Read Aimol 1 PITAR 1 Bible Online

1 PITAR 1 - Aimol bible

1 PITAR 1

¹Jisu Khrista atirlon Pitar ning Pontas, Galatia, kappadosia, Asia hale Bethania hin a om Pathian ning a thang mingai ning an thei an theia an lui om lai,

²Pathian ning nang ni ngaihi a na thang sa mi ha nan ni hale Pathian ning ana man thiang jui, ama thavang thiang le Jisu Khrista nuk jui na ranga ama thisen hin na rasuk rang ani.

³Keini puma Jisu Khrista a pa Pathian ham kan manpak, puma ama ning ana lungsiat thei jarra, a thi ngai karra Jisu Khrista ning a hong ring khir jarra, ringkho thar ana pek a hivahin keini hi ring na ranga lungdo a na pek jui.

⁴Han keini ning a mong torlui Pathian phual ha kan en chak a Pathian ning a mingai ha a siak rang ani, nang ni ranga Pathian ning Vanram ma ana siak pe ha, leisa ning om a manmang torlui, a chuai torlui ha ani.

⁵Pathian ranak han a torna phat han hong do ranga kum sot ring na ha, a takngai mingai ranga Pathian ning ana siak pe rang ani.

⁶Atun phat bongkhat hin nang ni nem na ranga aninom hale a dang en sin na ngai ning nang ni nan thavang a man pong innom, nang ni ning nan ning man satru.

⁷Hivahi nan takngai a det mo ti jet na ha ani, sana ten nom a mang thei mei an halla an en sin, hiva jarra nan takngai hi ko sana nek a aman a tam det. Hiva jarra pongna a tam tak in nang ni chunga an na en sin rang ke ani. Hava suale nang nin Pathian lianpui na ha Jisu Khrista a hong phat han nan mu rang ke.

⁸Nang in ama na lungsiat na hi a tun tak na mu mak innom, hale nang in ama ha a tun tak tak na ngai mak innom, hiva jarra nang in ri a ri torlui ningsat na ha na mu ani.

⁹Ajarko nang in na thavang kum sot ring na ha na mu jui, hivahi na takngai na jarra ani.

¹⁰Hiva rakip hi Pathian tashantheingai ning an jet a anlui tok a mingai jiang hiva kutchoi hi Pathian ning ana pek rang ke tia an lui ri.

¹¹Anmani ning itik mo hiva phat hi ahong tung rang tia an lui tok, tak-ha Jisu minga pongna rakip an dui suale ama thavang thiang le lianpui na ha ahong ni rang ke.

¹²Pathian ning a luiti hiva rakip hi Pathian tashantheingai lian na ranga nimak nang ni ranga ani, anmani ning an lui ri, nang ni ning a tun nan jet ngai hi, vanram tenna Thavang Thiang ngai ning an hong choija hale Pathian tashantheingai ning an na manjet ani.

¹³Hiva jarra ring na ranga nang ni ning nan lung kan chur theiru ajarko Jisu Khrista a hong karra nan chunga phual a na pek rang ke.

¹⁴Pathian ha juiru, hale ramuol la na dei rakip han nang ha man kan tor maro, hale ikhat jet lui anga om maro.

¹⁵Hiva rahut da nang hi athianga omro, na chuan tho na rakip a, puma ana kui pu ha a thiang ani.

¹⁶Pathian chong thiang in a ti, nangni, a thiang ha, ni ru ajarko kei om a thiang ha ka ni.

¹⁷Nangni ning Pathian jiang nan lam karra a pa nanti, ama ning mirakip hi a kan ang rip a atho, nuk juia chong ajen karra hin nom ramuol la nan om lai lim Pathian ranga a thianga om ru.

¹⁸Ajarko nang ni ning nan jet mo nan pa nan pungai tenna alui om siatna ana tan ring ani. Hivahi sana ruphai a mang thei phur anga nimak.

¹⁹Ti ko a man tam tak Jisu Khrista a thisen a kan pek hi asat tak belram anga ani.

²⁰Ramuol alui sin madonna Pathian ning ama ha alui thang sa ani, hale a torna nikhuo hin nang ni jarra a hong kando ani.

²¹A ma tenna nang ni ning Pathian ha takngairu, ama ning a thi tenna alui kei thuija ama lianpui na aluipek, hava jarra nan takngai nale nan lungdo ngaiha Pathian jiang siakru.

²²Nangni ning adik chong ha nan jui jarra nan man kan thiang jui, hale nang ni khat le khat adik khan na kan lungsiatru.

²³Nangni hi a tharra nai chang ha nan ni juia mang ranga a che ni luia a mang torlui rang ha nan ni, hivahi Pathian chong nan jui jarra ani,

²⁴Pathian chong thiang in a ti, miring ringkho hi ramsul anga ani, hale an lianpui na rakip ha ram ma par anga ani. Ramsul ning a hong vuai hale Par ning a hong chuaija a chul.

²⁵Tak-ha Pathian chong ko phat rakip a aring chak. Nang ni jiang an lui ri chong ha chongsat ani.