Read Aimol HEBRU 6 Bible Online

HEBRU 6 - Aimol bible

HEBRU 6

¹Hiva jarra Khristian chong a phut na tak kein in kan jet na ngaiha kan nuk tiang mak in lang lungdo tung na ma don tiang che ri.

²A nem lui chong an phut lung kan kei na rang le Pathian takngai narang baptais le athi thuikhir ret rang kumsot chongtan na rang ruia man kanchu lai ma rei.

³Pathian ning ana man rat inko ma don tiang che ri hivahi keini kan tho rang a suak ani.

⁴Ajarko vei khat an kan lum sa mingai ha hongan mo an lung an hong kan hei na rang an hong thui khir ret rang, Pathian va ralla an om jui; anmanin vanram kutchoi Thavang Thiang ha an mu va an lui jet jui.

⁵Anmanin Pathian chong ha asat an jet hale, nuk a hong rang ranak rat a hong rang ham an jet jui ani.

⁶Hava suale anmanin an kan lum jui, ngaiha an ring sunga anmani an hong kan hei khir na rang hong tuang khir na jot lai ma; ajarko amanin Pathian nai ha mipui mai kunga jakna an pek vei khat khros chunga an khai ret jui ani.

⁷Pathian ning ramuol hi ravan a pek, a chunga ruo vei khat aman tho ret; hale lui tho pa nem na ranga anle na a man mong pe.

⁸Tak-ha ling le ramsul a mong inko a nem na om lai ma, Pathian kho khong na ha a mu khodengthei na meija rovam rang ani jui.

⁹Tak-ha ae, lungsiat sap le jar ngai kein in hiva tunga kan lui ri jui aninom, nangni ranga ko jet thiang na kan nei jui, tiko ravansat nale, kan san ring na ha dan ta ani jui tihi keinin kan jet.

¹⁰Pathian ha lung a nei lui nimak aman nan chuan tho nan Khristian chang na ngai a tun tunga nan pek na ngaile ama ranga lungsiat na nan do pe nan kan san na ngaiha thei ni chil lui rang ani.

¹¹Nangni na ngaidon a adik tak a hong tung na rang a torna tunga nan ning nan man sat rang hi kan dei ani.

¹²Keinin nan tha siat rang hi dei making, tak-ha Pathian chong shakhi a mungai anga takngai le a dui rat nan chang rang kan dei.

¹³Pathian ning Abraham jiang han chongsan a pek han, chong sam ha a tung chiak na rang kho kan khong na ankhat alui nei. Khuo a kan khong pha han ama nek alian an om mak jarra a tak a thei jak a ming a kan ri.

¹⁴A man a ti kei ning chong hi ka na kan sam peke ani, ti ko, ravansat ka na pek rang ke, nan tu nan te ka mantam rang ke.

¹⁵Abraham ning a ngak rat jarra Pathian chong shakhi ha a tum jui.

¹⁶Mi ankhat ning kho kan khong na a nei inko ama nek a lian an khat ming a ria khuo a kan khong ani. Hangan chong kan kher na rakip chongtan na alui om ani.

¹⁷Pathian ning a ngaidon ha itik om kan thul ngai ma, hava jarra a chong sam a tum rang ngai jiang a man tum rang hi a dei jarra a chong sam chunga khuo a kan khong ani.

¹⁸Hingahin a kan thul thei lui rang anni a om, hava ruia Pathian ko a leisei mak, hiva jarra keini ama le kan ruaia ringna kan mu jui keini mai kunga lungam na ana siak pe ha, a det tit kan o na rang ranak a na pek.

¹⁹Keinin Kan ngaidon na kan mu hi thavang ranga ranak dona anga ani, hivahi a thiang tak vanram biakinn munthinga an duang puan sung tunga lut na ani.

²⁰Jisu ha keini rahut thul ranga hava mun thiang tunga a lui lut jui, ama Melkijadek anga thiampulian tak an khat suak rang a chang jui.