Read Aimol HEBRU 2 Bible Online

HEBRU 2 - Aimol bible

HEBRU 2

¹Hiva jarra keini ana kei suok mak na rang, kan jet sa chong lam rakip adik han o tit rei.

²Vanram thaneithiangngain chong an ri man tharra adik ando ani, hava chong jui lui mirakip tanti an mu rang ani.

³Hiva jarra hiva duk asat kan san ring na a lian an khat ha keini om kan ngaidon mak aninko ijamo keinin kan ring tor rang puma ham a sot alui pong, ama achong ria jet ngai han kei jiang hivahi adik ani tia an ri man thiang.

⁴Hava lai han Pathian in tho torna at om tak le a dang dang manjetna ngai ranak rat na han anmani chunga a tho de ani, hale a man a lungdo nuk juia Thavang Thiang kutchoi ha an chunga a sem de jui.

⁵Ajarko kein in kan ri, a man a hong sin rang ramuol chunga vai hom ranga Pathian in Thavang Thiangngai a sin nimak.

⁶Chong thiang mun khat hingahin a ri, “E Pathian nang in na ngaidon pe miring hi imo? Nang in lung lut a na jet pe miring ha imo ani?”

⁷Nang in ama ha thaneithiangngai nek a thuoi det na sin, nang in ama ha chit jak nale lianpui na ha lu khu na man khu.

⁸Hale ama ha irakip chunga vaihompu na man chang anti, hingahin Pathian in, irakip chunga vaihom rang miring a sin anti, a thiang tak i rakip a kan chel pet jui, aninom miring in a tun hi irakip chunga vaihom ha kein in la mu mak sing.

⁹Tak-ha kein in Jisu kan mu, ti ko Pathian a na manrit na jarra mirakip ranga Jisu athi thei na rang pha bongkhat thaneithiangngai nek thuai det a siak atun ko a man hava thina a tat ha alui dui jarra chit jak nale lianpui na lu khu an khu ha keinin kan mui jui.

¹⁰Nai atam tak in lianpui na ha an tum thei na rang irakip torna ranak a nei jui, ajarko Jisu ha anmani kan san ring na lam a ruoi an khat ha ani.

¹¹A man mingai an siatna an phut a man thiang jui, hale a man thiang ngai hale a man Pa an khat jak a neisuam jui, hiva jarra Jisun anmaningai ha ka sap ka jar ngai ti rang hi jak na nei mak.

¹²A man Pathian jiang a ti, “Sap le jar ngai jiang kein na tho chuan ha kari rang ke, na mai kung a an renga kan chun na mun na ka na manpak rang ke.”

¹³A man hinga ariret, kein Pathian tak ka ngai rang ke a ti, vei khat a ti ret, Pathian in a na pek nai pangngai le kei hin om rang ka ni.

¹⁴A man naipangai a ti ha, miring taksa le thisen choingai a ti jarra, Jisu ama tak han anmani anga an khat a hong changa, miringai a hong chang hale thina ranak neipu seitan ha a torna rang a man hangahan a hong thi jui.

¹⁵Hale chit na om tak thina ranga an ringkhuo suak an chang ngaiha an lungdo doa ama sua pet jui.

¹⁶Ajarko ama thaneithiangai ha a san nimak tihi a thiang jui, ti ko chong thiang in, a man Abraham a tu le a te ngaiha a kan ruoi pui a ti.

¹⁷Hiva tina ko mingai siatna ha ngaidam na rang, Pathian mai kung a sepa a tho thiampu chung nung manrit na a sip takngai a om tak a chang thei na rang, a lam rakip a sap a jar ngai a man alui chang jui.

¹⁸Hale ama tak om mathemna a kan tong puia hale khodengthei a dui jarra, atun hin mathiam na a omngai ha a man a san tor jui.