Read Aimol MANJETNA 1 Bible Online

MANJETNA 1 - Aimol bible

MANJETNA 1

¹Suai chil luija ala hong suak rang chong lam ngai Jisu Khrista ning Pathian suakngai jiang a rak a hong suak rang hi alui manjet ani, Jisu Khrista ning hivahi jet thei na ranga a nuk jui Johon jiang Thavang Thiang ha alui tir.

²Johon ning a mu rakip ha alui ripe jui. Hivahi Jisu ning Pathian chong thiang ruia ana manjetna le adik ha a na manjet ani.

³Hiva chong thiang rabu apangai ravansat anni; Hale chong thiang a ngai mingai ham ravansat anni, ajarko, hiva rakip a hong suak na rang a pha a nai jui.

⁴Johon ning Asia sunga a om biakrup sari jiang alui jiak ani, Pathian tenna lungsiat le lunghip ha nan chunga om rase, a tun nom, alui ni sa, hale ala hong ni rang, a reng ong na madonna thavang sari an om.

⁵Hale Jisu Khrista tenna ama sat a thi ngai ha thui nanti, hale a man ramuol chunga rengpa la ni nati; a man keini hi a na lungsiat jarra a thisen tenna keini ana rasuk.

⁶Hale ama Pa Pathian rengram chuan tho ngaiha, a na manchang jui. Jisu Khrista jiang mahok nale ranak rat na ha pha rakip hin om rase, Amen.

⁷A ma hi sum phai chunga a hong hi enru, mirakip ning an la mu rang ke, ama jiang cheia an sun ha a mungai ning om an la mu rang ke, ramuol chunga a om mirakip ning ama ha chitlejak ning dong le kan ruaia an rop an la ben rang ke.

⁸Puman a ti, “Kei hi a phut nale a torna ha ka ni, atun nom, a hong ni sa hale ala hong rang ham ka ni.”

⁹Johon kei hi Jisu Khrista a nuk jui nan u nan nai ha ka ni, kei hi nang ni le pong a dui suam hale, Pathian rengram hi khodengtheingai ranga ani; Kei hi Patmos tui sirra an na siak, ajarko, Jisu ning ana manjet, Pathian chong thiang ha ka lui ri.

¹⁰A torna Pathian nikhuo hin thavang ning kei hi a na ruaia rasa khat ka lui jet, hava rasa ha ko, Pengkul rasa anga ka nuk tiang hin chong alui hong ri.

¹¹A man a ti, “Nang in ni mu ha jiakro, hale khopuia sari hava rabu hi biakrup Ephesia, Simarna, Pergamum, Thijatira, Sardis, Philadelphia le Laodisia tirro.”

¹²Tu ning mo an na biak tia ka kan hei karra Sana thai mei a ke sari a an ngir ha ka lui mu.

¹³Hale mi anga hava karra rui a kan khit a ke mit tum khan na puan i kan khu, hale a rop han sana Kong khit alui khit,

¹⁴A ma a sam ngaiha samul ngaile vur anga a chek; a mit ham mei anga alui suak.

¹⁵A lu ham mei ling anga alui var, hale a rasa ham tuilian anga alui ti,

¹⁶A kut chang tiang han arsi sari an om hale a bai sunga chem ngei khat asuak, hale a mai ham ni var anga alui var.

¹⁷Kein hava ka mu karra a thi anga a ke kunga ka lui bok, a man a kut chang tianga a na themma a ti, chit maro, kei hi a phut nale a torna ha ka ni,

¹⁸kei hi a ring ha ka ni, kei hi ka thi, tak-ha a tunko ring na ka mu jui, kein kum sot ranga ramuol chunga thina ha ka tor jui.

¹⁹Hiva nang in na mu rakip, a tunna a suak hale nuk a ahong suak rang rakip ha lui jiak taro.

²⁰Ka kut chang tiang hin nang in na mu, arsi sari le sana thai mei a ke sari, hiva arsi sari le biakrup saringai thaneithiang ha anni, hale thai mei a ke sari ha ko biakrup sari ha anni.