit mu torlui an phut ramuol kan mu tor hi takngai jarra Pathian chong han a sin ani tihi kein in kan jet.

⁴Takngai jarra Abel ning Ken nek Pathian jiang phur asat det le kan ruaia a kat jui. A man Pathian tak a ngai jarra ama ha mi dik khat a manchang jui. Abel a thi a chang innom, tun tung a hin a takngai na han chong an la ri ani.

⁵Takngai jarra Enok thina an phut a khui sen na a om ma, tute khat in mu mak na mun Pathian jiang a tuang jui. Ajarko a mahi Pathian ning a tuang ani, chong thiang in a ri nuk juia, Enok chung tiang a tuang mak ma ama Pathian lung alui man taia a om anti.

⁶Takngai na om lui a tu ten Pathian lung man tai na om mak. Ajarko Pathian jianga a hong mi han a ring chak a om, hale ama a tok mingai ha a man ponglo i pek rang ke tihi tak angai chiak rang ani.

⁷Takngai na han Nova ning a mu phak nuk a hong suak rang omchan chunga Pathian man chuna han angaia ani, a man achong a juia rokuang a suija hava sunga ama le a inn sung mingai kan san a om jui. Hanga han a man ramuol chunga siatna a man chu ma han takngai han Pathian tenna phut ama mi adik ha a chang jui.

⁸Pathian in Abraham ha a kui pha, a man a takngai jarra achong a juia, Pathian in a pek na ram ha a jonga ache jui, a man a tung rang mun ha lui jet chil luia a ram a mak jui.

⁹Takngai jarra ama ning mi ram ma khuol mi a chang an in nom Pathian shakhi pek na ram ma a hong om jui, a man puan na an duang in khuai liang puon inna a om ma Pathian chong shakhi a kan ang rip a tum Isak le Jems om ke khuai liang puon inna an lui om.

¹⁰Ajarko Abraham ning khopui ning om a det tak Pathian ning alui siak le aluisin sa khopui ha a ngak chak a om jui.

¹¹Takngai na han Abraham a tar a chang innom hale Sara ha nai a nei rang rahui a chang mak innom, a man Pathian chong shakhi ha a tung chiak rang ke tihi tak a ngai jarra a man pa an khat a hong chang tor ani.

¹²A man a thi jui an in nom, ama tenna khat jak an phut atu ate ngaihi chung van arsi ang khan hale, tuionglian sirra leidi tel torlui ang khan an tam ma a hong suak jui.

¹³Hiva mingai rakip hi takngai na jarra an thi jui, tak-ha Pathian chong shakhi ha lui tum ma u, ha an in nom a lak tak anmuphak han an lui ani, hale ramuol la hin khual mi anga kan ni tihi anmanin an kan jet.

¹⁴Hiva chong an ri na hin anmanin an tum rang ram an khat ha an tok ke tihi an kan jet chiak ani.

¹⁵Anmanin an hong mak sa ramtiang nuk kir ret rang hi lui ngaidon ma u; anmanin an kir jot inko anmanin kir na pha om an mu ani.

¹⁶Tak-ha, ha chang lui a anmanin asat det ram, chung van ram ha an ngai tuia an lui om ani, hava jarra Pathian ning anmani rang khopui an khat a sin pe va hale, anmanin Pathian! ti rang ha jak lai ma u.

¹⁷Pathian ning Abraham jiang a en sin pha han, takngai jarra Abraham in a nai Isak ha kan bol na akat a pek ani, Pathian in chong shakhi a nei pui ha Abraham ani; a chang innom a man pasalnai an khat jak a nei ha a man kan bol na akat pek ranga a kan ning ani.

¹⁸Pathian in ama jiang “Isak tenna phut tu le te na nei rang ke a ti pe ani.”

¹⁹Pathian in Isak ha thina tenna phut a man ring tor ret tihi Abraham in a jet hale a takngai na han, Abraham in Isak ha thina an phut a mu ret jui ani.

²⁰Takngai na hin Isak in Jakob le Isou jiang nuk a hong tung rang chunga ravansat a pek jui.

²¹Takngai na in Jakob ning a thi mak ma Josep naingai ravansat a pek jui; hale a man a thiang re ha a o va Pathian chubei a buk jui.

²²Takngai na han Josep ning a thi rang tiang Israel naingai jiang a ti, ijip ram an mak rang chong a ri, a saru hi anmanin an choi rang ha a man chu jui ani.

²³Takngai jarra Mousi a nu le a pan an nei suale tha thum an lui thup ani, anmani nin naite a mel sat ha an mua rengpa chong pek suk khui rang chit lai ma u.

²⁴Takngai na han Mousi ning a hong lian pha rengpa Pharo a nai numeinu a pasalnai nai ti rang hi jot lai ma u.

²⁵Pha bongkhat adik mak a huia om rang nek Pathian mingai le khodengthei suam rang hi a man a dei det jui.

²⁶A man nuk pong lo man a mu rang a en na, ijip lal le thum rakip nei rang nek Mesaia rang jarra mol khang rang han a man a nei det tiha a man a jet jui ani.

²⁷Takngai jarra Mousi ning rengpa lung thak rang ha chit luija, nuk kir ret mak na ranga a man ijip a mak jui ani.

²⁸Takngai na in a man kan na ut le thisen suak han a sin na a rapa an nei nai thina ranga anmani ko tok mak na rang ani.

²⁹Takngai na in Israel naingain tuipuilian ha leipak a char jarra an lui kan tor ani, ijip mingai ning kan rang an ti pha, tuipui tuionglian han a khu de jui.

³⁰Takngai na han Jerikho khopui bang ha Israel naingai ning ni sa ri an hi suapha khopui bang ha a chim jui ani.

³¹Takngai na han Rahab michukluinu jiang adik lui mingai ha a inna lunghip lungdai tak a man tung jarra, Pathian chong a jui mak ngai an that na rang an phut kan san ring na an mu jui.

³²Kei imo ka la ri de rang? Gidion, Barak, Samson, Jeptha, Daniel, Samuel, hale Pathian chong lui ri ngai chong ri na rang a pha om lai mak jui.

³³Takngai jarra anmanin ram pumpuija ral an tho va an tor jui, anmanin adik ha an tho jarra Pathian chong shakhi pek ngaiha an tum ani, hale anmanin Sabakkai ngai bai jom an lui ruk.

³⁴Mei chuan a kang an lui mandai, chemsei a thina ranga an phut a kan thup ngai, anmani an chit alui don, tak-ha an pang a ranga chit lui jet lai ma u; anmanin ral kan tho na ral rat tak an chang jui, hale ram dang ral mingai ha an tor jui ani.

³⁵Takngain phut nupuingai han athi ngaiha a ringa an kan mu ret ani, a dangngai ha ma sua rang an jot mak jarra esella suk manmang na an khanga an thi jui, hava ringkhuo asat det an ring thei na rang ani.

³⁶Aher khat an nuisoa an ve, hale a dangngai ha an khit Lung khurra an khum jui ani.

³⁷Anmani ngaiha lunga an deng, thing at na han an at bongni an man suak jui, hale chem ma an tuk tan jui, anmani a riang tak khodengthei a, belram vun ansia an lon na mingai ning an esella khodeng an man thei jui.

³⁸Anmani ranga ramuol chung hi asat chang lai mak, anmani ral an tan anga, tanga, Damma, Ram karra, khurra, a tong na mun na an che ti tir jui.

³⁹Hiva mingai hi tak an ngai jarra, an omchan ngai kan jet na an kan mu innom, Pathian chong shakhingai ha ko la mu ma u.

⁴⁰Ajarko Pathian in keini ranga asat det an khat thau rang tho na a na nei pui jui, hale keini le anmaningai ha lungdo tung rang hi Pathian sin var ani.