Read Aimol HEBRU 9 Bible Online

HEBRU 9 - Aimol bible

HEBRU 9

¹Chong shan a masat han chubeibuk na rang le dan ngaile miring in an sin chubeibuk na rang mun alui om.

²Biakinn an khat an lui phun, tual tiang han a thiang mun anti, hava mun na han thai mei var (Tebol) le tal alui om.

³Anni chang na puon duang sunga han a thiang tak biakinn anti.

⁴Hava sunga han a rim hui le maicham chong shan tolai sana va an chuan jiak ha a om, hava chong shan tolai sunga han bel siakna sa na bel, Aaron a thiang re ra ki cher, le chong shan chong anjiak lung pek anni a om.

⁵Tolai chunga Pathian mahok na a kan phuang a Cherubimngai ning manrit jarra ngaidam na mun chunga han an tha an jar an khu de va an om ani, irakip a don don na ri man thiang na phat a tun la nimak.

⁶Hiva rakip kan ningna a tor suapha, biakinn tual atong sunga han, ani tinna thiampu ngaiha an chuan tho ranga an lut chak jui,

⁷Tak-ha biakinn sunga han kum khat sunga vei khat jak, thiampulianngain an lut ama a binga rang le, mipui ngai rang, jet lui thai luia an siat tho na chunga mipui rahut thulla thisen a choia Pathian jiang a hong kat jui.

⁸Biakinn tual tiang han ala ngir kar je mun a thiang chung nung hong na rang lam ha ala kan khar ke tia, hiva chuan var na ngai jiang an phut a Thavang Thiang han a thiang hiaia ana manjet jui.

⁹Hivahi tun pha ranga ara mil man mu na an khat ani; Pathian jiang a kutchoi pek han kan bol na Pathian chubeibuk na ngai hin, an buk pha irakip lungdo tung tor mak.

¹⁰Anmanin chak le nek han dan nuk juia man thiang na a tam tak an tho rang a om ani. Hava ngaiha, Pathian in irakip a sin man sat mak kar je rang jak ma pal phuang a nei man ranga dan ngaiha alui chang.

¹¹Achang anin nom hin na a om asat sangai chunga thiampulian a changa Khrista ahong jui ani, ama sepa tho na mun ha ko, ramuol la miring in an sin biakinn sunga nimak,

¹²Khrista ha mun thiang shunga a lut pha, a man kelle Serat thi kan bol na rang kat rang choi mak, ama thisen khet ha achoia kan bol na ava kat, keini kum sot kan san ring na ana man mu jui.

¹³Hale Kel thi le Serat chal thisen hale Serat le roman vam vut dan nuk juia a thiang mak mingai ha thing thuan rang ani,

¹⁴Hava han adik achang inko, Khrista thisen han a khel la lungdo a tung jui ani, kum sot Khrista thavang a thei jak lungdo tung na khat achanga, Pathian jiang a kan pek ani, kein in a ring chak Pathian nai kan chang thei na rang, animakle chuan an phut kan jet khan na lung hi a thisenin ana man thiang pe rang ke.

¹⁵Hiva jarra Pathian in a kui mingai han kum sot ravansat na Pathian chong shan an mu rang ani, chong shakhi thar chuan var ha Khrista a chang jui; ajarko chong shakhi ama sat thuaia mingai an om lai han a sa mak chuan an tho na an phut ma sua an chang na rang thina rang an khat alui om jarra hivahi an tho thei ani.

¹⁶Lungdo an khat om na mun na han, hava lungdo ha a thianga man tung thei na rang lungdo a neia a kan ning pa ha a thi jui ani.

¹⁷Ajarko, hava a lungdo chunga han lungdo a neipu ha a ring lai kar je ite khat la nei mak, hava a lungdo ha athilejak a lungdo ha ranak a nei ani,

¹⁸Hiva jarra chong shan a masat tak han thisen anei man le jak han asat a kan sin tor ani.

¹⁹Ajarko dan sunga chong pek a om rakip ha Mousi mingai madonna a man chu jui. Hava sua tui le Serat le Kel thi sen ha a luia puan sen dup, tui kha han dan rabu hale mirakip a thing thuan jui.

²⁰A man a ri, “Hivahi thisen chong shan Pathian chong pek nan jui rang ani” a ti.

²¹Hang an biakinn nale chubeibuk na an nei man phur le pai ngai rakip chunga thisen han Mousi ning a thing thuan jui.

²²Han na dan nuk juia phur rakip thisen nin man thiang tor a jot, hale thisen suak niluia ngaidam na om mak.

²³Hiva jarra vanram ma phur le pai nei man thei ngaiha man thiang rang a ngai, tak-ha vanram ma a tak khet phur le pai ngaiha an bing binga asat det thun rang hi a ngai ani.

²⁴Ajarko adik tak a melpu a miring in kut an sin a thiang han Jisu a lut nimak, a man vanram ma Pathian mai kung a keini rahut a chea tun hin a hong kando ani.

²⁵Jiwngai thiampu alian takngai han nom mun a thiang tak han kum khat vei khat jak thisen le kan ruaia a lut ani, tak-ha Khrista ko chat luia a kan pek ranga a lut nimak.

²⁶A man chat luia a lut rang achang inko, ramuol a sin lai an phut pong khodengthei alui khang rang ani. Hava ha ni lui atunko, pha rakip a tor rang tiang a kum khar na ranga siatna rakip man thiang na rang a torna tak ranga, vei khat jak ama a thei jak a kan pek lut a hong kando jui.

²⁷Mirakip vei khat an la thi chiak rang ani, hava suale Pathian in chong i tan rang ani.

²⁸Hava ang ha Khrista ning mitam tak siatna tenna kei sua ranga vei khat alui kan pek jui. Siatna chunga chuan tho rang chang luia ama a ngak chak a omngai ha san ring na rang veini chang na ila hong kando rang ani.