Read Aimol JEMS 2 Bible Online

JEMS 2 - Aimol bible

JEMS 2

¹Ka u ka naingai, lianpui na Puma kan Puma Jisu Khrista a takngai nan chang nuk jui a, miring ngaiha an mit an mai en na chuan tho ni maru.

²Tetan na an khat a nan kan chun na mi anni, an khat a nei mi puonsi diar kei asat, sana kut sa vit a hap le a riang mi puonsi diar kei a chet sa a kan sin an hong aninko,

³nang in puonsi diar kei asat tho pa ha ko chit jak na nan nei a, ama jiang, “Nang hiva mun hui hin hong ong ro,” nanti a, hale ariangpa jiang han, “Nang ko hanga han ngirro,” nanti aninko,

⁴nan lung ngaidon adik mak han, nan karra khodengthei na a man suok nimak mo?

⁵Ka lungsiat ulenaingai, hiva ramuol chunga ariangke tia nan ngaidon mingai ha Pathian in Thavang Thiang takngai ranga athang suak ani, hale ama rengram ha man tum na ranga a thang suok jui.

⁶Tak-ha nang ninko a riang khodengtheingai ha nan mu dong ket. Nang ni chongtan na mun na a na tuongai ha mi kan chong ngai nima u mo?

⁷Mi kan chong ngai ning Pathian a pek ming asat ha esella an ri ani.

⁸Chong thianga kan mu, “Nang na tak na thei jak na kan lungsiat ang han, na in ri na in tang ham lungsiatro”.

⁹Tak-ha nang nin mi mai nan en na mi nan khui thier inko, dan nan ma khuia siatna nan tho ani, hale dan han siatna a na ma sul jui ani.

¹⁰Ajarko mi an khat in dan a renga a jui suo aninom dan an khat jak ha ama khui inko, dan a renga ama khui jui ani.

¹¹Ajarko, “Numei ka lal maru,” a ti puma han, “Mi that maru,” om a ti. Hiva jarra nang nin mi nan that aninko, numei ka lal animak innom dan nan ma khui jui ani.

¹²Dan nuk jui a chong ri le chuan thoru nan chong ri le nan chuan tho nu kuija Pathian ning chong a jen rang ke.

¹³Ajarko lungsiat na nei lui mi ha Pathian in chong a tan pha han lungsiat mu noning tak-ha manrit na a nei mi han chongtan na ranga chit na nei lai noning.

¹⁴Ka u ka naingai, mi an khat in, ‘Kei ning takngai na ka nei,’ ti sen nang, a chuan ko a do lui mi ha, asat na imo a om? Hava takngai na han a man a kan san ring tor rang mo?

¹⁵Tetan na an khat a ulenai puan si diar kei le chak rang nek rang an nei mak an om inko,

¹⁶a man anmani jiang, Pathian in ravansat na pek rase! A lum ma omro, khop charu, ti na ta a nei mak ha ko pek lui a imo a nem na a om rang?

¹⁷Hava anga chuan kan chel lui takngai ha ko a binga a thisa ani.

¹⁸Tak-ha mi an khat in ti nati, “Nang in takngai na na nei hale kei ning chuan tho na ka nei, chuan kan chel lui a na takngai ha na man muro, kein ka chuan tho han ka takngai na ha na man mu kati,” tia a sang thei ani.

¹⁹Pathian an khat jak ani ti a nang in tak nan ngai. Adik! Seitanngai ning om tak an ngai, hale an chit a an kan nik.

²⁰E mi vet! Chuan kan chel lui a takngai ha ko a nem na om mak tihi na jet jot mo?

²¹Kan pu Abraham ha Pathian le ijamo adik an lui om som? A man a nai Isak ha kan bol na chunga akat ha a chuan a do na ani.

²²A takngai ha a chuan tho le a kan ruoija, a takngai na ha chuan na lungdo a man tung ha nang in mu mak che mo?

²³Chong Thianga, “Abraham in Pathian tak a ngai, hale a man a takngai jarra Pathian in a man dik. Hale Pathian in Abraham ha ka sap a ti ani.

²⁴Hiva jarra mi an khat ha a chuan tho na han Pathian le kan ruaia adik a tum ani, takngai chian jak han nimak.

²⁵Rahap an ti nu ham hava hale a kan ang rip ani. A man Jiw mi an tir ngaiha alui don na lam dang khat tiang a kan ruoi puia alui tir jui, hava a chuan jarra han ama nu ha Pathian le kan ruaia adik a tum jui.

²⁶Hiva jarra Thavang Thiang kan chel lui tak sha rong ha a thi sa ani; hava anga chuan tho na om lui takngai ham a thi sa ani.