Read Aimol JEMS 1 Bible Online

JEMS 1 - Aimol bible

JEMS 1

¹Puma Jisu Khrista le Pathian suak Jems in ramuol chunga a kan thek chaia a om Pathian mingai jiang chubei ka hong pek ani.

²Sap le jar ngai, mathemna rakip nan chunga a hong tung pha le kan ravan asat tia ngaidon ru.

³Hava anga mathemna han nan takngai in a tor pha, dui torna ranak nan nei han nang nin nang jet ani.

⁴Tak-ha nan dui rat na han lam rakip ama sial na om luia a na tuong ha a thianga jetru, hava jarra ban sam na om luia, a vat mak, lungdo tung ha chang rang nan ni.

⁵Tak-ha nan karra tu a chang innom ching na tianga a ban sam a om inko a pek rang Pathian jiang a man lam rase, ajarko Pathian in mirakip manrit tak le lungsiat tak a apek ani.

⁶Tak-ha nan lam phat han takngai tak le, lunga kei chi keiokna nei chil lui a lamru; ajarko tu a chang innom lunga kei chi keiokna a nei ha ko tui pui chunga phaivou in a sem tui a kan nok anga ani.

⁷Hava anga mi han Puma jianga an phut i jum a mu lui rang ani.

⁸Ajarko a man a chuan tho na chunga han ngaidon jet chiak na i jum a nei lui ani.

⁹Ariang achang u le naingai ha Pathian in a dom sang pha, ama a ning man sat rase.

¹⁰Hale a kan chong ulenai khristianngai ham puma ning a kei thak phat han an ning man sat rase u. Ajarko mi kan chong ngaiha ha ramsul la par a chuai anga a lam ang rang ke.

¹¹Ni ahong sang pha, ramsul ha a em charra, a par ha a man voi, hale asat na a choi. Hava anga mi kan chong ham a nei chunga a ngaidon na rakip a lamang rang ke.

¹²En sin na chunga takngai lui mi ha a ravan asat; ajarko en sin na ha a man a tor inko, Pathian a lungsiat ngai pek ranga shakhi ring na ha a man mu nati.

¹³Mi an khat in en sin na han a mathem karra, Pathian a na mathem ani; ti ma rase. Ajarko asa mak in Pathian mathem tor mak, hale Pathian in tute khat mathem mak.

¹⁴Tak-ha mi an khat ha a binga satmak adei na han alut phat han, mathemna a chul ani.

¹⁵Hiva jarra asat mak ha lungdo a hong tung pha han siatna a man suak, hale siatna ning lungdo a hong tung pha han, thina a hong suak.

¹⁶U le naingai! Nan tak nan thei jak man kan huong maru!

¹⁷Kutchoi pek asat rakip le lungdo kutchoi pek rakip vanram an phut a hong ani; hava ha vanram ma varngai a sin Pathian na an phut a hong ani. A man var ngaiha thul chil lui a man jing luia a man var.

¹⁸A kut sin rakip karra keini ara ma sat tak-ha kan chang thei na rang, chong dik han a lungdo tak keini ha a na hong tuong jui.

¹⁹Ka manrit U le naingai, hivahi ngaidon ru. Chong an ri ha mirakip in a rak tak jet theiru, tak-ha chong ri sot tiang le lung thak na tiang ko nutru.

²⁰Ajarko miring lung thak na hin Pathian dik na tianga chuan tho ma.

²¹Hava a thiang mak le adik mak omchan rakip an phut tan deru. Pathian jiang lutru, hale a na san ring tor rang chong nan lung shunga luiru.

²²Hava chong nan jet han nang ni chuan tho changru, asat mak man kan tor maru.

²³Ajarko chong an jet a chong jet nuk juia chaun a tho mak mi ha tu a chang innom meng sial la amel akan en na a en suale a mel ha ijamo a ti ha a theini len anga ani.

²⁴A man a mel ha ha asat da alui kan en, a en sua le amel ha hong an mo a ti ha thei ni len anga ke ani.

²⁵Tak-ha miring dan lungdo tunga lung lut tak a ajet a chuan a tho ama ha Pathian in ravansat a pek rang ke.

²⁶Tu a chang innom mi ankhat in dik na tiang lung lut mi ka ni tia a kan ngaidon an om mo? A man a lei akanchur tor mak inko, ama dik na ha a nemna bui le asa mak ha ani.

²⁷Nu le pa bui mei thai khodengtheingai chunga lungsiat ngaidon na an khodengthei na a en pe le ramuol chunga asat mak an phut a en thei mi ha, Pathian ning idei adik le a thiang ha ani.