Read Aimol JEMS 3 Bible Online

JEMS 3 - Aimol bible

JEMS 3

¹Ka u ka naingai! nangni atam lam mi manchu chang maru, ajarko keini mi manchu ngaihi midangngai neka a tat det a chongtan na kan chunga a om rang ke tihi jetru.

²Mirakip in ma sial na kan nei chachak. Mi ankhat in a chong ria a suai na a nei mak inko, ama ha a taksa pumpui akanchur tor lungdo tung mi an khat ani.

³keinin sakor baija rui kan thun na kan cham kan man juia, kan dei na tiang kan man che tor ani.

⁴Hale rokuang ngaidon ru; hi ang khan alian aninom, a thou pan rokuang yapna han a dei na mun na phaivou a rang in num a man che thei.

⁵Hava anga taksa shunga a sin tak lei hi om ani; tiko a sin tak an khat a chang aninom man kan lian na chong aliana ari suak tor ani. Ramtong a lian tak ha mei chuon a sin tet an khat in a mankang sotor ha ngaidon ru!

⁶Hale lei hi mei anga an khat ani. Tak sa ramuol ringkhuo pumpui a ship a na tor an khat ani! Kan ringkhuo mei shunga a na deng juon rang mei chuong ha lei ani.

⁷Miring in irakip hi a cham ma aman jui tor, a thavang pal chunga vatengai, thuoia a bok a akan son ngai, hale nga ngai, rakip a cham ma a man jui tor.

⁸Tak-ha miring in lei hi ko a cham ma man jui tor mak, lei hi, asat mak, thina turpui a sip ani!

⁹keinin lei hi kan Puma le kan Pa Pathian choi lom nam kan nei, hale Pathian mel anga, kan sap chang pui ngai ham kho khong na kan nei man ani.

¹⁰Bai an khat jak ten han manpak na chong le kho khong na chong a suak ani. U le naingai, hivahi kein in man suok ma rei.

¹¹Tui khur khat jak a ahong suak tui ha a thum le a kha suak mak!

¹²U le naingai, thei chang kung a Olib ra ngai mak, hale darkha ruia thei chang ra ngai mak; animakle ma chi khur han tui thum suakngai mak.

¹³Nan karra aching a jet nan om mo? a man ching nale kan ruaia lung nem chaun sat ha tho sen lang, a ringkhuo omchan adik do rase.

¹⁴Tak-ha na lung shunga sat mak, pham rai siatna a om inko, man kan lian maru, hale adik chunga leisei tho maru.

¹⁵Hiva anga ching na hi vanram tenna a hong nimak; ramuol chunga seitan le a satlui chong tenna ani.

¹⁶Ajarko en lal le pham rai siat om na mun han a satlui chuan rakip a om ani.

¹⁷Tak-ha chung tianga ching na ha ko, ama sat tak a thiang hale lunghip dei, sap le jar chang hi ani; asat kan rol om chil luia, lungsiat nale chuan sat tho na ara a tam tak a sip jui.

¹⁸Hale an khat le an khat jiang chuan sat a tho ngai chunga an vor chi mu ara ha anni.