Read Aimol 2 PITAR 3 Bible Online

2 PITAR 3 - Aimol bible

2 PITAR 3

¹Ka lungsiat ka sap ngai hivahi nang ni jiang atun veini tung na chong ka hong jiak ani, ka che jiak anni nihin kein nang ni lungai hi man thiang na ranga hale nan lung khat jak a ka na man ngaidon ani.

²Kein nangni hi veikhat ka na man ngaidon khir jot ani, phat sot madonna Pathian tashantheingai ning nang ni jiang an na lui ri, puma Jisu ning ana ti pe nuk juia a tirlonngai ning an na lui manjet ani.

³Nang ni ning a rapatak hivahi jetru, tiko, a torna nikhuo hin an dei lungdo va an lui tho mingai ning hong suak nan ta anmaningai ning nang ni ha an na nuiso rang ke.

⁴Han an na dingkel rang ke, hong rang ka ni a tiha la hong mak mo? A ma hon mo a om? Kan pangai hi om an thi sua jui tak-ha i rakip hi a mu mun na ala om ramuol sin laija a om anga ala ni!

⁵Anmani ning jet chak a an lui da phat sot madonna Pathian ning vanram le ramuol alui sin hi, ramuol hi ko tuia akan sin ani.

⁶Hingahin tuilian ramuol ha alui manmang.

⁷Tak-ha a tunna a om ramuol hi ko Pathian ning meija ka tor rang ke tia ala om ani hingahin Pathian jet lui ngaiha chong jen nikhuo hin man mangranga asiak jui.

⁸Tak-ha ka lungsiat ka sap ngai nan theini lui rang khat ko! Pathian mit en na ko ni khat le kum lising khat hi a kan ang, a kan khel na om mak.

⁹Pathian ko nut mak, a ngaidon a chuan tho rang ha, hiva rahut a nang ni ranga a kan khang thei, ajarko ama ning tu khat om manmang jot mak, tak-ha an siatna tenna an nuk hong kan hei khir rang hi a dei ani.

¹⁰Pathian nikhuo hi ko aruk anga jet lui thailuija a hong ani, hava nikhuo han vanram hi rasa suak na ta amang rang ke, vanram pumpui hi mei ning a kang rang ke hale ramuol la a om phur rakip hi om a mang ke ani.

¹¹Hingahin phur rakip mang rang ani jui, nang ni hi ho anga mi mo nan ni rang? Nan ringkhuo ngaihi Pathian jiang a thianga kan pek lutru.

¹²Hiva nikhuo ranga kan ning taru vanram hi mei ning kang mangrang ani jui, hale phursat rakip ham kang noirang ani jui.

¹³Han Puma ning a ti nuk juia, keini ning a thar vanram le ramuol ha ka ngak chuan sat a tho ngai om na ranga ani.

¹⁴Hiva jarra ka lungsiat ka sap ngai, Pathian nan ngak kar hin, nan lung man thiangru hale ani lui khat te nei maru, Pathian madonna han a hip athianga ama le om ru.

¹⁵Pathian hong rang nan ngak ha ravansat nan ni ama ning san ring na a na pek rang ke. Kan lungsiat kan u Paul jiang Pathian ning ching na a pek le kan ruaia nang ni jiang alui jiak ani.

¹⁶Ajarko hiva sunga chong lam aviar ko kan khang tor ma u hava a jet lui mingai ningko ani lui tianga an ma le pe a dang chong lam ngaile an man kan jel, hingahin an tak mang na lam an lui manchang jui.

¹⁷Ka lungsiat ka sap ngai nang niko hivahi a renga nan jet sua jui, nan tak ha kan chur theiru, ha aninko a salui chuan tho ngai ning nang ni ha ani lui lam ma na tuang noni u, nan ngir na mun han a det a ngirru.

¹⁸Tak-ha chuan sat tho le puma Jisu ha ana san ringpa ani, tijet tianga nang ni ha kan son det detru. Puma ama jiang lianpui na ha a tun nom phat rakip han nom om rase Amen.