Read Aimol 1 PITAR 4 Bible Online

1 PITAR 4 - Aimol bible

1 PITAR 4

¹Khrista ning a taksa pong na ana dui pe jarra nangni ning om nan lung hi man ngirru, hale ral ranga puan ratuk tho taru, ajarko taksa hin pong na a dui ni han siatna rakip a mak tor rang ani.

²A tun na a om nang ni jiang a om ringkhuo ha miringngai ning atun an ring anga ni luia Pathian lungdo han ring na ranga ani.

³Ajarko nang ni ning ani lui omchan ju rui, ju inna, matir a om chuan ngai hale ani lui Pathian chubeibuk ngaiha, alui che sa phat a nan lui tho han a jot jui.

⁴Atunko Pathian jet luingai ning pum ngak an ngak jui, han mi ning an ngaidon rakip nan tho pui lui jarra nang ni lam ha non tak an na pek jui.

⁵Anmani a ring ngai ning om a thi ngai ning om chong jenna phat han ko puma jiang an tho rakip ha an manjet rang ani.

⁶Ajarko hiva jarra alui thi ngai ha miring omchan nuk juia taksa ning chong an jen rang ani, hale Pathian ngaidon nuk juia thavang in ring na ranga anmani jiang Pathian chongsat ha an lui ripe.

⁷Phur rakip a mang na rang a hong nai jui, Pathian jiang nan lam torna ranga nan lung kan choi theiru.

⁸Hiva rakip chunga nang ni khat le khat lung thianga kan lungsiat aru, ajarko lungsiat ning siatna rakip ha a manmang tor ani.

⁹Nang ni khat le khat kan ri siat luija kan pek theiru.

¹⁰Nang ni rakip ning kutchoi nan mu nuk juia Pathian chuan tho tianga kutchoi ha ni ru.

¹¹Tu ang khat ning chong thiang a ri jot inko Pathian chong thiang ha ri rase. Tu ang khat ning Pathian chuan a tho inko Pathian ning a pek a rat na rakip han chuan tho rase.

¹²Ka lungsiat ka sap ngai nang ni ngak maru, pong nale khodengthei na nan mu karra hale nang ni jiang om hui mak na a suak karra.

¹³Hiva rakip hin nan ning man satru, nang ni ning Khrista a pong ha nan san ani, hi aninko nang ni ning ningsat na ha nan mu rang ani, puma ning mahok lian na a hong karra.

¹⁴Nang ni ha a na enda lai han ravansat ha nan ni, ajarko nang ni Khrista a nuk jui ngai nan ni, hivahi Pathian lianpui na thavang in nan chunga om rang ani.

¹⁵Nangni tu ang khat ning khodengthei na nan mu karra, mi that ke, mi ruk ke a satlui tho mi ke, hale midang ruia a pong ke kan ti maru.

¹⁶Tak-ha Khristian khat changa khodeng nan thei karra, nang ni ning jak maru, han Pathian ha man pakru, hale Pathian a minga ngirru.

¹⁷Ajarko Pathian ning chong a jen na ranga phat a hong nai jui, hivahi keini tenna an hong phut aninko Pathian chongsat ha a jui luingai rang ko ija mo ani rang?

¹⁸Chong thianga hingahin a ti, “Mi sat ngai rang om san ring na a tat, han ko, siatnei ngai rang ko ija mo ani ta rang?”

¹⁹Han Pathian ngaidon nuk juia khodengtheingai ning om takngai ranga a suak ha a na sin pu puma jiang asat chuan tho ranga, an thavangngai ha kan pek rase u.