Read Aimol 1 JOHON 3 Bible Online

1 JOHON 3 - Aimol bible

1 JOHON 3

¹Enru i duk han mo Pathian ning a lung a nasiat hi! A man hi ang khan a na lungsiat jarra keini Pathian naingai an na ti jui, ramuol ning Pathian lui jet mak jarra keini ramuol hi lui jet masing.

²Ka manrit ka sap ngai a tunko keini hi Pathian a mi kan chang jui tak-ha imo kan la hong chang rang tihi keinin la jet masing, tak-ha keinin kan jet khat ko. Khrista a juang kando rang pha han keini om puma ama anga ni rang ka ni, ajarko ama a kan sin hei na ang han keini om ni kanti.

³Khrista ning a thiang ang han tu a chang innom Khrista ha lungdo a nei mi ha, ama a bing jak kan rasuk thiang rase.

⁴Siatna hin dan a ve khui a chang jarra, tu ang mi ning siatna a tho mi ha dan ve khui ani jui.

⁵Nang nin nan jet nan siat tho na rakip choi ranga, puma ning a hong kando jui ama chunga siatna i te om mak.

⁶Puma jianga a om chak tu ang mi ha siatna tho lai mak siat choi rakip in puma ha mu om mu ma u; hale jet om jet ma u.

⁷Naipangngai tu khat in nom nang ni siatna na masul ma rase u! Khrista ha adik a chang ang han, tu a chang innom adik tho mi ha mi dik ke anni.

⁸Tu a chang innom siatna ala tho ala jui chak mi ha Seitan take ani, ajarko Seitan ko a phut na lai tenna siatna alui tho ani. Seitan chuan tho ngaiha manmang ranga Pathian pasalnai a hong kando ani.

⁹Tu ang ning Pathian nai a chang sa mi han siatna han om khir lai noning, han a man siatna tho ret lai noning, ajarko Pathian ha a pa a chang jui a chunga Pathian a om chak.

¹⁰Hin Pathian nai le Seitan nai anni kong karra a hong kando ani; tu a chang innom chuan dik a tho lui ha a u anai a lungsiat lui mi ha ani, hale Pathian nai ha ni lai mak.

¹¹Ajarko a phut na lai tenna nan lui jet chong ha hi ani tiko, keini an khat le khat kan lung i kan siat rang ani.

¹²keini ken anga nima rei! a mako Seitan ta ani jarra; ken ning a naipangpa ija mo a that? ajarko, a naipangpa Chuan tho ha adik tak-ha ama chuan tho ha dik mak jarra a sopui a naipang ha a that ani.

¹³U le naingai ramuol mi ning an na ma tir inko nang nin ngak maru.

¹⁴keinin kan sua pui ngai kan lungsiat; han ko thina ha kan mak a ring na hin kan hong lut jui tihi kan jet. Tak-ha a u a nai a sua pui lungsiat lui mi ha thina ranak han ala om ani.

¹⁵Tu a chang innom a u, a nai a lungsiat mak miha mi that ke anni, mi that mi han i tik om kum sot ring na nei noning tihi nang nin nan jet.

¹⁶Khrista han keini ranga a ringkhuo a kan pek, hivahi lungsiat hi imo ani ti jet na ani. Hiva jarra kein in nom kan u kan naingai ranga kan ringkhuo kan pek rang asuak.

¹⁷Mi kan chong a nei an khat ning a u anai a nei in a nei lui ha a mu a tak-ha a lung sunga lungsiat a nei lui mi han, ija mo a lung sunga Pathian ha ka lungsiat ati rang?

¹⁸Ka naingai Keini kan mur le kan bai jak kan lungsiat ma rei kan chuan tho han kan lung kan siatna ha do rei.

¹⁹Hi ang hin keini adik ta kan ni tihi kan jet han Pathian mai kung a kan lung hi lung ngam na a siak rang ani.

²⁰keini kan lung kan bing jak a masiatna kan pek inko kan lung nek a lian det ha Pathian ani, a man i rakip a jet suaver tihi kan jet.

²¹Hiva jarra ka manrit, ka sap ngai, keini kan lunga kan thei jak masiatna kan pek mak a chang inko, Pathian mai kung a keini lung ngam tak a omtorchak kan ti.

²²Keini ning a chong pek kan juia ama lung tai na ha kan tho aninko kan lam na rakip ha kan mu jui ani.

²³Khrista lungsiat na ang han keini an khat le khat kan lungsiat rei, han ko a nai Jisu Khrista minga takngai rang hi ama chong pek ani.

²⁴Tu a chang innom Pathian chong pek a jui mi ha Pathian jiang a om ani, ama a Pathian a om ani ama thavang a na pek ang hin keini sunga Pathian a om ha kan jet ani.